〈關於買樓這回事〉
唉！卑劣嘅我，心入面實在太多鬱結。講完讀書同工作，就不得不提到最苦惱嘅未來規劃。
曾幾何時，我十分崇拜人生規劃書籍。嗰種神聖感，就好似漁夫喺漆黑中望見碼頭末端嘅紅色燈火。彷彿只要做好人生規劃，並且依據定下嘅大、小目標前行，就能夠締造偉大嘅人生。
幾咁美好嘅一件事，係咪？尤其是喺我year 1嘅時候，我就對人生規劃更加趨之若鶩。我不時係到諗，如果要30歲結婚生仔、40歲退休同達到財務自由，我應該點好好規劃呢幾十年呢？
哈哈！最後我發現，當時毫無目標同方向嘅我，根本唔知道自己想要咩生活，亦唔知道理想嘅工作係點樣，所以根本冇嘢好計劃。
人生係多變嘅。就算規劃好，都唔一定會做得到。就好似買樓呢個天大嘅問題。有瓦遮頭係人基本生活所需，但點解先可以儲夠錢上車呢？我毫無頭緒。
以前父母成日同我講，讀好書，入大學，將來搵份好工，過安穩嘅生活。我諗，我成為咗大學生，算係達成咗父母期望嘅上半部分。咁下半部分呢？我笑而不語。
之前睇過國際機構Demographia嘅2018年《Demographia International Housing Affordability Survey》調查報告，指出香港樓價與家庭年入息中位數比例為19.4。亦即係家庭一蚊都唔洗，都要做19.4年先買到樓。而香港有幸地連續8年成為最難負擔樓價嘅城市。
淨係睇到呢度，點會唔令人心寒？講多都無謂，香港買樓難係有目共睹。喺呢個年代，似乎讀大學都唔可以保證買到樓，過安穩嘅生活。更甚者，一班低技術同學歷嘅員工對此更加係遙不可及。
唉！就算真係買到樓，又值唔值得用上30年時間去儲錢買樓呢？
社會為年輕人帶嚟太大無力感，而我觀察到身邊有四種人。
第一種積極正向型人。佢哋無時無刻都展現正能量，喺生活同工作中亦拼勁十足，相信憑自己努力就可以買到樓。
第二種積極負向型人。佢哋喺生活嘅威脅下極力掙扎，經常會諗如果我呢一刻唔努力啲搵錢，將來嘅生活就會十分潦倒，無可能買到樓。
第三種消極正向型人。佢哋對買樓已經不存寄望，所以就索性唔諗買樓，投放大量時間去做自己想做嘅事。
第四種消極負向型人。佢哋亦對買樓不存寄望，實行今朝有酒今朝醉，盡情享樂，凡事得過且過。
姑勿論高低好壞，我始終認為搵到值得活落去嘅意義喺先於工作。如果要用30年時間去買樓，而犧牲咗其他人生中寶貴嘅事物，又值唔值？但唔諗買樓，將來嘅生活又可以點過？
唉！呢個社會到底發生咗咩事，可以令人咁絕望。而家嘅我，大概都冇買樓嘅本錢。雖然人會成長，但樓價、通貨膨脹都會成長。如果我無可避免噉消極嘅話，就只好做消極正向型人。
＝＝＝＝＝＝＝＝＝＝
想睇返之前嘅文，可以睇：https://www.shikoto.com/i/M4Z
fb：https://www.facebook.com/168781870423363/
