我叫Katy，同男朋友阿藍拍咗拖七年，而家同居租屋，合力儲緊錢買樓先結婚。佢好勤力，不過佢份工成日都要上大陸傾生意，仲愈來愈少時間陪我。
　
我開始有少少懷疑佢，有晚趁佢沖緊涼，就攞佢部手機黎睇。最近佢安咗wechat，話要同大陸客聯絡喎，但聽聞好多援交都用wechat搵客，於是我就打開佢個wechat睇。
　
一打開，有個女人叫小善。佢哋幾個月前已經開始有訊息交流，內容仲好奇怪，有唔同價錢，仲話幫阿藍檢查身體有冇暗病…
　
「親，明天晚上八點，萬富酒店509號房，準時喔～」
呢個訊息係尋日嘅，即係阿藍今日去咗酒店啦！
　
「喂！妳做乜偷睇我手機？」阿藍沖完涼出返黎見我攞佢手機就勁緊張，分明係身有屎。
　
「我正想問你，傾咩生意要去酒店啊？」
「個客上海落黎深圳，咪去酒店傾囉。」
「咩客咁巴閉啊？」
「妳唔好理咁多啦。」阿藍一手搶返部手機，就返咗入房。全晚都無同我講過半句嘢。
　
我當然唔會咁易死心，於是第二晚，我又趁佢沖涼時攞佢手機睇…今次佢手機Set咗要用指紋先解到鎖，我只好等佢訓咗之後，用佢隻手黎開鎖。

　
「客人，雖然交易已完成，但小心被你女朋友發現喔。」
　　「對不起，不會有下次。」
「你只有一次機會，否則後果自負囉～」
　　「我已SET了密碼鎖。」
　
死佬！仲要同個賤女人講對唔住？！我一定要踢爆佢嘅惡行！再同佢分手！為咗避免阿藍洗走通話記錄，我特登用手機影低晒佢同個賤女人嘅對話記錄。
　
第日，阿藍唔知係咪作賊心虛，約咗我放工去食自助餐。
我哋一坐埋位，侍應就開咗支紅酒畀我哋。
　
我飲咗一啖，清一清喉嚨就同佢攤牌。
「係呢，做乜今日咁好請我食飯？」
「我今日想同妳講…」
　
突然，阿藍電話又收到訊息，我一望係個賤女人send黎。
　
「又係呢個賤女人！」我一手搶咗佢手機，開個訊息黎睇。
　
「客人，昨晚你女朋友又偷看你的訊息了。為了公司保安理由，我在酒裡下了毒。」
　
「咳咳！啲紅酒好嗆喉…」
　　
「Katy，妳做乜嘔血！Katy！」
　
我隻眼睜唔開，淨係聽到阿藍不停大嗌…
「Katy！點解妳要睇我手機！點解妳你要睇我手機啊！」
我聽到阿藍喺度喊…
「我返大陸，識咗個黑市醫生，賣咗半邊腎，我想快啲儲夠錢畀首期，妳做乜要偷睇我手機啊…」
　
呢個故事教訓我哋…
唔好亂偷睇人手機之餘，
有乜嘢都唔好隱瞞女朋友，
因為女人好奇心真係好強大。
　
（完）