我叫阿智，係個精靈寶可夢嘅玩家。
仲很好記得細個嗰陣睇電視，見到隻皮卡丘好得意，於是每逢星期六日播嗰陣，我都會坐定定咁睇。後嚟知道有game玩，就求老豆買畀我玩。自始之後，我幾乎代代都有買。
講起我老豆，佢係個幾有童心嘅人。好多時成日同我一齊睇卡通片，玩玩具，打下機。每逢我話想買遊戲而阿媽又反對嗰陣，佢都會笑笑口咁話：「唏，細路仔梗係鍾意打機㗎啦，咁先似我㗎嘛。」然後買畀我。
唯獨我第一次買精靈寶可夢嗰次，佢聽完呆咗一呆，阿媽亦好罕有咁收晒火，淨係話「走啦唔好買」就算，冇罵鬼我。至於老豆keep住呆咗陣之後，苦笑咁講佢嘅經典對白之後，就買畀我。
後嚟嘅幾代，即係咩上下左右前後陰陽嗰啲我都有買。不過令我覺得有啲怪嘅係，呢幾代我老豆都係就咁塞錢畀我，叫我自己買就算，冇好似其他遊戲咁一齊去買。
精靈寶可夢的確好玩，有收集又有對戰呢啲元素，啲寶可夢有型棍有可愛任君選擇，故事亦都幾得意，仲有中文翻譯唔會怕唔明。係怪在唔知點解用廣東話嗰陣係完全唔啱音嘅，就連最icon嗰隻皮卡丘都係咁。問老豆，佢嘆晒氣咁話唔知。
講開又講，我老豆好似好抗拒精靈寶可夢。其他game，佢都會同我一齊研究一齊玩。但叫親佢睇我玩精靈寶可夢，佢都淨係話：「有咩咁好玩啫？唔睇。」雖然我知道佢成日斜斜地𥄫住我玩。
通常我買新一代精靈寶可夢嗰排，佢都會喺夜晚自己喺書房睇唔知乜嘢小精靈。我冇跟住睇，不過成日聽到個喇叭有句咩「比卡超，十萬伏特」嘅對白，怪怪地。佢仲會睇到攞紙巾捽眼，真係唔明。
直到有一晚，我起身痾夜尿，見到老豆一個係廳，對住檯面一堆嘢口嗡嗡。我睇真啲，居然係頭六代嘅精靈寶可夢，仲有game boy、NDS同3DS⋯⋯
