撈客即地獄
當初從事地產這行，見工的時候，我問了我經理Kerry兩個問題︰「駛唔駛著西裝？點揾客，係咪要喺街撈？我聽講要打架。」而他很肯定的答︰「唔駛著西裝，Smart casual就得，除咗開會嗰日。喺街撈客當然係方法之一，但而家已經無哂打架爭客，揾客仲有好多其他方法，我哋Team就多數上網揾客。」
由於他給我的信心，所以我最後決定入坑做地產。除此之外還有一個原因令我有從事這行的念頭，就是小時候看到港台節目《獅子山下》的其中一個單元《做地產》，由誰人主演我還歷歷在目，不過我不打算多講，只是看完後覺得這行很容易而且能賺大錢，所以當要轉行時便鼓起勇氣嘗試。
入行後成績雖則中規中舉，但總算跟當初所想出入不大，的確是挺易做得成，一個內向與不善言辭的人也能在銷售行業上混飯吃，這是何等的神奇！
但有一樣事情我是一直很害怕，也做得不太好的，就是「撈客」！然而，這件事終究還是要發生。
初入行時已經嘗試過一次，但當初因為只是入行數天，自己也不會給自己壓力太多，認為沒有是正常。可是這次不同，畢竟已經入行一段時間，還是沒有就說不過去，所以這次只許成功不許失敗。
說到「撈客」，我們Team最出色的必數大師兄Chris，所以這次我跟他做拍檔，他去哪我去哪。
這次的樓盤是港島南一個新的鐵路站上蓋項目的其中一期，港島區價值當然不菲，所以是全港所有地產Agent的焦點所在，大家各出奇謀，在馬路以肉身擋車、同事互相搶客對罵、行家之間爭奪客人打架……沒有最過份，只有更過份，你想像到想像不到的事也時有發生，這次真的令我大開眼界。
不過這些都不及我所遇到的事精彩。我跟Chris選了在一個三樓的露天停車場守株待兔，這是一個不錯的決定，遠離人群，沒有爭吵，但相對地，潛在客戶也少點，不過不代表沒有，因為我們在這等了一會，便已成功找到一個，還順利的帶他到示範單位參觀，只是最後他沒有入飛，但這也證明地點選得對，這是一劑強心針。
而事情發生在我們第二天「撈客」時，我倆一如以往在露天停車場行動，雖然一直嘗試，但還是未成功，直到傍晚五點半左右，太陽西沉，燈光昏暗，就在我們打算收隊之際，細小的引擎聲和微弱的汽車燈光在沿著斜路慢慢攀升，我們兩眼發光，隨時比它的燈還亮。
「Last chance！今次到你去。」Chris推著我前進，的確，這次是輪到我出動。待汽車停定泊好後，我拿著價單上前，禮貌的問剛下車的女士︰「嗨，睇唔睇示位啊？對面有個地鐵盤開賣，喺區內隔咗咁多年嘅第一個住宅項目，開價都好吸引，好多人睇，示位喺隔離喳。」
女士對我的主動先是有點錯愕，然後禮貌的答︰「好，我都有興趣，不過我約咗個Friend要揾咗佢先，你介唔介意等我半個鐘？」聽到她這樣有禮的推搪，我心已經知道是無望了，但秉持著不放棄任何機會的精神，我還是答應了，還和她交換了電話，約好半小時後在這會合。
「點呀？」Chris問。
我聳聳肩，攤開雙手道︰「佢話要揾Friend先喎，半個鐘之後佢返嚟再同佢去睇，不過咁講都係流多㗎喇，雖然交換咗電話。」
「咁等多半個鐘囉。」Chris說，碰巧這也是我心裡所想。
