相信好多人都試過發「清醒夢」，就算喺夢境入面意識到自己發緊夢，亦即係話可以做乜都得。
清醒夢可以做乜…？咪玩啦大佬！發夢唔洗負責任，唔通玩《GTA》會睇紅綠燈過馬路咩？！見到個裸女淨係同佢講「妳，最近還好嗎？」咩。
所以識發「清醒夢」，一定係做殺人犯或者強姦犯。我本身對殺人無乜興趣，所以…我係一個強姦慣犯。
今晚，我就好好彩可以發到一個清醒夢，我正身處喺自己間房，上網睇緊其他陌生女仔嘅面書…
咩話發夢都仲上網？！我究竟毒到一個咩程度，我嬲到想打自己，但我無咁做，我怕太激動會令自己扎醒。如果難得發到清醒夢都只係上網同打自己就醒咗，我全日個心情一定會好肉酸同自責。
神啊！如果呢個真係夢，請你唔好畀我咁快醒！
喺現實中，我係一條溝唔到女嘅可憐蟲。但喺夢入面，我就係強姦界嘅霸主！我拿拿聲除咗條褲落樓下，周圍搵今晚嘅獵物。
就喺呢個時候，身後突然傳來一聲女仔尖叫聲。「露體狂啊啊啊！！」
我回頭一望，個女仔五官都好清晰，仲幾靚女，短頭髮，眼大大，有少少BABY FAT。
今晚就係妳啦！我飛撲埋去將佢撳落地，做返一個正常男人都會做嘅事。最後因為太刺激所以醒咗！呼～我心情舒暢咁走入廁所，好似一個日本武士殺完人之後，威武堂堂咁抹返乾淨把武士刀。
事隔咗一個星期，我再次發到「清醒夢」，我如常咁把握時間搵獵物，落到樓下就見到一個手抱住個BB嘅女仔，主動走埋黎同我講：「呢個係我哋個仔…」
「咩事啊？我唔搞人母嫁…」
「我係上次發夢個女仔啊！呢個係你個BB啊！」
「妳…認真嫁？」我聽到之後非常驚訝，但我無扎醒…
「我都唔知點解，但自從上次個夢之後，我每晚發夢個肚就愈來愈大，尋晚個BB就出咗世…」奇怪地，佢語氣完全無責怪我嘅意思，仲一路講一路輕輕咁拍手上個BB仔。
就係呢個充滿母性嘅動作，我好似有少少鍾意咗佢。
「係呢，我好似未知妳叫咩名…」
「我叫阿芷，你呢？」
「我叫阿峰，妳有冇睇過一本書叫《天才在左瘋子在右》？入面有個精神病人，發夢會有連續性…」講都無人信，個BB竟然有幾分似我。
「無喎，咁…我哋洗唔洗幫呢個BB改名呢？」
「我無諗過呢個問題喎。」
「個BB可能無咁快消失㗎，佢連名都無好慘㗎。」
「其實…乜你唔嬲我咩？我對妳做咗啲咁嘅事…」
「夢黎咋嘛，其實當晚發夢，我都諗住周圍殺人，我又有乜資格嬲你？」
咩事啊大佬，殺人犯同強姦犯嘅愛情故事啊？！
現實果然係比故事更荒謬，寫得出呢個故事嗰個一定係天才黎！
「咁…不如叫佢夢仔囉啦，哈哈。」
「好啊～幾好聽喎。」
「叮叮叮叮～叮叮叮叮～」突然，天上面響起令人煩擾嘅噪音。啲聲好似好遠，又好似好近。
「發生咩事？」
「我鬧鐘響啊，我夠鐘返工啦，聽日見啦…嘩！夢仔瀨屎啊！」阿芷突然間大叫。但一眨眼，阿芷同BB都消失咗。
「嘩～屎啊～」
「…」喺夢入面多咗個仔，我無醒。但BB瀨屎我就嚇醒咗。
第二晚，我照常咁訓覺，一入到夢境，就見到阿芷從遠處跑過黎。
「夢仔瀨臭臭啊～快啲過黎幫手！」唔通真係連續夢？
「好臭啊，去附近超市買尿片啦。」我提議。
於是，我哋就去咗屋企附近間超市搶咗兩盒紙尿片，我無搵女人強姦，但阿芷殺咗兩個收銀員，仲一路大叫：「夠膽畀咁多嘢我做？！仲要我OT？！」睇黎佢工作壓力都幾大…
幫夢仔換完尿片，我順手拎咗幾包薯片同汽水。
「呢包薯片我想試好耐，但太貴我唔捨得買。」我拆開包裝，擺一塊入口。
「咦！無味嘅？」
「發夢不嬲食嘢都無味嫁啦。」阿芷拎咗一塊薯片。
