「拜──Jessica跑咁快做咩呀？」May姐望住Jessica嘅背影，垂低揮到一半嘅手。
辦公室情報大使Mandy表情不懷好意，「佢約咗『另一半』呀嘛，次次都九秒九仆去㗎啦。」
Jessica捧住包裹，見路人好似凍結咗咁慢吞吞，就摩打腳頻頻爬頭。
「駛乜咁心急啫，咪要啲男人等下囉，應份嘅。」May姐紅眼喇，日復日、年復年嘅疲累，令佢雙眼充滿紅筋，令佢忘記咗嗰份衝勁。
佢同老公早喺廿幾年前──拍拖兩周年，已經好似老夫老婦咁相處喇。叫老公等？老公睬佢都傻啦，邊似得Jessica同男友拍咗拖成五年，仲咁Sweet呢。
「仲話約咗『另一半』在先，嚟唔到我哋嘅飯聚，真係廿四孝女友喎。」Mandy笑騎騎，但喺側邊一路冇出聲嘅Emily就暗地苦笑。
唉，早知都學Jessica推咗呢次應酬啦。Emily為免俾班同事話唔合群，先決定放棄一晚自由。
「咁都得？要個女朋友咁頻撲，你哋估Jessica男友會唔會好大男人呀拿？」May姐大擔推測，佢覺得每件違反「常理」嘅事情背後，都需要一個解釋，而冇幾多人會覺得「係愛呀哈利」呢個解釋夠晒充分。
「睇嚟都似喇。」寒冬下，Emily呵出一口白煙，眼前嘅景物一瞬間變得模糊。
聽講，唔想成為是非主角方法一：一齊講其他人是非。
Mandy左望右望確認安全後，終於忍唔住爆響口：「上星期，阿Roy見到Jessica同個女仔喺街邊拖到實，仲有Goodbye Hug添……」
就算Jessica嘅身影神早就被人潮淹沒咗，但佢嘅存在感依然好高。
May姐瞪大對眼，「吓？Jessica邊似Les呀？佢咁乖乖女。」
「咁Les都有好多種㗎嘛。」
Emily失笑，「阿Roy講嘢都好信？我夠撞過Jessica同個男仔睇戲啦。」
「哎？係咪幾有型靚仔嗰個呀？」閱人無數嘅May姐甚至未用腦，已經將成件事梳理好：「靚仔冇本心，Jessica肯定係為咗箍住個男仔，先咁肉緊。」
上一秒仲散播謠言嘅Mandy，即刻嚟個智者分析：「我都估係流料㗎喇。佢頭先咪拎住個包裹嘅，係限量版遊戲機喎，實係俾佢男友──」
May姐大奇：「都未到正日就送聖誕禮物喇？」
Mandy忟憎地將聲線吊高四度，「其實我都唔明啲男人點解咁鍾意打機，我條佬又係咁。」
沉默嘅Emily不幸被散打槍射中，但佢一諗到自己死慳死抵，上星期終於都買咗個35吋曲面防藍光電競Mon，不禁飄飄然。
之但係，佢先唔會為任何人辯護，僵化嘅思想點會因為佢講幾句說話而改變？
Emily佩服自己嘅冷靜同超脫，隨口話：「係喎，乜又聖誕喇？完全唔知送咩禮物好添。」
Mandy瞇起眼，咧起棚牙譏笑，「你有冇後知後覺啲呀？我哋公司啲聖誕廣告都Loop咗成個月喇啵。」
沿途各式店舖嘅門面，正好為遲鈍得冇諗過要買禮物嘅人，慷慨送上琳瑯滿目嘅「禮物建議」。呢種最後通牒實在偉大，成功爭取維護唔少段關係。
May姐同Mandy忽然變身禮物品評家，Emily揞口扮咳，掩飾一個唔得體嘅喊露，佢好掛住鮮有重覆嘅遊戲劇情。
「睇下！」呢個時候，Mandy猛然發現新大陸，指住十一點鐘嘅方向。
Jessica喺冇幾遠，佢身邊有個女仔，佢將包裹遞俾對方，見對方凍到震，仲將頸巾除埋俾人，之後佢哋兩個就拖住手繼續行。
「吓？原來係堅料呀！」Mandy好興奮，May姐則一臉茫然。
到達飯聚地點，點完餐，Emily聽到May姐同Mandy仲興致勃勃繼續話題。
「咁我明白晒喇，Jessica肯定係做『男』嗰個啦。」May姐咬牙切齒，終於搵到一個自己覺得合理嘅答案。
「咦？咁佢咪係『廿四孝男友』先真？」Mandy好滿意自己嘅幽默。
舊同事Joanna好有心，專登嚟聚舊，「點呀你哋？講緊咩咁開心呀？」
大家寒暄幾句，May姐就話：「我哋有個新同事，佢原來搞基㗎。」
「真係㗎？」離開公司半年嘅Joanna，都對全然陌生嘅「同事」好感興趣。
睇怕呢單「猛料」，會越傳越勁，最後傳返入Jessica對耳度，或者佢受唔住壓力，就會辭職。
Emily乜都冇講到，用理性過濾咗一切可能「禍從出口」嘅說話。
佢有換過彩虹頭像，但冇興趣抱不平。佢只係諗到，如果少咁個幫手，啲嘢就要自己做返晒喇。
熱盤陸續上枱，蒸氣將一切燻得朦朦朧朧，Emily副眼鏡直頭白濛濛一片。
聽講，唔想成為是非主角方法二：一切言論，不代表本人立場，或者直頭，冇任何立場。
（完）
鍾意嘅請LIKE & FOLLOW 我FB Page :D ↓
