進擊的巨人，一套街知巷聞嘅大熱動畫，個人嚟講都幾鍾意，除左夠熱血作畫夠精緻之外，就係鍾意佢夠現實。

故事大概就係講人類要抵抗突如其來嘅巨人，起左一個個巨型嘅城牆保護自己。故事之中，城牆被某類人當做神明崇拜，因為係以前，城牆曾經為佢地帶嚟短暫嘅安穩。

城牆，真係無堅不摧？

幾鋒利嘅刀都有生鏽嘅一日，幾堅固嘅城牆都有被攻破嘅一日。有人話城牆可以幫我地消災解難五十年，咁五十年之後呢？呢座城市同城牆會被巨人蹂躪到一個咩地步？

有人話巨人同我地唔同，佢有佢地嘅習性，我有我地嘅生活，好好地生活咪好囉，點解仲要去斬殺啲巨人惹佢地？咁如果係巨人主動侵略，當冇人去挺身而出嘅時候，呢班人又會點諗？甚至會有人將主動攻擊巨人嘅人/行為定義為「破壞和平」，主動攻擊敵人何罪之有？和平並不等於唔惹事生非，你想和平，但人地可能想砌低你。有啲嘢，唔係單方面想要就一可能得到。

虛偽的繁榮，紅蓮之弓矢嘅其中一句歌詞。我地嘅城市，係咪偏安於一個虛偽嘅繁榮-外表風光內裏心寒？當可以出擊嘅憲兵團所剩無幾，苟且偷生嘅人可以為我地做到啲咩？

「家畜的安寧」，或者對偷生者嚟講，虛偽嘅繁榮總會比殘酷嘅現實好過得多，呢種恐怖嘅安寧，有如暴風雨前夕，令人退避三舍。