最初同女朋友一齊，我任何情況下都會表現得好man。
有咩重嘢要我拎都不哼一聲，連抬起個雪櫃都面不改容。
而家呢？有時仲婆媽過女人…
　
女朋友亦都係一樣，一開始小鳥依人，真係連嘻嘻笑都要捂住個嘴。
而家，咔咔聲笑不特止，擘到個口甩較咁濟。
　
一齊日子耐咗，我發現同女朋友經常都會角色互換。
唔知點解，我好鍾意食湯粉，鍾意飲熱嘢，唔係為慳兩蚊，而係我連水都鍾意飲暖水。
但女朋友就相反，極鍾意飲可樂。食老麥佢會搶埋我杯可樂黎飲。
　
「邊有男人飲唔晒可樂㗎？！」
「我唔太鍾意飲可樂…」
　

仲有一樣就係，我好驚隻手會油淋淋…
所以就連食蟹、蝦、甚至瀨尿蝦我都會用筷子，用個口黎剝殼。女朋友就豪爽得很，一手拎住隻蟹起勢咁搣，食完仲啜埋手指添。
佢話咁樣食先夠滋味。
　
有時喺屋企，我最鍾意就係訓女朋友個大脾。
唔知點解依附住佢特別訓得好…
女朋友就鍾意大字型咁攤平晒訓。
　
可能係旁觀者清，我有好多嘢揀唔掂就畀佢渣主意。
佢選擇困難症就搵我做決定。
可能係關乎到女朋友，我會更加揀得細心。
女朋友亦知我口味鍾意乜，每次揀啱我心水。
　
成日行街都會玩一個遊戲，無論見到衫、玩具、甚至係Gel甲舖頭…
都會叫對方估：「你估我鍾意乜？我又估你吖～」
起初兩個都會估錯：「嘩乜你Tasty咁差嘅！」
慢慢日子耐咗，我會知道佢鍾意咩款咩顏色…
直到而家，好多時兩個人都會揀返同一款。
我自己最鍾意嘅款，就係佢最鍾意嘅。
　
呢個就係我同佢嘅真面目，我哋都唔需要掩飾。
亦唔希望佢改變任何嘢。
因為而家嘅女朋友，對我黎講已經係最好。
（除咗郁啲就話要擰甩我個頭之外）
　
－－－－－
出版咗無耐：《無病你呻乜嘢吟》
　
ig：BlueGodZi
專頁：http://www.facebook.com/BlueGodZi