啊茫係我嘅前女朋友。
諗唔到我地會有一日再同時出現係同一個場合。
今次係我大學朋友黑仔搞嘅多熱門活動，大大話話都有十幾人，估唔到係大家20尾到30頭嘅時候，竟然都咁多人出席。
咁嗰活動係要做咩？我都唔知，因為我嘅style通常都係去咗先講，反正平時自己都係冇乜嘢做。
到場。
我地相約咗係間餐廳，一齊食嗰早餐。估唔到依家竟然有餐廳有枱比咁多人做埋一齊，好似大學ocamp咁。通常群體入面總係有幾個人係特別熟，當然係一貫好熟悉嘅打招呼，然後再同在場嘅其他人輕輕咁hi一下，嗰一吓先發現原來啊茫都係度，雖然大家都分開左好耐，但係我知道我嘅眼神已經出賣咗自己，不自覺咁閃縮咗。
一坐低之後都係大家交換下近況，我都係主要負責聽，聽好多我冇咩興趣想食嘅花生，你要知道食花生係開心，但係食一個冇味嘅花生係好冇癮
吓？啊茫你分咗手？
？！啊茫係同我分手之後就有一個好穩定嘅伴侶，佢同佢伴侶已經係同居，2個人都係屬於真中產，應該係好多人眼中嘅夢想。
「嗯，係啊...不過詳情我唔特別講啦」
都係佢一貫嘅style，所有開心同唔開心，都係先自己去消化，呢樣都係我好欣賞佢嘅地方，因為我會視呢樣嘢為一個成熟嘅表現，不過可惜呢個都係我地以前分手嘅原因。
啊茫隔離坐咗一個人，佢係啊臣。好耐之前我同黑仔就已經認識佢，不過同我唔熟，係屬於hibye frd，大家都係得返fb fd嘅關係，除咗我同黑仔，我諗在場大多數人都唔識得佢。初次見面當然要自介吓，係短短時間入面已經知道佢見識廣博，仲要自己創業，年到30已經事業有為，屬於大家見到都會好佩服好欣賞嘅人，不過奇就奇在唔明白點解佢會join一班唔識得嘅人嘅聚會。雖然其他人好似唔察覺，但係我總係覺得有奇怪。
之後我地包咗㗎小巴去下一個目的地，我自己揀咗嗰單丁位坐，而啊茫同啊臣就係坐咗係最後嗰排嘅二人位。
可能係天生比較孤僻，搭車嗰時我幾習慣自己望吓窗外，唔係好鍾意講嘢，同埋嘈到人影響到人都唔係我嘅風格。不過當然因為包車，係唔會有呢支歌仔唱，大部分人都係久別重逢，好多野傾。我環視充滿著笑聲嘅車廂嗰陣，相對安靜嘅後排二位人反而更令我在意，我竟然見到啊臣捉住啊茫嘅手，想趁冇人注意到嘅時候錫佢，啊茫好怕醜，面紅耳赤，最後佢地好輕咁錫咗對方一吓。
人大咗，你會發現所有事都係可變的，你越想停留，你越想保持，偏偏就更加會殺你一個措手不及。
見到呢一幕我係驚訝嘅，但係其實都冇咩問題，大家都年紀唔細，冇咩嘢係唔可能，但係都唔會係同一個有老婆仔女嘅人一齊掛？！fb嘅作用就係用嚟俾我update一啲十年都唔見一次嘅人，估唔到呢啲時候有用....
係我仲思考緊嘅時候，小巴停了。頂，原來係行山。我自己就唔算係鍾意行山，唔係因為體能問題，係因為我試過俾人係山度捉蜘蛛整蠱我，所以真係內心有啲抗拒。不過依家做啲咩都好，我都唔係好care，見到啊茫咁，我都停止唔到去諗。
路途上面，啊臣佢好快融入大家，真不愧人生勝利組.....大家都不停圍住佢撩佢講嘢，而啊茫不知不覺落後咗，落到隊尾，變成同我並肩而行。
自分手之後，除咗同啊茫ig msg過吓，基本上都冇見過面亦冇啲咩交集。到今日可以打破界限，面對面見到對方嘅時候，反而結果xiq換嚟咗係令人尷尬嘅氛圍...
「係呢，你最近點啊？」佢首先開口。我有啲緊張咁咦咦喔喔咁講咗幾句都係咁上下嗰啲廢話....
