〈關於結果這回事〉
成日聽到其他人講，結果唔重要；尤其是係追夢呢方面，就聽到更多人講，最重要唔係結果，而係喺拼搏程過程中本身嘅意義。熱血、勇往直前、無畏無懼、百折不撓、超越自我、毋忘初心……
曾經我都極為相信呢個信念。我覺得難得搵到自己鍾意而投入嘅事，願意花時間去學習同練習，渴望係同一件事上精益求精，亦有信心做得更好，好似世界上再無其他事情令我咁嚮往。
搵到一件自己咁投入嘅事，我就好想做得更好，更想喺住後嘅日子能夠有所成就。退學嗰時，我覺得無論結果如何，只要我有努力去做過，揮灑過熱血，我都唔會後悔。
人生最後悔嘅事，唔係以前做錯咗咩事，而係以前冇做過咩事。為人生所嚮往嘅事努力過，就好似為人生呢本傳記劃下記號，就算老咗都有好多故事同孫仔孫女分享。
嘿！可笑。做嘢唔係為咗結果就好似飲啤酒唔係為咗醉。唔醉，咁飲嚟做咩？我唔能夠想像一個追夢嘅人係唔為結果，但係又願意每日投入十個鐘頭去做同一件事，呢樣嘢似乎並唔理智。
你細心留意下，講結果唔重要嘅人，通常係啲咩人？咪就係未有好結果，畀藉口安慰自己嘅人。另外已經成功嘅人，佢哋已經成功咗，當然可能以聖人嘅口吻大拋金句；而好似我咁失敗嘅人，根本就無人會理。
成果一定要係可見嘅事？如果追夢係為咗唔令自己後悔，係為咗挑戰同超越自我，係為咗體現自己嘅獨特性。呢啲目標，唔係就係追夢嘅人想得到嘅無形成果咩？
當然我唔係否定過程嘅重要性。過程中嘅成長、進步或者象徵意義，都係豐富生活嘅一部分。但我覺得無論好嘅壞嘅，有形無形嘅結果，都係極具意義嘅反饋，係十分重要嘅。
以前嘅我滿懷一腔熱血，而家一事無成嘅我只能夠慨然惆悵。事實上，要喺自己鍾意嘅事上高做出眾嘅成就，少不免大量時間同心機嘅投入，但又無辦法忽略生活的開支。
如果真係矢志不移噉追逐夢想，但係又唔能夠係嗰個範疇搵到食，進退維谷，要如何是好呢？
呢段時間我最糾結嘅其中一件事就係，雖然我好鍾意寫作，但我喺寫作路上依然停滯不前，又不得不考慮生活。如果我知道自己唔能夠成功，我大可以放棄，但事實上冇人能夠肯定同得悉呢件事。
喺追逐目標嘅路上，冇人話到畀我聽成唔成功，所以過程中先會有世界上最美好嘅盼望，亦有最痛苦嘅絕望。面對未來嘅不確定性，令我感到不安同矛盾。
返去結果呢回事，我都係覺得陶淵明講得有況味。佢喺五柳先生傳寫到「造飲輒盡，期在必醉；既醉而退，曾不吝情去留」。雖然我唔知會唔會曲解原意，但係到都想講下我理解嘅事。
飲酒就要盡興，盡興就要必醉。如果得唔到醉意，飲酒都不過係淡而無味。當然，個個竭盡所能追逐目的嘅人，都想達到目標；如果達唔成嘅話，成件事嘅滿足同喜悅必會大打折扣。
不過我覺得文中最重要想表達嘅，並唔係醉唔醉，盡唔盡興，而係「曾不吝情去留」嘅胸襟。結果係重要、過程亦都重要，但更重要嘅係唔執着於得失，拎得起，放得底。
正如文中一句，「忘懷得失，以此自終」，正正顯示出陶淵明嘅高風亮節。但能夠做到嘅，又要幾多人？
＝＝＝＝＝＝＝＝＝＝
想睇返之前嘅文，可以睇：https://www.shikoto.com/i/M4Z
fb：https://www.facebook.com/168781870423363/
