喺遠古嘅時候，我就開始咗拍三級片，呀唔係，係炒散先啱。我第一份散工係臨記，嗰陣仲讀緊書。點解冇啦啦申請呢份工，我都唔記得，可能好奇拍電影係點掛。
好似係喺Facebook見到，Whatsapp蛇頭，佢要我send啲生活照俾佢睇。諗返都覺得自己嗰時好大膽，亂咁將自己啲相send俾陌生人喎，點知係咪金魚佬架。
然後蛇頭通知我返工時間，仲竟然話係拍三級片！我當堂淆一淆，但又覺得人生做過格仔片，都不失係件威水史（或者係難得嘅臭史），於是就應承咗。
套戲就三級嘅，但就唔關我事囉。嗱！唔好怪我係標題黨，我都俾人水咗，仲諗住有嘢眅下添。
去到約定時間、地點，蛇頭要收大家身分證，我摸下個銀包，頂！尋日返完大陸換咗銀包，竟然冇帶身分證！
蛇頭個樣咁兇，嗰一刻，我真係驚俾人問候娘親。點解啲咁低級嘅錯誤我都會犯架，媽呀！唯有用張學生證頂住檔先，估唔到蛇頭鐵漢柔情，冇鬧我！好彩有得開工，唔係車錢都蝕埋。
其實我而家都唔明點解臨記要俾人收身分證（我知，驚有人走咗去呀嘛），係收喎、係收喎、係收喎！唔係俾朕Check吓咁簡單喎，而大家都覺得咁嘅模式係理所當然（應該話係冇得Say No囉）。
嗰日我哋成班人要扮中學生，估唔到有個外表睇落成三張幾四張嘅呀嬸都嚟做，佢仲要自備校服，揹埋小學雞專用嘅軟墊書包，真係拍戲咁款，但呢啲梗係用唔著啦。好在臨記唔駛出樣，睇身型鬼知佢幾歲咩。
有啲場口要揀幾個臨記出嚟拍，有個妹妹仔冇份，好緊張咁問：「點解唔揀我嘅？」
扮工人士往往希望腦細睇唔到自己，但演員就啱啱相反。其實對拍戲有熱誠，襯後生發下夢又有咩所謂喎？諗就咁諗，我由頭到腳掃咗個妹妹仔一眼，就覺得佢係時候夢醒喇，sorry，好似mean咗少少。
聽聞有人做臨記捱咗十年，真係俾佢捱到有幾句對白、有大頭鏡頭。用十年時間，換一個夢，值唔值得只有當事人先有資格去判斷，但佢對電影嘅心真係幾令人感動。
但計我話，不如用啲身分證去問財仔借錢，拎返三、五、七十萬嚟，再搵返全部臨記做有名有姓嘅角色，拍返套香港製造2.0啦（「借錢梗要還，咪俾錢中介」自動彈入）。
對於我呢啲貪新鮮嘅人嚟講，拍戲真係好辛苦，又冇想像中咁好玩，大部份嘅時間都用嚟等。
嗰日喺大熱天時拍，籃球場鬼死咁曬。女主角係新人，背唔到對白，拍兩拍當場俾人照肺，阻住曬收工。
講返人工，臨記仲出緊最低工資，包一餐，但我估就連霞姨都應該同啲飯商關係麻麻喇。嗰次啲飯又硬又凍，我食咗一半就丟咗。
收工嗰時，由蛇頭手上拎返張學生證，收咗二百幾蚊，咁就冇咗人生寶貴嘅一日喇。
我玩過一次，就冇再玩喇。後尾套戲上畫，我都有入場睇，好彩見唔到自己，但個二百幾蚊人工扣完車錢再扣返張飛嘅錢，都真係車馬費囉。
鍾意嘅，請Like & Share！Follow埋專頁，睇文快一截！
更多短篇狂想、鬼叫我炒散、愛情散文：https://goo.gl/QcXrPe
Facebook專頁：https://goo.gl/FVN3Pb
#余該隱 #鬼叫我炒散 #炒散 #臨記 #臨時演員都係演員 #Sick屎車牌身分證