半小時很快便過去，天也已經黑齊，現場只有發黃的燈光在拼命完成使命，在遙遠的入口處，有個朦朧的身影正向我們走來，或許燈光太暗的關係，我一度看不到她的腳，甚至好像看到她變成半透明。
「Hi，Charles！」直到她主動跟我打招呼，我才能清楚的看清她。
「嗱，好彩有等啫，啱啱半個鐘，真準時。」Chris推一推我說，我還在回想剛看到的情境，一時之間想不到怎樣回答他，只能報以尷尬的微笑，而他亦已經替我打了招呼。
「既然大師兄都見到佢，咁應該係我頭先眼花啫，唔好諗咁多。」我想通後便向她揮手。
「半個鐘啱啱好，我哋行得。」想不到她比我更積極。
「嗨，我叫Chris，係Charles同事，請問點稱呼？」Chris替我問了她的稱謂，我差點也忘了。
「你好，我姓陸，Nice to meet you。」陸小姐禮貌的說。
「咁我哋行喇，示位八點閂，仲要排隊，今日晏晝好多人排隊要等好耐，排得嚟時間唔係得返好多。」我立刻切進主題，之後便帶領他們出發。
去到示範單位樓下，可能已經入黑，人龍已經消散了，整條路暢通無阻，只餘下十數人在等升降機，我連忙解釋︰「而家晚飯時間，所以啲人去哂食飯，咁先無咩人，唔駛逼真好，可以仔細慢慢睇。」畢竟我跟她說這樓盤很受歡迎，現在卻跟我描述的有如此大落差，一定要打圓場。
「唔緊要，我自己本身都一直有留意開，都等咗好多年，所以點都睇睇。」陸小姐說完升降機便到，我們進去按六字直上示範單位現場。
「叮噹！」我們已經到達現場，通常示範單位一出，都會有工作人員收卡片和播片，亦會有一些Agent在等落單的自行參觀者即場「撈客」。但這個示範單位很特別，竟然一個工作人員和等待機會的Agent也沒有，冷氣還有點大，可能是人少的關係，要不是前面有其他客人，我還以為已經關門了。
「咁得意嘅，哩個時間啲人就收哂工？」我小聲的跟身旁的Chris說，而他也跟我一樣覺得很奇怪。
「陸小姐，我哋入去睇咗條介紹片先。」我轉身跟陸小姐說，只要我把現場的一切都當成理所當然，她便不會覺得奇怪，這是我的對策。
「好啊，我都好鍾意睇哩啲片。」她笑著說，完全沒有覺得現場有異樣，看來我的策略很成功。
我們和同升降機的客人進入放映室後，門便自動關上，影片亦隨即放映。
「原來係智能示位，難怪唔見有工作人員喇。」這次換Chris在我耳邊小聲道。
這條短片時長約五分鐘，介紹了樓盤的資料和優勢，拍得實在很吸引，但有種說不出的怪怪的和毛毛的感覺，不過最緊要是陸小姐覺得滿意，為什麼覺得她滿意呢？因為我看到她的雙眼已經發光了。
介紹影片結束後，另一面的門打開，我們離開放映室，去到示範單位，發展商今次總共搭建了五個市範單位，分別是無改動的一、二和三房單位，以及有改動的二和三房單位，我們都逐一參觀，不得不說這屋苑的開則很好，除了三房單位入門有一小段走廊外，其餘都沒有走廊位；洗手間不管是主人套廁還是客廁都有窗，是明廁；單位用料如洗手盤,水龍頭、煮食爐、洗衣機、雪櫃、蒸焗爐等亦是豪宅才選用的高級歐洲牌子，而冷氣機和門鎖則是頂級日韓牌子出品，整個單位沒有什麼能挑剔。
「哩個盤都幾唔錯喎，價錢係點？」陸小姐率先發問，看來她已經入局了。
「你想要幾房？想投資定自住？」我不著急，逐步逐步套她口風。