呢一晚，我哋就坐咗喺超市，食咗幾包無味嘅薯片，同埋無味嘅汽水。阿芷一邊抱住夢仔，一邊同我講佢返工成日畀老闆蝦。
「叮叮叮叮～」鐘響，阿芷夠鐘起身返工。
「7:30啦！我要起身返工，你幾點起身？」
「唔好咁話自己啦，同你傾計我好開心啊，聽晚見啦～」
「好，聽晚見。」
第日，我食完晚就即刻上床訓，唔想浪費咗同阿芷見面嘅時間。每次夢嘅起點都係自己屋企，但可能太早，落到樓下都見唔到阿芷蹤影，我就自己一個行去超市先。
我發現夢仔每次都同阿芷一齊出現，我等咗好耐，終於都見到阿芷抱住BB出現。
「對唔住啊，今晚有事遲咗返屋企。」
「又係你老闆啊？」
「係啦，我仲未做晒嘢啊，要拎返屋企繼續做，所以夜咗訓。」
「唔緊要，我都係黎咗無耐。你睇吓，我用廁紙同餅乾罐砌咗張BB床啊，咁妳就可以放低佢，安心食嘢同傾計啦～我仲過萬寧拿咗個電磁爐返黎，我哋可以打邊爐唔洗咁悶。」
「多謝你啊阿峰，你真係好人。」
「唔洗客氣，其實我覺得妳好好。我想話…不如呢…我哋現實入面都…」
「一齊…咦？！」眼前景象突然間由超市變返做我間睡房嘅天花板…
我竟然太緊張醒咗…！
加上我實在太早訓，醒咗之後個人鬼死咁精神，點都訓唔返，眼光光咁望住個天花板。
當太陽光射入我間房時，我突然間醒起一樣嘢。
阿芷講過自己7:30AM起身返工，更重要嘅係，我每晚都喺自己間房作為夢嘅起點，我估阿芷都係一樣，咁即係話阿芷應該住我附近！
我望一望手機，而家朝早七點，仲趕得切！於是我即刻彈起身，沖咗個涼換件衫，打算喺大廈附近徘徊，希望可以撞到阿芷。
點知，出到門口升降機門一打開，我就撞到阿芷…
「阿芷！」
「……」佢無應我。
「原來妳住我樓上，唔怪得咁熟口面啦，我仲可能唔止見過妳一次，所以我哋個夢先會相連！我想同妳講…」
「我諗你認錯人…我唔係叫阿芷。」
「吓…」我成個人呆咗，完全畀唔到反應。
「先生，你仲入唔入？我趕住返工。」
「唔、唔洗喇…唔該。」
我望住升降機門閂埋…
我開始回憶起同阿芷嘅相遇，同佢每一句對話…尋晚如果我可以同佢表白，佢會唔會答應同我一齊？我哋會相約喺超市見面？又會唔會只得我一個人呆企喺超市全日？
難道只係因為個女仔住我附近，我見過佢幾次，佢先喺我夢入面出現？
「唔係！」我跑入後樓梯，以最快速度衝落樓下，落到大堂就望見阿芷喺遠處急急腳咁離開。頭先我見到阿芷個手袋入面，放住一大疊文件，佢話過老闆要佢拎啲嘢返屋企做，又咁啱大約7:30起身返工，無可能咁巧合，佢一定就係阿芷！
於是，我追上去大嗌：「咁今晚夢仔點？」
「……」阿芷停低腳步。
「我哋今晚，仲食唔食無味薯片啊？」
呢個時候，阿芷轉身，飛撲過黎攬住我。我果然無估錯，佢的確係阿芷，佢唔認，只係得一個原因…
就係佢現實中已經有男朋友。
「對唔住啊阿峰，其實最近我同男朋友成日鬧交，我好想同佢結婚，組織有個家庭，但係佢唔想有小朋友，又唔想畀層樓困死自己。就喺因為鬧交，我先想喺夢入面殺人，結果就遇到你，亦都可能係我太想有一個家庭，所以夢仔就出現咗…其實夢仔…唔關你事，係我自己太想做媽媽…」
「咩話，原來連夢仔都唔關我事…」神啊！如果呢個係夢，請你畀我即刻醒返！
「對唔住啊呃咗你。」
「哈哈，唔緊要，我咪當發咗一場夢囉，無嘢喎。」
「真係無嘢？」
「真係無嘢，妳快啲返工啦，妳老闆咁麻煩。」
「嗯，咁今晚…我哋再去食薯片吖，或者…我哋現實都可以做個朋友。」
「好啊！今晚見。」
「今晚見～」我望住阿芷個背影離開。
明明發夢食嘢無味，但點解我總覺得包薯片好甜？
明明發夢唔識痛，點解我而家個心咁痛…
