「你哋之前分手，都係因為佢出軌。今次無論點，你同佢之間已經冇晒信任，再喺埋一齊，又有咩意思？」咁大條道理，我真係覺得自己有潛質上電視做愛情專家。
阿蚊呆咗，似乎估唔到我嘅反應。但佢果然係訴苦界老屎忽，一於唔理我，「你聽我講埋先啦。」
「哦……」我即刻謝晒皮，佢就繼續講阿邦喺Facebook Add咗個Double May……
唉。真係冇鬼用，仲諗住「傷心大JJ」嘅樹洞報復口訣有用添：
「嗌佢辭份工，勸佢換老公，呻完唔離場，先最冇陰功。以往樹洞淨係默默咁聽，啲人同我哋呻完就舒服晒，同派個嬲嬲俾啲19政策一樣，轉個頭就冇咗件事。所以我哋而家唔止聽，仲要出聲，迫佢哋面對現實，改變現實！」
我冇晒心機聽阿蚊呻，無論我點嘗試打斷佢，佢都總係話：「等陣先，我未講完呀。」
或者係我始終懷疑，如果我將心嗰句──你醒下啦，佢係個賤男，玩你㗎咋──講出口，到底我會幫到個朋友，定冇咗個朋友呢？
佢講講下靜咗，我以為甩難，點知佢只係小休一陣，「其實我覺得……我沉咗船。」
我打咗個喊露，壓制自己解釋「沉船」其實係點解嘅衝動，「你一早對阿邦沉晒船啦。」
佢望住公園（臭）水池上，一彎殘月嘅倒影，嘆咗口氣，「或者唔係沉，係鏡花水月……算啦，我都唔知點講……」
唔知點講，但都講咗成晚喇喎。
佢望下隻錶，原來凌晨一點。佢終於覺得眼瞓，肯放我走。
初試，「報復」，失敗，我又，做咗，一晚，樹洞。
第二朝返工，我因為抖唔夠，犯埋晒啲低級錯誤，俾阿姐省咗幾句。我嬲嬲哋，就覺得一切都係條花心蘿蔔嘅錯。
阿蚊同老友講嘢就直不甩，對住男友就頭耷耷。舊時佢啲感情煩惱下下拖足三、五、七個月，今次呢單嘢佢實有排煩，而我更加有排俾佢煩。
我扮住工，喺心事台求救。冇幾耐「傷心大JJ」就覆咗：「人點解搵樹洞？因為樹洞係啞嘅，唔驚秘密唱通街。你爆響口，等全村人公審佢男友，話唔定可以迫到佢男友飛咗佢。」
「我朋友被出軌，仲要俾人飛？」
「咁又點呀？養狗唔可以嫁獸醫？你咪繼續做垃圾桶囉～～」
我初頭有啲抗拒，但諗諗下就覺得幾有道理。想唔駛再做樹洞，唯有解決搵樹洞嘅人，亦即係解決佢哋嘅困境。
爆秘密、教人分手，聽落好冇道德，但人唔可以好似啲膠層咁短視，為咗我嘅睡眠質素（同阿蚊嘅終生幸福），我決定認認真真嚟次革命！
於是我扚起心肝，當晚就約咗Rebecca出嚟食飯。
吹咗半晚水，Rebecca就話星期六Party Room個邊覆咗有位，我哋圍內五個最熟嘅女仔可以嚟返晚八婆之夜。
我咬住舊牛扒，扮晒冇嘢咁問：「係喎，唔叫埋阿邦？多個人好玩啲嘛。」
我一早諗好晒啲對白：都係唔好喇，聽講佢哋兩個呢排發生咗啲事。
到時Rebecca實好驚訝咁問發生咩事，我就會話：哎呀，都係唔好講啦，件事咁尷尬。好啦既然你咁想知，嗱，千祈唔好話俾人知呀。
我都未出聲，Rebecca就好大反應：「咪搞！條賤男又一腳踏兩船，佢哋隨時散。我唔想Post完張合照呃Like，轉個頭又俾阿蚊叫要我Delete囉。」
「吓？」
點解佢知呢單嘢㗎？仲要早過我知？
或者食沙律嘅人，心情真係平和啲，Rebecca面無表情咁話：「你唔知咩？阿Fi、阿怡都話咪再預阿邦喎。」
我哋五個由中學玩到而家，雖然大家都咁Friend，但總會出現A同B最糖黐豆，C同D成日蹺住手嘅情形。我同阿蚊最熟，Rebecca同阿Fi成日自私約，阿怡就一時時啦。
我以為尋晚阿蚊拖咗成個鐘頭先講出口，件事實好秘密，淨係會同我講。
但原來我喺佢心目中，唔止係樹洞，仲要唔係唯一嘅樹洞。
我真係食和牛都冇晒味。嫌佢成日唔聽我講嘢，寧願佢唔再同我呻，但當知道自己嘅地位原來同其他人一樣，又唔多開心，想佢有咩事都諗起自己先。
做樹洞難，做一個敏感善妒嘅樹洞更難。
「單身又自由又開心，駛乜搞到好似阿蚊咁煩啫。你知而家啲人幾Open啦，阿蚊話條女可能係阿邦公司嘅新同事喎，嚟咗兩個星期就撻著咗……」Rebecca雙眼放光，講唔停口，啲沙律再多醬，都唔及佢講嘅嘢咁Juicy。
吓？呢樣阿蚊都冇同我講！定其實我尋晚一路諗「報復」，冇認真聽佢講呢？
我越諗越嬲，最衰都係條賤男！
所以我Whatsapp阿蚊，叫佢問阿邦星期六得唔得閒。
我哋要五娘教子！
（待續）
支持爆大鑊請笑哈哈，唔支持請嬲嬲 XD 但對劇情都冇影響 XD
鍾意嘅，請Like & Share! XD
To樹洞: 其實我嘅心情又好似坐過山車咁……呻完 XD
而其實我都係一個樹洞，但唔係一個稱職嘅樹洞，由細到大成日都會講錯嘢，想安慰人又唔知點解變咗好似踩多人一腳咁，又唔識處理人同人之間嘅關係……漸漸發覺，呢種好似叫「毒」:O
＊啲網名係我亂作嘅，如有雷同，你唔好彩 :)
#余該隱 #短篇 #小說 #廣東話 #短篇狂想 #短篇小說 #樹洞 #報復