其實我最近真係唔係幾好，我同啊茫分手兩年之後，我都有拍拖，不過係拍咗四年之後就被分手。原因都係好常見嘅感情變淡，對方話覺得好累，寧願自己一個人，林林總總，都是隨處可見嘅原因。
我結果冇挽留，我只係講咗自己一啲諗法，我覺得挽留一個唔再愛自己嘅人冇咩意義。
但係負面情緒一直冇離開過我。
分手之後，間唔時就問自己，究竟呢啲戀愛輪迴我仲要係人生入面經歷多幾多次？我只係想安安穩穩咁同另一半生活落去，又要再幾耐先遇到一個有相同諗法嘅人，仲要我地有呢個緣分走埋一起....
逃離突如而來嘅沈思，發現原來我地行得太慢，已經比大隊遺忘。抬頭露出一個微微嘅苦笑，發現啊茫原來冇留低我，靜靜地慢慢同我行，陪著我。
係一種好親切又好熟悉嘅感覺。
明明我咩都冇講，點解我會覺得佢好似好明白我，好自然咁配合我嘅步伐。
點解咁溫柔嘅你會同一個有婦之夫扯上關係？
「你一早識得啊臣？」
「嗯...同佢一齊咗1個月喇，因為大家只係知道我之前分咗手，所以我冇特別講我同啊臣嘅事」
「你真係鍾意咗佢？」
「你講咩啊！我似係拍散拖嘅人咩！」
「....你有冇認識過呢個係咩人嚟㗎？佢有老婆架啦！你做緊乜嘢啊？你唔知㗎咩？」
「....我唔明你講啲咩」
「佢fb都有po，你點會唔知...」我將電話一早search好嘅相展示比佢睇。
睇嚟佢真係唔知道啊臣嘅背景。
「佢話佢平時好忙，你知道佢係自己做生意嘛...電話連fb ig都冇裝，所以我就....我都冇特別再追問」
佢低下頭，我睇唔到佢嘅表情。
我低下頭，我都唔知講咩好。
過咗一陣，我望向佢，見到眼淚由佢空洞嘅雙眼流下。
佢把聲變得沙啞「我真係鍾意佢㗎」
「點解會咁？我都係想搵到嘅愛自己，自己又愛嘅人。」
「點解佢要呃我？點解要玩弄我嘅感情？」
「點解明明生活已經唔易過，點解仲要我遇到嗰咁嘅人？」
我冇回答佢。
我自己都想知道呢啲答案，自己明明以為一切都安定落嚟，只要時間，慢慢一步一步就可以繼續行落去，可以好好享受兩個人安穩嘅生活。點解安穩總係唔安穩？
我地已經完全落後。四周圍只係得返我地兩個。
我好難過，我難過佢好難過。
我好難過，我難過冇人明白我難過。
我想要做啲嘢。
我問自己想要啲咩？
我想拖住佢隻手，然後我伸手去拖住佢。
我第一時間諗到嘅係，我想要一個明白我嘅人。
我覺得佢都會想要一個理解佢嘅人。
我知道呢嗰舉動其實好突然，但係我又覺得呢一刻我地好需要呢個動作，好想用行為話佢知，
又或者當下嘅我都好想有人理解我，我出於自私所以咁做。
如果佢甩開我，咁就更尷尬了....
