我叫阿明，今年 27 歲，上一份工係文員，而家失業。
我做左文員已經有三年，頭 2 年每年都會加 500 人工，但上一年老細話黎緊經濟唔好，所以冇得加。
知道冇得加人工後諗住跳槽，老細強力咁挽留我，個一刻我先知原來我係公司係咁重要，連老細都覺得冇左我唔得。
之後就打消轉工既念頭，專心咁繼續工作，為公司博殺。
一個月後，突然請左位新既文員返黎。
老細︰「明，呢位係新請返黎既同事，叫阿容，佢係黎幫你手，你教佢做野啦。」
當時我覺得好爽，估唔到老細對我咁好，仲請一個人黎幫輕我手。
我︰「好呀，咁阿容你過黎我位，我教你整個 Excel Report。」
如是者我就開始教阿容做我平事做開既野，咁我就可以多 D 時間睇下 Facebook，炒下股票。
過左 2 個星期到，我同阿容都開始熟，借 D 依去問下佢人工幾多。
我︰「阿容，你上一份工係做咩？」
容︰「都係文員囉。」
我︰「咁做咩轉過黎做？」
容︰「呢到人工高 D 咪轉過黎。」
我︰「咁你而家幾多？」
容︰「一萬咋。」
聽到呢到，心裡面暗爽，原來佢仲低過我入職個陣。
之後過多 2 個星期到，阿容做野都開始上手，呢個時候，老細突然叫我入房。
老細︰「明，你教得阿容都幾好，但公司要負擔 2 位員工做差唔多既野係有 D 吃力，所以...」
我︰「岩岩教到阿容上手，唔係咁快就要炒左佢麻！？」
老細︰「明，唔好意思，呢度有今個月加埋補多一個月既糧，你出去執埋 D 野走啦。」
個一刻，時間好似停左咁，我係咁諗明明之前係咁留我，而家竟然炒我？
阿容未黎個陣，我日日都 OT 2 3 粒鐘先走，我咁勤力，而家竟然炒我？
就算今年冇人工加，你留我我都肯留低，而家竟然炒我？
我呆左係到應該有一分鐘...
老細︰「明，你明唔明我頭先講咩，你執埋 D 野走啦。」
個一刻我先回過神。
行出老細房，我見到阿容忍唔住笑個樣，我先知佢一早知道黎取代我。
公司係唔會話無左邊個唔得，老闆留住你，唔係因為你做到野，只係佢未請到人！！
大家要小心呀！
