係你面前，我完全無儀態
係你面前，我做咩就做咩
係你面前，我可以放心做番最真實嘅自己
今次去旅行，我亦見到女朋友最真實嘅一面~

「唉哋～～～好攰呀！」
女朋友一野飛踢對鞋埋一邊，之後就大字型攤係張床上面
或者今次第一次同佢去旅行..呢啲精華片段真係第一次見

「好彩無人見到咋..真係形象盡毀」
「我就係知道無外人先咁放膽姐～唔係個個都見到我咁真既一面架，哈哈，係你面前，我可以放心做番最真實既自己」
轉頭佢就繼續訓係床睇電話
雖然呢個女仔平時成日發脾氣..又叫我扮哥基..
但係其實佢都講得岩..

一個人願意展示最真嘅自己，係一種信任

唔需要刻意，亦唔需要造作，做番最舒服嘅自己
係自己面前，佢就好似一個細路女咁
呢一面既自己，就只有專屬對方所擁有。

要相處到能夠做番最真既自己，其實一啲都唔容易
如果岩岩一齊無耐佢就ALL IN比我睇，Show晒所有「技能」出黎，唔嚇鬼就真係有鬼
所以好多野，都係要靠時間歷練出黎

大家都經歷過一啲甜酸，亦有經歷過一啲苦辣
痛過、喊過，乜野味都試過晒，
若果呢個人仍然係你身邊，
呢刻嘅你，應該唔需要再遮掩什麼
因為你最真嘅一面，佢應該都全懂了

我走去拍門「喂..係廁所搞咩咁耐呀…成粒鐘啦」
佢大聲咁叫「痾完屎順手沖涼嘛」

最真一面，有優點亦有缺點

咁大聲..隔離房都知你痾屎啦…

其實我覺得一個平時外表天真可愛既女仔..竟然咁直接同我大叫痾屎兩個字..
唔知點解..個感覺好奇妙..

不過都好，起碼咁樣大家都係最真最坦誠
有時刻意去掩飾自己，真係好辛苦..
「靚女唔痾屎架！你仲要痾咁耐，哈哈，證明左你唔係…」
「你即刻入黎同我食晒佢！」
「………………….」

能遇見願意甜酸苦辣都陪你過嘅人，唔容易
能夠係你面前都願意展示自己最真嘅一面，更艱難。

雖然佢成日「出口成屎」，但我何嘗又唔係一個「粗口成文」既人…
或者要再搵另一人重新建立果個最真既自己，的確有難度

「咁我入黎架啦！嘿嘿嘿！！！！」
「哇！！變態佬呀！」
緣份叫我地遇上，或者有啲野就係注定～

P.S 你搵到最真既自己未？
那個真實既自己，又願意展示於對方嗎？

ig:hottofuzai
fb:熱豆腐仔