話說放工約咗女朋友食飯，近日經常落雨，個心情已經有啲肉酸。地鐵站又逼人，個個攞住把傘周圍Fing。
　
當時我同佢因某啲小事而鬧緊交，心情簡直就係差到極點。
（我寫呢篇文時諗咗五分鐘，真係唔記得咩事…情侶間鬧交，十次有八次都係轉頭就唔記得）
　
正想繼續爭論之際，上地鐵時被進擊人潮逼開。同女朋友之間隔住五個人，溝通不能，佢連望都唔望我一眼，一副樂得清閒嘅表情。
嬲到我呢！
　
落車後，女朋友依舊旁若無人咁繼續行。
沿途我同女朋友都全無交流，

突然間，「唦」一聲落起大雨。
　
我開咗把傘，一手扯咗女朋友埋黎。
「落雨啊！行過黎啦！」由於心情未平伏，我講嘢好大聲。
「咁惡做乜喎！」
「妳淋親雨都病啊！又睇幾次醫生！」
　
女朋友甩開我隻手，我哋就KEEP住同一傘下但唔睬對方。
突然，女朋友撓住我隻手…
「你另一邊膊頭濕晒啦！死人頭！」
「我驚妳淋濕啊！衰婆！」
「死佬！」
「衰婆！」
　
我哋兩個就死佬衰婆死佬衰婆咁。直至去到餐廳坐低，望見個餐牌，又好似咩都無發生過一樣咁傾計…
　
有時情侶就係咁，就算發緊脾氣，都會關心對方。
食完餐飯，就唔記得為乜嘢事鬧交，繼續快樂約會…
　
ig：BlueGodZi