有次返份Promoter，間公司係網上交易平台，我主要職責係企街食塵，其次係教人落單買嘢。
多勞多得底薪加佣金制，越多客，我份糧就越肥肥啦。我窮，我冇用，對唔治各位成功嘅扮工人士，我唯有把口唔收，見人就Sell。
我拎住喺我公司買得到嘅產品手Fing Fing，食咗無數個檸檬之後，終於有個小妹妹肯停低。
「媽媽，個公仔好得意呀，我好想要。」
嗰位媽咪本身掛住篤電話，聽到個囡咁講就走埋嚟。咁我就開始解釋產品特點、有咩優惠喇。
睇佢嘅打扮、舉止，似係中產家庭，有啲學識咁。佢摸下個發聲公仔，笑到四萬咁口，「又幾得意喎。」
佢見到攤位上面仲有其他產品，就問我其他產品有咩咁特別喇。
十萬樣產品，我梗係唔會記得曬啦，突然間俾人問書，即刻望下產品包裝盒，噏返上面寫住嘅賣點出嚟。有啲產品懶係勁咁，用埋曬啲深英文。Sorry！I go to school by bus！我一於當睇唔到，當堂變返出色扮工仔。
佢問幾百條問題，果然係運吉，但佢想走嗰陣，佢個囡抆住佢衫，堅係睇中個公仔喎。
估唔到佢又幾錫個囡，對價錢又唔多著緊，就扑槌話買。我諗起份糧就爽一爽，即刻決定收工食串魚肉燒賣獎勵下自己。
我即刻拎部iPad示範俾佢睇點落單，點知部機神神地，等咗好耐都未開到個App。
細路囡唔耐煩，但嗰位女士反而好有耐性，笑住咁教囡囡唔好催人，要俾時間職員做嘢。遇著個客好人，真係Sell屎之福！
我終於開得返部機，個客都拎咗信用卡出嚟。我示範俾佢睇可以點樣用個App買嘢，點輸入信用卡資料，點知咁樣就出事喇。
佢嘅態度一百八十度變曬，扯曬火，「吓？乜唔係即場碌卡咩？」
個攤位就一眼睇曬乜都冇嘅，加上我公司專做網上交換，冇門市，即場碌卡咪做唔到鼓勵客人平時自己落單嘅目的囉。
我唯有同個客解釋返公司嘅營運模式。
點知佢更加嬲，瞪大對眼兇我，「有冇搞錯？你咩公司？點解唔係即場碌卡，我信唔過你個App，因間偷咗我啲資料點算？」
我喺心入面反咗一萬次白眼，睇嚟大家見到騙案越嚟越多，而家成日形住自己會係下個受害者。
佢提議：「一係俾現金囉。」
「就算收咗你現金，我哋都冇現貨，要寄貨去你屋企。用信用卡可以保障返你，有咩事會退錢。」
佢指住個發聲公仔，「咁呢樣係咩嚟？」
「呢個係樣版……」其實呢件貨經過幾多人對手，我個同事去完廁所有冇洗手，我唔知，我真係唔知。佢敢要，我都唔好意思賣。
「你係咪想呃我？有乜理由買嘢唔可以碌卡同俾現金？你咪駛旨意呃我！」
有啲客真係好鍾意走入西餐廳問人點解冇賣蛋撻，係佢哋眼中每個人都係完美，每間公司都係萬能，呢種「正能量」真係獅子山精神嘅代表！
其實唔買唔緊要，但由好人變兇人，佢變臉速度之快，真係令我大開眼界。
既然係咁，就算我幾想食串魚肉燒賣，都唯有放棄喇。
寫完篇文冇幾耐就發生渣馬事件……係我錯，冇乜嘢我返出去先。
（完）
鍾意嘅，請Like & Share！
Like我FB啦 :)
〈酒店炒散蝦碌〉：https://goo.gl/bqR5Qf
#余該隱 #鬼叫我炒散 #炒散 #sell屎 #promotion #變臉 #但變臉最快嘅梗係你腦細啦
