網上有無數既文章講旅行既意義，陳綺貞都有首旅行的意義，其實呢個係一個幾sad既topic。
好地地做咩要諗意義，你去踢波唔會諗踢波既意義，你去shopping唔會諗shopping既意義。要諗旅行既意義，係因為旅行既代價太大，但凡困難或成本高既野，例如人生，結婚，追夢，人就開始諗佢地有咩意義，又或者換句話講，就係佢地既價值。
旅行係香港實在困難，你好難有長假，又或者要趁轉工先有空檔去旅行；你行開耐左，要同人交代，啲人可能話你好有錢喎，又去旅行，你話你去窮遊，working holiday之類，啲人話你係廢青，冇咩上進心，你又會擔心張CV唔靚等；你既朋友好多時都要返工返學，想揾個旅伴都唔係咁易。因為旅行實在太難，我地要諗一大堆旅行既意義，例如係去擴闊眼界，認識唔同文化，體驗生活，追夢，揾返自己之類。呢啲旅行既意義聽落都幾好聽。
對我黎講，旅行冇咩太大意義。我都想體驗生活，但通常我做既只係表面旅客野，我都冇長stay，難有深刻既感受；我都對歷史文化有興趣，但從來唔會點樣深入研究，唔會做定好多research唔會點去博物館；追夢更加唔係啦，佢唔係咩偉大既夢想例如去幫人，宣揚和平果啲，旅行最多只係興趣；同自己獨處，搵返自己都唔係我，平日已夠摺，有足夠既時間同自己相處。
我去旅行，好多時候都只係想離開一下，轉換下環境，唔想一直留係某一個地方，留係一個地方太耐我會覺得悶。趁自己仲後生有體力，又或者冇家庭負擔既時候，我想去親眼睇下個世界。
去旅行係一種我選擇既生活模式，久吾久我都會出走一下，又冇話想要得到咩，只係想隨心行下。而好野好多時係路上發生，例如我係泰國識到當地人帶我食好野，捱住高山症睇西藏既山水令我覺得好熱血，咁呢啲都唔係我預計之內。
想講既就係，唔洗特別去諗咩旅行既意義，你想做咩咪做咩囉。好多時你唔去做，唔去經歷，你唔會知件事對你有咩價值。畢竟路係行出黎，唔係諗出黎，你內心有個聲音叫你去，你咪去下睇下會點。
只要你用合理既途徑賺錢，只要你對你最親既人有個交代，旅行其實真係冇咩所謂。
意義呢樣野太深層次，人生意義都好少諗，旅行既意義就無謂提啦。
.jpg)