神啊！如果呢個係夢，請你畀我而家即刻醒！
而現實中，我同佢根本就唔認識對方。
夢，始終都係夢…
＝阿芷自白＝
自從同阿峰分開嗰晚，我發夢見唔到佢，夢仔亦都無出現。
我好焦急咁周圍搵，但係都搵唔到佢哋。當我一諗起夢仔喺度無人理佢，我就喊醒咗。
我發覺床邊好多眼淚，但我唔知道係為阿峰、定係為夢仔。
我無同男朋友講呢件事，但我個心一直都好唔舒服，可能失去咗，就好想擁有返，所以半年後我同男朋友結咗婚，夾份租咗一個近兩個人返工嘅地方住。我哋仲計劃緊儲多兩年錢後就可以生小朋友。
我以為做完呢啲嘢，我就會開心返。
但原來唔係…
男朋友亦都唔開心，佢覺得自己犧牲咗夢想而遷就我。
所以我哋結咗婚之後成日鬧交，感情根本唔會因為結婚而有改善。每一次發清醒夢見到男朋友，我都會殺死佢。但其實我心裡面，最想夢到嘅係喺自己舊屋企，一落樓下就見到阿峰，然後同佢去超市食薯片…
最後，我決定離婚。
＝阿峰自白＝
半年後，阿芷應該搬走咗，我無再喺屋企附近撞到佢，我亦開始慢慢收拾好心情。我開始做運動，讀夜校進修，正正經經搵份工。因為我知道，同阿芷嘅相遇現實一定無可能發生，因為根本無人會鍾意一個強姦犯。
我亦明白就算我喺現實結識到阿芷，佢都唔會鍾意一個咁無用嘅我。阿芷想要一個家庭，我呢個雙失廢青可以畀到佢咩？唔可以！
所以多得呢個夢，我面對現實做人！
偶爾我都仲會發清醒夢，都仲係會做一個強姦犯。有幾次仲見到阿芷添，可能我仲掛住佢啦。不過喺夢入面我無再撲埋去，反而走埋去同佢講：「妳…最近還好嗎？」
不過佢無應我，亦無抱住夢仔，佢只係喺我夢入面嘅一個角色…
其實我根本呃唔到我自己，我份工係返下晏，每朝7:30AM風雨不改，都會落樓下跑步，希望可以撞返阿芷…
＝三年後＝
有一朝，我如常跑步，我見到阿芷…佢推住個行李箱走埋黎。我見到佢，佢亦都見到我。我諗唔到應該點同佢打招呼呢？阿芷亦都只係企喺我面前，一句說話都無講。當我哋視線交接，大家都忍唔住莞爾一笑。
我無好似夢入面咁同佢講「妳最近還好嗎？」
因為我知道，夢可以成日都發，但係現實機會只得一次！
所以，我衝埋去摟住佢！
「我好掛住妳！我真係好掛住妳！三年黎我每朝都會落黎跑步，就係為咗見妳…我唔理妳有冇男朋友，就算妳可能已經結咗婚，但係我都唔想理，我想搶妳返黎！」
「係啊…我結咗婚。」阿芷。
我意識到自己有少少衝動，所以我放開手無再摟實佢。
「不過，啱啱已經離咗婚，我搬返父母屋企住，所以先會返返黎…」
「吓？！咁…即係話…」
我衝過時三年來積落嘅勇氣都已經用晒，而家我想畀反應都畀唔到。
突然，阿芷竟然主動摟住我。
「估唔到三年無見，畀你突然摟住，一啲都唔覺得尷尬。」阿芷。
「哈…我都係，可能…因為喺…」
我喉嚨好乾，吞啖口水，呢個時候竟然同阿芷同一時間講嘢。
「可能因為喺夢入面見過妳太多次！」我。
「可能因為喺夢入面見過你太多次！」阿芷。
傾咗一陣，我電話鈴聲響起。
「我夠鐘返工喇…不過今晚見？」我。
「你…幾點訓？」
「唔係發夢啊，我八點放工，不如一齊食飯。」我。
「好啊，哈哈，你好似唔同咗好多。」阿芷。
之後會唔會有機會同阿芷一齊？我唔知。
但估唔到，發夢都可以改變一個人。
同埋，我同阿芷食完飯嗰晚…
我夢遺咗，夢仔仲瀨屎添。
—————————
畀咗個Good Ending畀阿峰，因為發覺好多香港人都唔開心。
我希望，下面可以全部都係「大心」同「哈」～
ig：BlueGodZi
專頁：http://www.facebook.com/BlueGodZi
