（1）：https://goo.gl/t6s3fG
（2）：https://goo.gl/PjXQSz
我唔知天有眼個「天」同天冇眼個「天」係咪同一個天，只係知我嘅命運已經唔再掌握喺我手。
我甚至唔清楚，到底我仲擁有啲咩？
我忍住怒火，想搞清楚件事，「點解揀我？」的士大佬繼續篤機，似乎聽唔到。
白光入面把聲話：「因為你涼薄，有破壞冇建設，香港就嚟俾你班廢青害死！」
「我只係普通OL，人生好平凡，平時連小強都唔敢殺，更加冇害過人！」
「乜真係咁樣咩？」白光發出一聲冷笑，我開始質疑自己，仲係咪我熟悉嘅咁……
白光繼續講：「你啱啱先對一個陌生女人拳打腳踢喎，咁暴力，真係社會嘅計時炸彈。」
我手臂上嘅抓痕好痛，個女人一定更加痛，但我唔係冇原冇故出手架，如果唔係呢團白光搞鬼，我點會失去理性？我只係想拎返本來屬於我嘅嘢！
「冇聲出呢？」白光偏偏好滿意自己番說話。
「你玩我都影響唔到世界架，大把高官、有錢佬都好衰，你點解唔揀佢哋呀？」
白光大笑，「受傷害嘅，從來都係平民。你幾時見過高官、有錢佬有事架？」
我覺得個邏輯好矛盾，但我駁佢唔到。
白光最後話：「你好快會知道你自己係個咩人。記住唔好同人講呀，否則佢哋就係我下一個目標！」之後就消失咗。
我係咩人？佢意思係我會失去幾多嘢？
成程車我都坐得唔安落，我打俾屋企人，好彩佢哋仲平平安安，反而驚我受咗咩打擊，做傻事。
落咗車，太耐冇返舊居，我幾乎唔認得路。想順住地標行，但以前嘅舊商場原來俾領展收購咗，周圍都係藥房，同一堆拖住喼、掃水貨嘅人。
我成長嘅地方竟然變到咁陌生。
我好辛苦先越過人群，迫返去我舊時住嘅公屋。上到樓，阿媽已經喺𨋢口等緊我，我忍住唔喊，唔想佢擔心。
點知佢攬實我，輕輕拍我背脊，話：「唔駛驚，冇事喇。」
佢把聲好柔弱，但語氣堅定。我個心定返啲，原來有人安慰，啲眼淚真係會巴巴聲咁流落嚟。
入返屋，老豆拎咗個信封出嚟，話：「老豆冇用，冇乜錢，但絕對唔會要你餓死架，你放心做你鍾意做嘅嘢啦。」
老豆少有地鐵漢柔情，個樣鬼死咁扭擰，期待我感動嘅反應。
咪住先！我唔明喎，我冇咗男友、冇咗私樓，都未至於餓死自己掛？
我拉住老豆（佢對於我冇感動到喊似乎好失望）、阿媽坐低，張舊梳化好細張，三個人坐有啲迫。
我旁敲側擊，想知道到底而家我嘅人生、我哋屋企係點嘅。
原本我老豆喺十年前儲夠錢開咗檔麵鋪，而阿賢同我喺公開試都考得好好，佢入咗中文系，我就讀會計，大學二年級我哋開始拍拖。
到我畢業，老豆搵夠錢買私樓，但佢個人就變到好強勢、好專制，周不時叫我放棄阿賢。我已經因為佢放棄咗玩音樂，我唔會再放棄終生幸福。再講呀，有我做平凡OL養家，阿賢搵唔搵到食又點喎？
但我而家嘅人生，似乎就去咗另一個冇父幹嘅平行時空。「九年前」，老豆檔生意越做越好，但業主一加租，老豆就做唔住，摺咗個檔口，仲傷心到大病咗一場。之後佢做返打工仔，永冇出頭，所以我哋繼續過住草根日子。
受老豆大病影響，我公開試衰咗，唔夠分讀會計，反而率性讀音樂，畢業後同朋友喺工廈租咗個單位做Band房，有唔少學生添。
點知幾年後，啲業主唔係加租，就係將工廈變做劏房。我哋租唔起個竇，冇咗大半學生，唯有四出表演。但請我哋出Show嘅機構都話冇Budget，仲話幫我哋宣傳Facebook Page當係酬勞喎。
而阿賢嘅情況，就好似嘉欣咁講，所以我屋企人就連阿賢係邊個都唔知。呢幾年我拍過幾次拖，但對方總係嫌我放假成日要出Show、教學生，冇時間陪佢哋，飛咗我。
人生行到呢步，原來我真係好失敗。二十八歲人，仲要父母俾返錢自己，香港地為理想真係會乞食……
我入咗房，想自己靜下。喺原本嘅時空，我支結他早就賣咗俾人，但而家佢仲喺我間房，我拎起佢，好自然咁彈起傷心嘅歌。音樂，係我唯一嘅安慰。
唔知彈咗幾多首歌，電話響起，係嘉欣。
「到底發生咩事啫？」
我唔想嚇親佢，亦唔想白光揀佢做下個受害者。如果白光係個「天」，多一個人知道，唔通就可以逆「天」而行咩？
我唯有好平靜咁答佢：「冇事呀。」
點知佢好燥底，「你又係咁啦，問你咩都話冇事。你知唔知呢一年嚟我幾擔心你，你推曬啲gathering，咩熟人都唔見，你到底想點呀？」
「我邊有推──」我反駁到一半，就苦笑，原來而家嘅我，係咁架？
「你係咁放飛機，又唔應個Whatsapp Group，君君同芷情好嬲，話要同你絕交呀。大家由初中識到而家，你真係想咁樣咩？」
原來我連朋友都冇埋？我諗一諗，梗係因為我而家咁霉，唔想俾人知啦，而且gathering下下唔係放題就貓貓Café，我邊有咁多錢喎。
「你頭先打俾我，我其實好開心，但你而家又唔出聲，想點啫？」
我吸一口氣，忍唔住想講出口：「我今日遇到──」
但白光又突然出現！
我個心好寒，我差啲就害咗我老死！
「你唔好再理我啲嘢！」我失控大叫，狠狠咁Cut咗嘉欣線，仲熄埋電話。
白光飛咗埋我張床度，笑得諷刺，「你知唔知你咁樣Cut佢線，會整喊佢架？」
阿媽聽到我咁大聲，敲門想入嚟睇下，我同樣好惡咁叫佢走開，唔好理我。我好似聽到佢嘅喊聲，我個心好痛呀！
「你睇下你，你連屋企人同最好嘅朋友都傷害，你份人真係冇得救架喇。」
「你要點先肯放過我呀？」
「你醒下啦，你以為擁有嘅嘢，全部都係你幻想出嚟。現實係你唔努力，又面對唔到自己嘅失敗，變咗憤青、隱青呀！」
我呆咗，我之前嘅人生，只係我嘅幻想？
我忽然諗起《不赦島》，里安納度漸漸喪失自己，由警探忽然變咗殺妻嘅壞人，到底佢本身真係壞人，定其實係其他人嘅陰謀呢？
“To live as a monster or to die as a good man?”
（待續）
鍾意嘅，請LIKE & SHARE！
Facebook專頁：https://goo.gl/FVN3Pb
#余該隱 #短篇 #小說 #廣東話 #短篇狂想 #短篇小說 #涼薄 #天有眼
