「有冇人呀？有冇人呀？我係觀塘線 往調景嶺方向既車長，有冇人知發生咩事呀？有冇人可以黎救下我呀！」
呀穎一聽到有人講野即刻就衝左去部機面前回應佢。
「你係咩站呀？我地係觀塘線 往黃埔方向，石硤尾站，你呢？」
「我係旺角站呀！我而家駛過黎你地呢邊呀！」
「你個到聯唔聯絡到出面呀？你有冇手機呀？」
「我聯絡唔到外面呀！亦都冇手機。」
之後我就問佢 : 「旺角站個到多唔多人呀？ 」因為我見到我地呢邊石硤尾站都小左好多人，雖然唔知點解，但同往常一樣，過左繁忙時間，地鐵站小左好多喪屍。
「比起岩岩先小左好多啦。」佢到左石硤尾站之後問 : 「咁我地而家點呀？」
聽到佢咁問，我心生一計問佢 : 「你個邊沿線有冇塞住左呀？你駛唔駛到過去呀？」
「我睇下先。」之後佢就駛走左架列車去睇下。過左半個鐘之後，佢同返我講 : 「黄大仙站有車停左係到過唔到，但往黄埔沿線就一路暢通。但咁又點呀？」
我問 : 「你地平時開架車去到黃埔站之後會唔會有維修站個啲咁既野架？或者過左黃埔站係啲咩地方呀？」
「個到有一個維修站，到左夜晚，啲列車就會停係個到等人黎檢查同維修。」
「係冇咩人既，office 有幾個人指揮，出面可能有十幾個維修工人咁。」
「ok la，咁我地可以駛過去個到，個到咁小人，話唔定未受感染，就算已經受感染都比較少人，我地可以試下由個到逃走。」
「我地？你指我地要過去對面線個架車到？我地點過呀？」呀穎有啲難以置信咁問我。
我 : 「我地可以互相將架車既車頭駛到對埋一齊，用直線最近距離跑過去。」
穎 : 「冇可能！咁咪姐係去送死。」
我嬲嬲地咁講 : 「你有其他辦法咩？定係你想係到等死？」
呀穎聽完我咁講無言以對。於是我地互相開始調節車頭既位置。
「前啲前啲，後啲後啲.......」對面線個個車長叫做呀偉，佢不停指使我地調節車頭既位置，因為我地既駕駛門設係後面，而對面線既列車就設係側面，要由呀偉睇先睇得清楚我地對得正唔正。咁事到如今我地都唯有信佢。
「得啦得啦！而家啲喪屍數目其實已經小左好多，等啲喪屍散開啲，我再同你地講，到時我地再同時開門，你地再衝過黎。」
係到等緊既時候，我望住道門，心跳不停加快，心入面其實好驚我一行出去就會比喪屍咬死。
過左十幾分鐘之後，我地終於聽到對面呀偉發出指示 : 「係呢個時候啦！開門衝過黎啦！一、二、三，開門。」
「呯！(開門) 呯 (關門) ！..........呯！呯！呯！(拍門) ......」
我嚇到成身震曬，而呀穎就即刻對住個咪勁嬲咁鬧呀偉︰「你係咪有病呀你？你對物位呀？有喪屍係我地門口你叫我地行出黎送死！你去死啦！」
呀偉就好內疚咁講︰「Sorry ar！我唔記得左我既車頭其實係你地既車尾，我將我既車頭對住左你地既車尾。我地再對多次呀！今次一定岩！」
呀穎好嬲咁答返佢︰「仆街啦你！唔記左？我地差啲比你攪到冇命呀！」
呢個時候，我先貼切咁體驗到咩叫-豬一樣的隊友。
雖然岩岩先我已經嚇到鼻個窿都冇肉，但我都係唔想放過任何一個可以逃走既機會，唔想係到等死，所以我都係勸服呀穎再試一次。亦都因為我諗到另一個辦法將啲喪屍引去遠離我地門口既地方，呀穎先肯再試多次。就係我地两架車都開車尾廣播，用啲聲音將啲喪屍引離門口，咁我地就可以更安全咁轉移。當呢次我地肯定我地互相對好對方車頭之後，我地两邊都開廣播將啲喪屍引走。
「你班仆街喪屍，同我即刻躝曬過黎，過黎呀過黎呀.........」呀穎對住個咪不停叫，我地係入面都明顯聽到啲喪屍急速跑離既聲音。透過駕駛側門睇到出面情況既呀偉過左两三分鐘，亦都向我地發出指示︰「OK LA！衝過黎啦！」
呀穎同我對望左一眼之後就開左道門，我地一齊衝左出去。好在好多喪屍都比啲廣播引遠左，對面線既呀偉又開定側門比我地，我地好快就衝左入呀偉個到，順利將道門關埋。由於怕啲喪屍見到我地又衝過黎，我地一上左架車，呀偉就即刻駛開架列車，直接向黃埔方向駛去。
架車一面駛既時候，呀偉一面向我地道歉，我就冇咩點既，呀偉放我地入去佢架車到，佢都有冒到生命危險既，其實佢大可一個人去到黃埔站入面個到，自己逃走唔理我地，但佢都冇咁做到。既然我而家平平安安咁到左佢架車到，我都唔想話追究啲咩！但呀穎就明顯有啲不悅，但應該都由於面對咁既難題，大家都應該同心協力、互相幫助，先有可能得以保命，所以呀穎都敷衍咁應左句︰「算啦！」
等到左盡頭既維修站位置，我地見到路軌上面冇任何職員。但我地唔敢舉妄動先，於是我叫呀偉開下廣播，睇下旁邊疑似休息室同工作室既建築入面有冇人。呀偉就開廣播問︰「有冇人呀？有冇人呀？而家鐵路沿線都勁多喪屍，我地先開車黎到呢到。有冇人呀？有冇人呀？」
「FUNG！」
突然而黎既幕門開門聲令我地三個都呆左，停止左呼吸。而車上幾百隻喪屍隨住幕門既開啟走曬出維修站既月台。當呀穎岩岩了解到而家既狀況，就推開左呀偉，捉住佢衣領問︰「你做物 野呀？」
呀偉就震住咁講︰「我...我...禁錯制....SORRY.....」
佢都未講完，呀穎就一拳打左落佢塊面到，再咆哮咁鬧︰「你冇野呀麻！你係咪傻架！你係咪想累死我地先安落呀！」然後又再打多呀偉幾拳。而我，亦唔想阻止呀穎，我望住車出面入面幾百隻喪屍走黎走去，我真係非常難以置信。
點解？點解？點解呀偉可以咁醒？