「自住，暫時都係我自己一個住，我屋企人應該要過多幾十年先會落嚟陪我，到時我都換咗唔知幾多次樓嚕。」陸小姐若有所思。
「哦，佢哋喺上面？唔緊要，咁你可以Target一同兩房，一房夠住，兩房可以當埋書房，而且遲啲賣出去再換都易啲。」我盡量將她的選擇增加，好讓她能更易買得到。
「都係，有道理，咁分別幾錢？」她認同我的說法，暫時一切也很順利，不過往往說到價錢和要她真正掏錢才見真章。
「今次第一Round，價單最抵，一房唔駛八百萬，兩房都係一千萬起喳，港島區加地鐵盤，哩啲價超抵，而且易賣易租，升值潛力大，必賺。」我盡力放大優點，將價錢輕描淡寫帶過。
陸小姐聽得猛點頭，好像很受落，此時大師兄Chris發功︰「我帶你睇埋大樓模型，你一定更加鍾意。」之後我們便走到模型區，這裡人流明顯較多，但也更寒冷，而人們大都在「傾單區」坐下，低著頭聚精會神的聽Agent計數和登記入飛，Chris亦乘勢道︰「你睇吓幾多人入飛，哩個盤好搶手，買到就賺。」陸小姐繼續點頭。
「哩個就係大樓模型，」我指著維肖維妙的模型說︰「哩個就係起好之後嘅樣，個園景都好靚，而且哩個盤係第一期，佢哩個位望內園唔只係自己嗰個，仲會睇到之後成個區嘅景，望穿哂，哩柱兩房就係個景最靚嘅。」
聽到我講解後，陸小姐更認真觀看，想必她腦內已經幻想到自己住進去後的畫面，突然她定睛看著我，問︰「會所有咩玩？」
我還以為她有什麼難題要考我，原來是關於會所，我便帶她到旁邊另一個模型查看，這是會所模型，它清楚展示會所所有設施，陸小姐看了後很滿意，我跟Chris打了一個眼色後，他便行開了，留下我跟陸小姐繼續觀看。
數分鐘後，我聽到Chris的呼喚，他終於找到位置，於是我便帶陸小姐去坐下，開始「劈單」，不過甫坐下便被奇冷的椅子振奮了一下，幸好沒有影響我的表現。
「睇完之後，係咪兩房興趣大啲呢？」我問，而她亦直說︰「係，我都鍾意大啲，兩房都幾好，個景應該都唔錯。」
「咁嘅話，你本身預幾多Budget？我同你計一計數，睇吓你有咩選擇。」我拿出紙筆準備說緒。
「我預計就千二萬左右，應該買到？」她擔心的問。
我看一看價單，然後答︰「無問題，今次啲兩房千二萬都有大約二十間選擇，另外我建議你到時真係無哂兩房的話，一房都照殺，咁你買到嘅機會會更大，因為全部一房都唔駛一千萬，任篤。不過問多一樣嘢，你收入大約幾多？」
「我自己就大約八萬一個月，加埋有三百幾萬積蓄，應該夠？」她顯然顯得很擔心。
「喺波叔Plan之下，千二萬樓最盡借到九百六十萬，你有三百萬首期夠哂，我就用千二萬嚟計，首先入飛十萬本票，哩十萬會計返入樓價，真係咁唔好彩抽唔中都會退返畀你，本票我哋可以幫你出，你碌十萬卡畀我哋就得，之後一客兩飛，你有兩個機會，下星期五就抽籤，星期六就揀樓，咁千二萬嘅樓，壓測七萬九千幾你當八萬，啱啱好，月供三萬九千幾。臨約當日畀五個Percent訂，即係六十萬，然後七日內上律師樓簽正約畀多五個Percent同埋三點七五Percent稅，即係六十萬加四十五萬，之後就到收信可以收樓時再畀多十個Percent，即係百二萬，咁你就啱啱好借足九百六，仲有啲律師費幾萬蚊，加埋哂都唔駛三百萬，所以你千二萬內基本任揀。」我詳細的計了一次，好讓她明白自己的購買力有多大。