佢冇甩開我。
佢隻手一直都係好易凍。依家嘅佢都係一樣。
「點解你成日都好似暖爐咁㗎？」
以前佢覺得凍嘅時候就會咁同我講。
「因為知道你係個雪人，我嘅存在就係為咗將你溶化」
「我邊有咁肥！口花花都唔可以亂講嘢囉！」
好似以前咁，我可以好清晰感受到自己嘅體溫慢慢傳到佢嘅手度。
呢個場景就同我地相識冇耐一樣。
幾年前我地咁啱都係差唔多時候失戀，命運將我地兩個傷心嘅人帶到埋一齊。自我地相識之後，我地自此無所不談，無時無刻都想一齊，大家都好清楚只要見到對方，只要係同對方一齊，無論做啲咩都係好自然，好舒服。結果係個個晚上，我地會相約夜晚係大學度睇星星，欣賞呢個浪漫嘅地方，好好咁呼吸，好好咁享受。係回程嘅時候，好自然好自動咁拖起對方嘅手。我地望著對方，唔需要言語，只用嘴唇話大家知道。
「嗯。我知道你就係我最想要嘅人」
「對唔住。」佢喊得更犀利。
「我知道嗰時分手令你好傷心，我嗰時聽到你嘅狀況，我都好心痛，但係我同自己講，我唔可以唔狠心落去」
「對唔住....」
我歎一口氣，「都過咗去好耐喇，何況你問我，我都會話當時係正確選擇」當時我地都就要畢業，回頭諗返，的確我地唔分開的話，我地都會比彼此限制咗我地嘅未來。
「如果唔係你，我唔會有勇氣辭咗自己份工，去搵自己鍾意嘅工；
如果唔係你，我唔會明白擁有自己時間嘅重要性；如果唔係你，我唔會更加識得同人相處；
如果唔係你....」
「如果唔係你，我唔會知道原來我已經錯過最愛一個人嘅時刻。」
佢即刻面有小小難色，我補多句「呃...唔係...我意思唔係我仲對你有意思...只係有啲感覺好似唔會再降臨，唔會再發生係自己身上。」
「哦...咁我都明白。」佢剛才嘅疑惑都隨即消失。
「其實我最近都唔係好好，我同女朋友分手了」
「頭先我問你，你做咩唔講！」
「哈哈原來唔止得我係咁。唉，點解呢？點解我地甚至有同年嘅人結埋婚，但係我地仲係原地踏步」
「呢個問題我幾乎每日都問自己一次呢」
答案，顯然依然未知。
再行冇耐，就見到其他人係前面小平地嘅休息同等我地。我即刻反應到就鬆開咗手，向前面揮手示意。
「搞咩啊你地，行到咁慢，搞到我地擔心你係咪有咩事」
我都係照常扮傻帶過，亂講啲理由打發佢地。
忽然！
「我地行啦！」
啊茫一手拖住我，半拉半扯咁拖走我
吓？當我都未反應得切，我只望到其他人一臉驚恐，畢竟佢地都知道我地以前關係。
我只好配合佢，一直行，行到唔見佢地。
心意有時真係唔需要講出黎。
其實佢做咗我都想做嘅事，就係逃離，想享受屬於我地嘅時刻。
一個未來唔會再出現嘅時刻。
「佢地一定嚇死，無啦啦見到我地走咗去」我先開口講嘢。
「我唔想見到啊臣。同埋本來我就唔係咁鍾意太多人，係黑仔叫到先嚟」
「咁睇嚟要多謝黑仔，先有機會見到你。好耐冇感受過呢種舒適自然」
「有，一直都記得啊，好懷念啊」
「好可惜，依家已經唔可以再係咁。到咗聽日又要再面對好多唔同嘅嘢，又要為咗每日嘅事去煩惱」
「係，所以俾我地好好享受剩低嘅時間」
....
「喂你知唔知道原來白川鄉除咗冬天之外，原來春天來白川鄉都好靚㗎！」
「好在我地之前就去過北京咋，如果唔係依家去完返香港，嗰肺應該會變黑曬。」
「最近啊欣同佢男朋友一齊住啦，仲養咗貓，羨慕死我喇。」
「雖然依家返工都覺得幾好，但係有時真係都好累，好想逃避一切。」
「......」
世界彷彿得返我同佢，時間好似暫停咗咁。
好愉快，好簡單，好舒服，好熟悉
好想呢一刻可以持續。
時間停止，控制時間，一直都係人類嘅妄想。
就算我地唔行，時間都會逼我地繼續行，最後我地都會到達終點。
我地進入交錯嘅時空，回到當年最甜蜜嘅時侯。
係有限嘅時空，再一次戀愛。
太夢幻了，
似真似假，夢幻嘅感覺，同時都易碎。
我終於意識到根本係一個夢。
眼前見到一個車站，一個代表夢醒嘅車站。
一個代表別離嘅車站。
我抗拒與人嘅離別。
遇到太多痛苦，太多悲傷，我討厭別離。
不過，今次我知道要乾乾脆脆咁講再見。
我愛懷緬過去，卻被過去纏繞。
我地嘅故事早就係幾年前完結。
雖然好短暫，但多謝你再次進入我嘅生命，比力量我去告別，然後再重新上路。
「到站了」佢向我展示一個簡單但無法忘記嘅笑容。
「嗯多謝你」
「係時候要講再見喇」
「再見之後，今日嘅事只有我記得。而你就會忘記呢一切，繼續你嘅生活。」
佢彷彿明白我講緊啲咩咁，微笑點頭。
「希望有一日，我地可以再見。同真正嘅你再見。到時再好好咁傾吓計。」
