〈關於做自己這回事〉

喺呢個社會,做自己好難。

社會具團體性,具凝聚力。要維持社會穩定嘅最好方法,莫過於大家都抱有同一信念,相信同遵守同一規範。只要係咁,社會就唔會有反對聲音,亦唔會有例外。

可惜嘅係,呢個如意算盤應該點打都打唔響。社會上有唔同類型同背景嘅人,根本冇可能有一套大家都信奉嘅準則。唯一嘅可能性,係將人好似機械人咁依照規範量產。

聽起嚟無稽,但係喺社會就不停噉進行緊無形改造,將人潛移默化噉成為機械人。社會講求和平、包容、穩定,每個人就不停噉返工放工,返學放學,追求安穩而一帆風順嘅生活。

人慢慢噉接受咗社會預設嘅一套,成為一模一樣嘅人,做一模一樣嘅事。當社會人都做同一件事,信同一價值觀,就形成強大嘅凝聚力同團體迷思。做自己嘅人,有自己諗法嘅人,就自然被排斥,被睇成異類,甚至受到標籤。

更重要嘅係,佢哋會用盡一切方法將我哋改造成同佢哋一樣,或者不停打壓壓。社會樣,社會人,社會觀,一切都為人帶嚟安全感。

幾咁可悲呀!幾咁諷刺嘅事。一個咁發達嘅社會,竟然容不下半點反對聲音,容不下特立獨行嘅人,容不下負能量。

係咪係時候反思下社會到底染上咩病?我曾經聽講過,將一班飼養嘅雀鳥放生只會害死佢哋,因為佢哋長久受飼養,覓食能力弱,難以再喺野外生活。

社會同受飼養嘅雀鳥有咩分別?長久以來嘅安穩令社會失去承受挑戰嘅能力,所以只好一味盲目追求穩定,而非接受挑戰不停進步。最脆弱嘅嘢,先係最受保護嘅嘢。

年輕人有拼勁同勇氣追求改變,追求進步,追求夢想。但住住因同社會期待唔同而被標籤成廢青,只係識搗亂同搞破壞。到底社會係咪真係想進步?定只係一個但求安穩,得過且過嘅紙牌屋?

不顧一切噉追求自己所信奉嘅,所熱忱嘅,聽起嚟係好事,但有冇可能只係對現實嘅逃避呢?我經常反思呢個問題。追夢係咪對現實嘅逃避?社會抗爭係咪年輕人因無能而對社會發細路仔脾氣?我唔知。但如果社會真係咁好咁安穩,個個都安居樂業咁完美,大概唔會引起咁大回響。

現時社會確實畀唔到信心年輕人,去相信未來仲有希望;亦因如此,先令我反思到底人生嘅意義係咩,同時唔願意再俾社會牽住鼻子走。既然冇希望,就唔好計畫太多,盡力去做自己鍾意嘅嘢就算。