喺小學，通常啲老師就算唔叫學生寫《我的志願》，都會例牌問下學生將來想做乜。咁我年代嘅小學生，生活都仲未被各式各樣嘅興趣班佔領，家長都仲未好似宜家嗰啲咁變態。好自然地，同學仔嘅啲答案都仲會有浪漫成份係入面。除咗醫生律師工程師呢啲老是常出現嘅答案外，亦都有揸巴士踢波等等只會係小學生口中聽到，將興趣為職業嘅答案。
我好記得，「作家」係我由小四keep到小六嘅答案。
雖然小學係一個可以不顧後果，發揮天馬行空想像力嘅階段，但唔知點解，「作家」好似從來冇畀人當過係一個職業。
大家可以估到，我一講咗啲咁石破天驚嘅嘢之後，身邊嘅同學除咗呆咗之外，就係喺到笑。老師雖然畀咗個好nice嘅笑容我，叫我加油，但我諗佢都係當我傻仔。
成件事就係咁奇怪。細個有唔少班教人寫作，興趣班又有技巧班又有。喺中小學，寫嘢好嘅，會畀老師讚，會貼堂（你幾時有見過有人計到條微積分老師會貼啲steps堂？）。但當你一直係個鼓勵寫作嘅環境下大，以後都想繼續落去嗰陣，啲人就會同你講：「阿仔/女，呢啲興趣嚟㗎咋，生性讀書啦。」黐鬼線，原來呢樣永遠只可以係興趣，唔可以係事業。
可能係其他地方，從事寫作嘅都係好潦倒，但我知道係香港，有好多人因為搵唔到食，而放棄咗呢個夢想。就算堅持緊嘅，好多都係僅僅夠食，想儲個錢都難，當然，成功例子唔係冇，不過，係有人成功前，唔知有幾多個人放棄咗，又或者係喺到掙扎緊。
係我細個嗰陣，話想第時寫嘢已經會畀人笑，宜家？分分鐘講完自己都笑。
宜家從事緊呢行嘅朋友，我喺到送上我嘅敬意，亦都祝福你可以有成功嘅一日。曾經努力過嘅朋友，我眀白你嘅無奈，希望他朝有日，你可以重拾呢個夢想。
如果宜家有人問我，我諗住遲啲做啲乜，我會答佢—寫嘢囉。鬼叫我係傻嘅咩。
