對再婚我個人好有hesitation。我知道所謂做女同做人老婆個角色真係好唔同，屋企有咩要處理最理想梗係兩個人一齊去處理，但通常得一個肯去處理。或者香港好多人未到要為生存而努力，但生活當中嘅瑣碎亦唔可以睇少。無論你係懶理定係有要求嗰個，你一樣要面對同對方生活習慣嘅磨合。我曾經都相信咩有愛就可以解決到問題呢啲笑話，但真係唔得，愛有時先係問題嘅源頭。
有一個我個人感受好深嘅問題——作息。現代香港人好多都夜瞓加被迫早起，休息不足十分常見，但係大部分人都有一個自己嘅規律，即使係長期唔夠瞓。我嘅問題係我需要嘅睡眠時間一直都偏短，工作日大家分別不大，但一到假日﹑連假﹑旅行我基本上花好多時間等，等人醒等人肚餓等人get ready。可能年紀大咗，對時間都吝惜咗。我想有時間早起身就做運動，我想有時間（疫情好轉）可以出去影啲自己覺得靚嘅相，我想有時間就自己煮啲健康嘅嘢食。所以，我漸漸習慣將本身打算兩個人做嘅嘢轉為自己一個人做。
結咗婚之後，好多其他結咗婚嘅人同我分享佢哋嘅煩惱。例如好多男性結婚前由媽媽照顧妥當，會期望搬出嚟之後有另一個女人去打理佢哋嘅生活；當然女人都會有呢種情況，然後大家照顧自己有點吃力，又要試下抽時間去照顧對方。呢種吃力係唔似返工，你會放工，但打理生活係無時無刻嘅。好多人或者將結婚想像得有啲太簡單同自由。
最有趣嘅係，身邊朋友開始知我離婚之後，好多人嚟問我點搞離婚（當中唔少係已婚），基本上我會一一詳細回答。當然問完我佢哋無咩人去離婚（笑），但我知道佢哋都有過呢個念頭。兩個人好好地係home sweet home，有咩問題就係困獸鬥。
如果兩個人之間都未搞得掂，仲講咩兩個家庭？但如果兩個人已經無問題，我認為只要對對方親戚好似對自己親戚咁就已經好夠。以前我都會覺得要出嚟食團年飯表現得好熱心好outgoing，但慢慢我覺得唔夾咪算囉。如果會因為我唔努力表現，所以對方親戚有不滿，而我同伴侶又會因為咁而出現問題，呢個問題只係遲早會出現，畢竟我無咁好戲可以演一世賢淑好女人。