對唔住，過咗中秋我先出現，因為我射咗波。
鬼叫國慶咁近中秋咩？我法力有限，變完國旗，足足五日先恢復到原狀。你哋就過時過節，我就過曬時先過到節囉。
呀，我未自我介紹添。我係天庭一個小神，職責係扮吉祥物，包括節日道具同出名嘅神仙，類似你哋嘅Cosplayer啦。
你唔係咁天真，以為而家每個神話人物都仲係佢哋自己掛？
好似李C捷都扮秋官、阿Lam、華仔、Leon拍麥記廣告啦，我扮曬咁多個神話／歷史人物同你哋過節，又有咩出奇啵？
咁你哋實問，咁堅‧嫦娥呢？
呢個問題有啲進步喇，因為而家科學發達，啲人唔似得以前咁可以天馬行空，亦都冇乜邊個再相信神話故仔。
我哋天庭係以人嘅想像力做原料架，所謂原料，可以變成任何嘅補給品，美食、水、酒、錢、靚衫、手機……乜都得。
所以人無想像力，我哋就窮到極，慘到玉帝都冇Budget。
嫦娥、屈原、壽星公、財神爺、天后娘娘……呢類高層太Senior喇，唔肯紓尊降貴扮其他神祇，人工（即係原料量）又收得貴喎，一早俾玉帝炒咗魷魚，然後揀咗一批新丁小神培訓。
古今大小節日，全部都係我哋呢班Intern一手包辦架，收得平過啲Senior好多添！做腦細嘅，梗係識揀請邊個啦！
呢份工好唔好做？你哋放假嗰陣我哋就返工，你哋返工嗰陣我哋咪放假囉，咁返工定放假嘅日數多啲呀？
咁其實喺邊度返工架？都話我哋係吉祥物囉，象徵式咁存在。
當有人諗起節日，例如腦入面諗起「嫦娥」，咁我哋就會接通佢嘅思想。佢幻想嫦娥係點，我哋就會變成點樣，喺佢腦海入面呈現。
就係咁，我哋就得到「想像力」作為原料喇。而幻想越冇可能嘅嘢，得到嘅原料就越多（基於呢個原則，我成日向玉帝提議，接通兵仔思想，幫佢幻想佢同女神一齊咪得囉，做一日得到嘅原料分分鐘夠幾千年用。點知腦細Ban咗我條橋，硬係要食老本，唉）。
有人幻想嫦娥同玉兔OOXX……嗰年中秋，我哋就大豐收……咁當然有啲原料比較高質嘅，有人想像嫦娥其實係殭屍，俾個著短裙、Boot、貪錢嘅八婆追住嚟打，聽講仲拍咗套劇集添……
最辛苦嘅，係每次俾人糟質完，我哋都要用法力將自己變返原狀，先再接Order，如果唔係下一個人就可能會睇到上一個人嘅幻想。
你係咪有時覺得，個腦諗埋啲唔似自己會諗嘅嘢呢？咁就係因為我哋偷懶喇，哈哈！
點知今次國慶，太多人想像一式一樣嘅國旗，搞到我元氣大傷，幾日都變唔返原狀。咁冇理由用支旗，賀人中秋節快樂架。「月餅」源於「起義」，諗起支旗咁敏感，容乜易祖國禁止人再慶祝中秋，我就罪大惡極喇。
咁咪射咗波囉。
點知就出事。今年啲月餅廣告係咁招喚關公，搞到好多人腦震盪，係咁諗應該點樣整個好嘅中秋廣告。Order大增，我哋人手有限做唔切，咁就俾大粒嘢發現咗我缺席喇。
我俾人炒咗，貶埋落人間添呀！
冇曬原料收入，我法力有限，喺香港地點生存呀？
（待續）
鍾意嘅，請Like & Share！Follow埋專頁，睇文快一截！
#余該隱 #短篇 #小說 #廣東話 #短篇狂想 #短篇小說 #中秋節 #射波