「咁無問題的話，而家幫你搞埋入飛手續，你畀張身份證我，另外十萬你諗住點畀？碌卡都得。」我「打蛇隨棍上」，不讓她有清醒的機會。
「好，我碌卡。」說完她便掏出身份證和信用卡，我亦拿出我的EA證和卡片，Chris把「三寶」和信用卡拿到我們紅色的房間辦理手續，而我則繼續跟陸小姐討論單位景觀和該如何佈置。
過了十分鐘，Chris才怒氣沖沖的回來，手裡拿著兩個已經資料齊全的File，他先把信用卡還給陸小姐，然後再把File交給發展商，我察覺到勢色不對，很想作一個藉口行開問清楚Chris，可是我走開後如果有其他Agent過來搭訕陸小姐便得不償失，所以我還是留了下來，繼續跟陸小姐聊東聊西。
「陸小姐，估唔到你都見識幾廣博，咩都吹到啲。」我發自真心的欣賞她。
「我份人之前咩都鍾意睇鍾意玩，所以乜都知啲啲咁。」她謙虛的說。
於是，我們古今中外、上天下海無所不談，不知過了多久，一個怒火中燒的Chris便回來了，他坐下後也顧不得有客人在，開口第一句便是粗口︰「仆佢個街黐撚線，啲人都唔撚係做嘢，講嘢鬼食泥咁，做嘢又慢吞吞，最後仲要我自己整，入飛都要自助咁。頭先我哋間房無人已經奇怪，估唔到個發展商仲怪。」
我踢了他一腳，再立即打圓場道︰「嘩！睇嚟個盤真係好受歡迎好多人搶，搞到啲員工都忙到唔得閒理要自助，今鋪抽中就真係發喇！」Chris意識到自己剛才的錯誤，連忙點頭認同，幸好陸小姐被我替她Build的Dream迷住，並未察覺不妥，這才躲過一劫。
入過飛拿到籌號後，我們便離開，臨走前在升降機內，我不忘跟陸小姐宣傳︰「下星期四會截飛，星期五會抽籤，到時睇吓個結果，我再同你睇吓點部署，如果你有親戚朋友想入飛都記住揾我幫手，或者係想買樓租樓都得。」
「好啊，以後我啲朋友有需要一定會介紹畀你，你咁幫得手，不過我啲親戚朋友可能未有咁快得。」陸小姐笑著說。
「哦，唔緊要啊，幾時都得，最緊要你肯介紹畀我。」我也報以微笑，然後我們便步出升降機，打算送她回到停車場。
「做咩咁熱鬧嘅？」Chris被門前大量的警察和記者引起了好奇心，轉身對我們說︰「不如睇吓發生咩事。」之後便逕自走了，我們也來不及回話，只好跟著他。
「發生咩事，點解咁多人？」Chris問其中一個忙著拍照的記者。
「你唔知咩？死咗人呀，聽講係劫殺，一刀插中心臟，即時死亡。」記者說，而陸小姐聽到後，感到有點噁心，摀著胸口，有點透不過氣的感覺。
「咁大鑊？咁兇手捉到未？」Chris問，而同時我亦跟陸小姐說︰「可能哩面人多空氣唔流通，我帶你行埋一面抖抖。」
陸小姐臉色蒼白，雙唇已無血色，看來很嚴重，而此時Chris亦跑了過來，他就像嚇破膽般，看到陸小姐的情況便驚叫出來，然後拉我到一旁，顫抖的說︰「個陸……陸小姐，佢有古……古怪……」我看到他驚魂未定，便安撫他說︰「佢係唔舒服得比較勁啫，無咩古怪。啱喇，我正想去同警察講哩度有個病人要去醫院，你幫我睇住佢，我去揾警察先。」
「唔好！」他一手拉著我，繼續顫抖的說︰「我唔想同佢獨處。」
「駛唔駛咁驚呀你大師兄？塊臉白啲啫，咁都驚成咁？」我取笑道。
