十一月嘅糧尾，晏晝12點29分。

趁其他同事仲忙緊，我向Mandy打個眼色，偷偷地拎起湖水藍色皮製銀包，鼠去後樓梯搭貨𨋢，啱啱好避得開人潮。

一出大廈，急步走過兩條街口，Mandy問：「咁急做咩喎？」

我唔敢擰向後面，捉住Mandy行快兩步，然後閃身入咗麵店，先鬆咗啖氣，「安全喇。」

未坐定，阿姐就拎住落單紙行嚟，我每次都會嗌牛腩河，單餸平啲。

Mandy左度右度，「要個雲吞墨丸麵，唔該。」

「飲咩？」

我嘴唇郁動一下，拎住銀包嘅左手握得更實，「唔駛喇唔該。」

「唔該要紫菜湯。」

我今餐係21蚊，Mandy承惠30蚊。呢個地段，呢個價錢，簡直係發緊夢。

但交完卡數，交完幾十萬張單，再遇著公司微波爐月中開始就壞咗，呢個月就係惡夢。

「乜咁啱嘅？」

我同Mandy擰向來人，偷偷互相交換眼神。唉，始終都係避唔過隻餓狼。

「Hello Roy，真係啱。」

Roy係Designer，我哋Team啲Promotion，多多少少靠佢食糊。

「雲吞麵呀唔該。」Roy落完單，就對「債主」話：「張Banner下晝就俾到你哋。」

「Roy哥，食飯咪講公事啦，信唔過你咩？」我笑住講。聽住先啦，隔離Team叫佢做嘢就好快交得貨，我哋嗰啲就一味識拖。

三個麵上枱，Roy望住自己兜清湯，開始發功：「可唔可以要你啲腩汁？」

「哦……好呀。」我話口未完，Roy就收咗幾殼湯做奉獻品，佢仲側側膊拎咗幾塊仔碎牛腩。

見到Mandy有雲吞同墨丸，淨係得雲吞嘅餓狼眼裡閃過一絲紅光，問：「不如我哋交換餸咯？」

Mandy目光喺兩個碗之間來回掃射，「大家啲雲吞都咁大粒呀。」

我差啲笑咗出聲，真係睇唔透Mandy係扮天真，定係四兩撥千斤。

「俾單餸價錢但食雙餸」嘅陰謀事敗，Roy好冇癮，但佢好快再接再厲，喉住Mandy啖湯：「咦？你個湯好似幾好飲喎，我可唔可以試啖？」

嘩！咁都問得出口，佢唔好再厚面皮啲？

我同Mandy打個眼色，佢燶口燶面，但為咗我哋Team嘅幸福，決定獻上自己兜湯。

Roy一個匙羹隊埋去，差唔多收割咗一半嘅紫菜。

我哋真係睇到眼都突埋，Mandy有道火，「唉，因間四點幾實肚餓啦。」

Roy笑笑口，拋出一句話，足以解釋晒所有打工仔嘅苦況：「糧尾喇。」

呢三隻字，應該放喺「搵食啫！犯法呀！」後面，成為奴隸埋沒良心嘅九字真言。

「喂，我返上去食包餅先，陣間見。」佢仲趙完鬆添。

俾人喺乞衣兜拿飯食，Mandy反晒白眼，「食唔到我啲餸，都要飲我啖湯，佢份人原來真係好Cheap囉。」

找數嗰刻，我再次見到我銀包得返百幾蚊。

「弊！今日係零食補倉日，班喪屍肯定會搶晒啲飽肚嘅嘢！」我拖住Mandy跑返公司，或者我對眼都透出一絲紅光。

如果打工仔之間有鄙視圈，可以帶飯嘅奴隸獸，應該算係最高級嘅生命體。

糧尾嗰幾日都唔駛憂嘅，應該都算係人生贏家。

（完）

好消息：我諗到篇肥佬故點寫，改名做〈分身將我包圍！直到世界冇晒可以相信嘅人⋯⋯〉：https://goo.gl/6g6QRX

壞消息：會變咗更新得超慢嘅實驗中篇，同隨時爛尾，但我自己會玩得好開心XD。

我想冬眠，我想開暖爐，我唔想將對手伸出被竇。

#余該隱 #短篇 #小說 #廣東話 #短篇狂想 #短篇小說 #在職貧窮 #月光族 #長期糧尾 #冇錢駛 #出糧未呀 #月尾 #我月頭月中月尾都係糧尾