個天話我涼薄，要收返我有嘅嘢！（1）

我叫阿紫，今年二十八歲，細細個屋企好窮，十年前老豆做啲小生意發咗跡，而家唔算大富大貴，但起碼唔憂食唔憂住，我唔駛為份首期唔去日本。

我有個拍咗八年拖嘅男朋友阿賢，感情好好，差唔多談婚論嫁。

今日阿賢接我放工，送我返屋企。因為聽日放假，佢就上我屋企過夜。我父母好開明架。

食完飯，我哋兩個落街食甜品，間鋪好多人，我哋等咗半粒鐘都未有位。

「你渴唔渴呀，我去買支水。」

「好呀。」我笑住放開咗佢隻手。

之後，我掛住睇幾時有平機票，想下個月同阿賢去日本玩返轉，隔咗陣我先再抬起頭。

咦？阿賢仲未返嘅？便利店喺甜品鋪對面咋啵。

我行入便利店，唔見阿賢，有啲唔自在。

唔好話我哋肉麻，我哋初中就識，佢仲住喺上水，前幾年我搬咗去柴灣，「香港Long D」令我哋好珍惜兩個一齊嘅時間。

呀，嗰傻佬好慳家架，肯定去咗附近間超市買。我忍唔住自己甜笑，又想佢快啲返嚟。

我打電話催佢，點知佢熄咗機！

不安好似一日150個單程證咁，撳都撳唔住。我一路行去超市，一路喺人群中搜尋，其他人見到我嘅目光，好奇望返我轉頭。

搵曬超市每個角落頭，問埋職員有冇見到個一米七、著灰衫、深藍色褲嘅男仔買過水，冇人見過！

我突然覺得自己好赤裸裸，企喺一個好陌生嘅世界，身邊冇咗熟悉嘅支撐。

「佢咁大個人，你慌佢走咗去咩？」職員笑笑口。

走咗去？

唔通因為頭先餐飯，老豆俾說話佢聽，話香港地做作家冇錢途，仲叫佢快啲搵份正職，所以阿賢嬲咗？

我可以有十萬個激嬲阿賢嘅原因，但呢樣佢明明話慣曬，唔介意架！

打極俾阿賢都打唔通，我打返屋企，係老豆聽。

我講到好似急口令咁，「老豆，阿賢有冇返過上嚟？」

「咩話？邊個阿賢呀？」

我個心跳漏一拍，「唔好玩啦！我知道你由一開始就反對我哋拍拖，但佢係我揀架，我好愛佢！」

「阿女你⋯⋯你幾時有男朋友架？我開心都嚟唔切啦⋯⋯喂咪住先，個咩阿怡係女人嚟？」老豆口窒窒，完全唔似平時咁有佢講冇人講。

「妖！」我Cut咗老豆線，即刻打俾我同阿賢由中學玩到而家嘅老死，「嘉欣，你知唔知阿賢喺邊呀？我哋食食下嘢，佢唔見咗！」

電話嗰邊有啲「寵寵寵」嘅聲，個衰婆肯定係煲緊劇。佢停咗陣冇講嘢，一開口語氣好唔耐煩，「邊鬼個阿賢呀？」

「我男朋友張浩賢呀！」

「……你瞓醒未？嗰陣你同班花同時溝張浩賢，你輸咗，仲怨自己冇班花咁好家底添。」

「阿賢鍾意嘅係我，點會揀嗰條姣婆翠？」

「嗰陣佢會考衰咗，班花借咗筆錢俾佢去外國讀醫，佢返嚟做咗美容醫生，上年醫死人，釘咗牌，層樓供唔到，破產著埋草。上次gathering咪講咗囉，你做咩唔嚟——」

「乜嘢呀？阿賢話要學魯迅，要靠Keyboard唔靠Botox架！」

嘉欣冇理到我，繼續講：「——呢啲人咁衰格，你冇同到佢一齊，我真係恭喜你呀。」

我真係火都嚟，「你哋係咪有病呀？搵啲咁嘅嘢玩！」

「咪住，魯迅幾時有Keyboard用？你係咪講緊佬訊？」

「妖！」

我打曬俾阿賢嘅兄弟、中同、大同，竟然冇人知阿賢喺邊，仲好懷疑我點解同佢拍拖！成日追阿賢稿嘅編輯仲問返我點解有佢電話，話唔識人叫阿賢！

全世界痴曬線！

我喺條街一路打電話一路喊，有人開始圍住我拍片。

「李紫韻，唔駛搵喇，我收返張浩賢喇。」突然有把時男時女、時老時嫩嘅聲喺我耳邊響起。

「吓？」我望向聲音源頭，竟然平空出現一團人咁高嘅白光！我發曬癲衝向團光，嚇到圍觀嘅人散開咗。

但團光好似有種阻力，將我彈返開，我舉手擋住啲光，睇唔清楚光入面係咩人。

「阿賢呢？」

「因為你份人涼薄，唔俾你受下苦，你唔識體諒其他人架喇。」

「冇啦啦涼咩薄？你份糧就薄……快啲俾返阿賢我！」喊住講呢句嘢，真係好滑稽。

「你係咪唔識聽廣東話呀？資料明明顯示你唔係新腥港人喎。」

「你係咩人？到底想點？」我搿硬想衝入團光，點知團光飛咗上天！

「張浩賢係第一樣，我哋仲會收返你其他嘢，你趕返屋企，或者仲可以見到佢最後一面——」

我嚇到跪咗喺度，呢個世界發生咩事？阿賢到底去咗邊？

（待續）

（2）：https://goo.gl/PjXQSz
（3）：https://goo.gl/CCwAEU
（4）：https://goo.gl/azLHik

鍾意嘅，請LIKE & SHARE :)

#余該隱 #短篇 #小說 #廣東話 #短篇狂想 #短篇小說 #涼薄 #天有眼