「唔係呀Charles，你認真聽我講，我啱啱喺嗰面見到條屍，就係陸小姐！」Chris說完偷瞄了一眼我身後的陸小姐，然後立即緊閉雙眼，而我聽到後則一時未能接受，確認一次問︰「認真？會唔會燈光暗睇錯喳？人有相似喳？」
「一定唔會錯，我好肯定！衣著、髮型、樣都一樣！」他言之鑿鑿，我也不禁轉頭看一眼陸小姐，只見她臉如死灰、整個人比雪還白、全無血色，而胸口位置被血染紅了一大片。
「陸小姐，你……」此時我立即回想遇見她開始的事，發現原來我忽略了很多重點，身為真•地產Agent的我，竟然為了開單而完全無視那些奇怪的人事物，實在不合格。
「對唔住呀Charles，我最後都幫唔到你。我淨係記得應承咗你會去睇，所以我返去揾返你，而我聽完你介紹之後都真係對個樓盤好有興趣好想買，只不過事與願違，嚇親你哋唔好意思……」陸小姐說完最後一句話後，便慢慢消失了。
「鬼呀！」Chris大叫後便暈了，再醒來的時候，他已經身在醫院。當他問起我陸小姐的事時，我矢口否認，說只是他的南柯一夢，還騙他因為「撈客」站太久，累倒了，所以送了他去醫院休息。
起初他還是不太相信，還跟我說了他的「夢」︰「個夢好真，我覺得係真，唔係夢，諗返起都好邪，『六六六』喎，六點陸小姐六樓，邪到呢……」我也不知如何應對，只能跟他說他看太多電影了。
然而Chris不肯放棄，繼續跟我分享他的「夢」︰「個夢真係好真，我仲記得示位無咩人，條片又死氣沉沉，啲演員無笑容，仲要黑白色，個場啲人都係無表情，而且又凍，連我哋房嘅Admin都無人，碌卡都要我自己整，入飛啲職員又好似乜都唔識咁，要我自助，你話怪唔怪？」我苦笑說︰「你想開單想到癡咗線喇一定，發夢都諗住開單。」
「仲有更奇嘅事，」他仍不肯罷休︰「我哋入完飛，同陸小姐落返樓，就見到有單劫殺案，個死者就係陸小姐，之後我就見到佢慢慢消失喇。」說完他自己也打了一個哆嗦，與其他發現，倒不如我先下手為強，自己先開口︰「勁喎，又一次證明人暈咗係聽到嘢嘅，你想像力真係太豐富，今日新聞真係講緊嗰面有單劫殺案呀，你一定係暈咗嘅時候聽到電視講，之後又太想開單，所以個腦就將啲嘢Mix埋一齊，唔做作家真係嘥哂呀你。」
Chris被我說得糊塗了，開始相信我的說話，俗話說得好，只要不斷說同一個謊話，便會成為事實，我已經驗證了。
不過回想起來，我又何嘗不是因為太想做得成一手買賣，所以完全忽視了當日的線索提示呢？人煙稀少、異常寒冷的空間和物件、陸小姐奇怪的說話，大概當日是去了地獄版的示範單位，介紹了地獄版的樓盤。因此當時場地的客人少也很正常，畢竟在地獄，他們每位也有大宅和工人，根本不需要買樓。
這件事之後，大師兄不久便離職了，官方說法是因為他營業額不足，所以要離開，但真正的原因是因為他不斷發惡夢夢到當天的事情，恐懼揮之不去才離去。
而我，雖然已經習慣跟鬼魂打交道，但還是為了令大師兄蒙受不能計算的心理陰影而自責。縱使我並未離職，可是我已經申請調回做普通地產Agent，不再接觸「住客」。至於Michelle，我依然有供養她，跟她繼續形影不離，只不過她不必再為我去衝鋒陷陣罷了。
我的真•地產Agent之旅大概到此便正式結束，但願如此好了，畢竟我也不清楚，誰知日後還會發生什麼事呢？或許有一天，在命運的巨輪下，跟我去看樓的會是你，希望屆時不會遇到「住客」吧！
