今晚,我身處於旺角街頭,面對緊一條全地球嘅男朋友都會聽過問題…
 
「我今日有咩唔同?」女朋友問。
「個瀏海…少咗空氣?」
「唔係!」
「我知喇~件衫新買嘅!嘩好靚啊~」
「件衫上兩年同你去旅行買,你咁都唔記得…」
 
呢一刻我腦海浮現返自己童年片段。屌係人生走馬燈!即係話我再答錯,我好可能會死…
 
「香、香水…?」
當我答完之後,女朋友當堂笑返,咁即係我答啱啦~
「妳知唔知啊,頭先我以為自己去咗仙境啊大佬,點解會咁香呢?原來係妳噴咗新香水~」
「答錯!我今日無唔同…」
「吓…」頂!畀佢跣咗一鑊!
 
「我噴邊隻香水你都聞唔到㗎咩?」
「我真係覺得無分別…」
「搞錯啊~完全唔同味。」
「我嗅覺不嬲都差妳知㗎~」
「你就黎連女朋友都認錯啦!」
「痴線~誇張喇妳…」
「我帶你去認清楚我用邊隻香水。」
 

女朋友睇黎堅嬲,帶咗我去朗豪坊地下嗰層化妝品專賣區,話要教識佢用邊隻香水。
 
唉,點解我嗅覺會咁差㗎呢?其實唔單止香水,有幾次同女朋友去食放題,一啖啪完舊海膽壽司落肚,仲諗住話呢度啲刺身幾新鮮,點知女朋友話離遠已經聞到舊海膽臭咗…
 
起初以為係女朋友錯覺,點知話口未完,就聽見隔離幾枱都話海膽臭臭哋,餐廳都即時換過碟新嘅…
 
去到朗豪坊,莫講話香水,我連牌子都未分得清,但女朋友就拎咗好多張噴咗唔同香水嘅紙條畀我聞。問我認唔認得邊隻先係佢噴開嗰隻味…
 
「其實我嗅覺差對妳都有益處。」我聞晒咁多張,都係覺得一樣味…
「點解?」
「唔係點會覺得妳煮啲嘢好食啊!哈哈哈!」
 
老實講,我覺得呢個gag唔差,但女朋友就唔多鍾意。
「藍橙仔,你咁鍾意講笑,我就同你玩個遊戲。嗱~我而家過去嗰邊Shopping,喺你答啱之前,我睇中邊件衫褲鞋襪,就用你啲錢買。點啊,係咪好好玩呢?」
 
「唔好玩!」我。
「開始!」女朋友。
 
女朋友一個箭步就衝咗入去H&M…如果我唔盡快阻止佢,睇怕呢個月都要靠光合作用食空氣過日子…
 
不過咁,佢精我都唔笨。我認得女朋友個香水罇係咩樣,只要我去搵返支香水噴兩,咁咪得囉!!
 
我嗱嗱聲搵返支香水,拎張新紙噴咗幾下,九秒九狗衝返去搵女朋友。入到H&M,見到女朋友手揪住一大堆衫行緊去收銀,嘩我即飛奔埋去拍一拍佢膊頭。
 
「手下留銀…包!」
 
喺呢個時候,背後突然有人叫我。
「藍橙仔!」
「咦?!」我回頭一望,女朋友企咗喺舖頭門口…
 
仆街!我竟然認錯咗女朋友!
「你真係連女朋友都認錯…」
「我、我以為妳會特登買一大堆嘢…」
「乜我似咁衰咩,我玩你咋!」女朋友好大力咁畀返個銀包我。
 
「唔係咁嘅意思…」
「咁你點啊?搵到我隻香水未啊?」
「我…」
「我…」
「唉!我真係認唔到啊,我去咗搵返妳支香水,然後噴落張新嘅紙度咋…」
「算你誠實啦~起碼認得我支香水咩樣~」
「吓,咁妳即係無嬲我喇?」
「無咁好氣嬲你啊~」
 
呢個故事雖然講唔出咩大道理,
但其實好有道理。
大佬啊,我真係認唔到邊件係新衫舊衫,喺邊度買…同埋用邊隻香水嘛~
都唔知點解女朋友可以記得晒我所有嘢,痴線!
 
ig:BlueGodZi