〈性質確定。性質唔確定。〉
呢三個月閉門自封嘅時間，我非常懶惰。
認清自己嘅卑劣之後，我漸漸無心寫小說，只係隨手寫下嘢發洩。反正寫又好，唔寫也罷，其實都冇咩大不了。我對任何事都冇咩心機，平日都係瞓，頂多睇一陣書。總之就係寫唔出似樣嘅小說。
好似我呢啲咁樣嘅人，就應該過呢啲咁樣嘅生活。但事實上我係一個點樣嘅人，我都唔清楚。
人點解要尋找同認識自我呢？不過係面對人生嘅虛無嘅反抗。我唔了解自己，唔明白人生嘅意義，亦唔知道往後嘅人生要點行，更加唔知道自己未來能夠做啲咩。
面對人生嘅虛無，我感到迷惘。迷惘使我窘迫，所以我渴望能認識自我、掌握人生、了解生存嘅意義。我渴望了解自己，等自己有一條清晰嘅道路可以依從。我係呢一類嘅人，就做呢一類嘅嘢，點都唔會錯。
如果每個人都可以完全以客觀理性嘅方式認識自我，豈不是可以更有效率噉發展自己嘅能力？性格、才能適合做藝術家嘅，就全力學習藝術；性格、才能適合做學者嘅，就全力專注學術研究，咁咪走少好多冤枉路？
未來有太多唔能預計嘅事，因此愚笨嘅我總係想搵到掌控人生、控制命運嘅方法。不論宗教、星座、生肖、信仰、科學，只要能夠令我對人生有控制嘅妄想，或彷彿能了解生命嘅真諦，都成為生存嘅絕佳依靠。
係嘅，或者一切清晰嘅人生會過得簡單一啲，快樂一啲。但係世事無常，人又係具可塑性嘅，係會成長嘅，係會改變嘅。人生本來係虛無而毫無意義嘅。刻意認識自我和掌握人生嘅人，應該唔會搵到永恆嘅答案。
就算知道自己嘅命運又點？豈不是令到人生變得枯燥乏味？每個人都知道未來自己會點，走喺命中注定嘅道路，咪冇嘢再值得追求？
可悲呀！命途確定嘅人生必然係受限制嘅。
面對人生嘅虛無，我曾經迷信過、反抗過。我相信自己所相信嘅事，相信任何對自我和人生正面嘅資料，永無止境噉墮入虛構嘅希望中，確實係絕美嘅事。
我曾經認為自己係理性冷靜嘅人。別人對我嘅評價，總係沉厚寡言，思緒細密，冷靜從容。當然，我都同意，甚至漸漸變為佢哋口中嘅人。
我查看坊間嘅九形人格測試、MBTI、星座、生肖。我相信我所相信嘅。我相信自己係理想化嘅自己。我相信自己會成為理想化嘅自己。甚至刻意噉成為所描述嘅人，更加強化咗呢方面嘅信念。
我相信我嘅個性同才能適合寫作。我相信現時嘅窘迫只係時運不濟。我相信只要我願意付出，就一定能夠達成目標。一切都係光明，黑暗總會散去，人生多麼美好而有希望。
然後呢？我仲係唔能夠完全了解自己。我唔確定自己係咪心思細密，因為我會犯下極為愚蠢嘅偏誤；我唔確定自己係咪冷靜理性，因為我無時無刻都喺迷惘中自暴自棄；我唔確定自己係咪從容唔迫，因為我對別人嘅目光十分在意。我仲係自以為是噉認為自己一定會成功，但而家連一篇似樣嘅小說都寫唔出。
我漸漸陷入自我選擇偏誤和確認偏誤，相信自己係某一類型嘅人，但又對自己感到陌生。我因為唔了解自我而尋找自我，直至自己似乎性質確定，又因對自我嘅唔了解而感到疑惑。
呢個係幾咁荒謬嘅事！雖然渴望成長，不斷尋找自我，但似乎永遠都搵唔到答案。
咁就放棄尋找自我啦！放棄掌握人生啦！接納性質唔確定嘅自己，喺虛無嘅人生中邁步，或者呢個先係答案。
