〈關於正常這回事〉
我認為自己係一個正常人。但冇人認為我正常。
雖然我冇打算向其他人澄清我係正常嘅，大概都冇人會相信，但我始終認為我係正常嘅。旁人說冇做嘢、冇讀書，呢個係唔正常嘅狀態。若然我係正常人，就應該盡力擺脫頹廢沉淪嘅現況。
雖然我冇，但我仲係認為自己係正常嘅。
人生彷彿有一條康莊大道。大部分人都喺大道上奔跑，或緩步，或躑躅。總之走喺呢條大道上嘅人，都係正常嘅。呢條大道係邊個定嘅？我唔知道，但肯定唔係我，因此我唔認為有迎合其他人期望嘅必要。
社會話畀我知，人生應該點樣行，喺每個成長階段需要如何面對。細個就應該努力讀書，大個之後就應該努力工作，退休之後就應該安享晚年。啱呀！所以事都係「應該」嘅，係理所當然嘅。
我唔明白點解我嘅人生要遵從社會嘅期望而行。畢竟條命係我嘅，我唔係有掌控同體驗人生嘅權利咩？就算我犯罪入獄，或者自暴自棄，我都喺度選擇緊我想體驗嘅人生，唔係咩？
縱使而家嘅我費盡心神噉面對內心嘅矛盾同懦弱，但冇人能夠理解。或者走喺社會認定嘅人生路途上，一切都清晰明瞭，一切都穩定不變，因此正常人根本唔需要思考。他們只要照住大路前行，走完人生，就能得到大眾嘅歡呼。
就係咁！當人喺確定而穩定嘅環境下，就能得到所渴望嘅安全感。安全感從何而來？就係當佢哋做嘅事與周邊嘅人相同，佢哋就認為呢個行為係啱嘅；當大家都認同某種信念，嗰個信念就係正確嘅。
呢種社會認同感令佢哋確信自己嘅行為信念係正確嘅。而當行為信念有問題嗰時，亦唔洗對自己嘅人生責上全責。喺必要時可以推塘過失，甚至因為其他人都有相同問題而分散自我責任。
呵呵！只要遵從社會期望而行，佢哋就能夠永遠立於不敗之地，唔需要為自己嘅人生負責。你話呢樣唔係一件極美嘅事咩？所以呀！佢哋完全冇思考人生嘅需要，因為佢哋根本冇為自己嘅人生負責任嘅諗法。
呢種諗法只會令人逃避自由，抗拒選擇；確定性亦令人陷入無所追求嘅空想之中，阻礙個人成長同體驗自我。但呢種諗法從何而來？人點解會建立起呢種惡習？擰轉頭睇下教育制度同父母管教模式就能夠略知一二。
好似我咁卑劣同任性嘅人，就偏偏唔願意跟其他人嘅期望而行。我偏愛走喺幽深無明嘅小徑上，因為咁樣我就要為自己嘅人生負上全責，接受選擇嘅後果；隨此而嚟嘅，就係人生嘅自由。
雖然我每日喺痛苦中掙扎，但我又非常快活。若然社會所言嘅「正常」只係少數服從多數嘅數字遊戲，咁樣喺喪屍群中嘅人類算唔算得上「正常」？
＝＝＝＝＝＝＝＝＝＝
想睇返之前嘅文，可以睇：https://www.shikoto.com/i/M4Z
fb：https://www.facebook.com/168781870423363/
