上集:https://post.shikoto.com/posts/136767

嗱,我做好準備,我早就幫自己訂好棺材,
而棺材入面有個暗格,有把匕首,防止有人發現我假死,想黎殺我。
終於到夜晚,其他人都散去,我老婆拖住個仔,企喺我隔離。
老婆同個仔講:「Daddy走咗啦,以後都唔會番黎。」
「Daddy以後都唔會陪我做功課,同我去補習啦?」十歲嘅仔仔問。
「唔會啦,乜都無啦。」老婆伏喺我身上,聲音哽咽:「對唔住,我有時控制唔住脾氣,同你嘈交。我好後悔,我以為可以同你過五十年......」
老婆講咗一大輪,最後好堅定咁話:「你放心,我會養大仔仔,唔會改嫁。」

原來,老婆對我係咁真心,我又點捨得掉低佢地兩個呢?
本來我諗住過完喪禮先醒,但我唔捨得佢再喊落去,於是我彈起身:「老婆,我無事啦。」
老婆呆咗,我原原本本咁解釋番件事。
仔仔眨眨眼:「Daddy,即係你唔死啦?」

「係啊,Daddy唔會死啦,會繼續陪你做功課、陪你補習、參加興趣班,睇住你考Band 1中學、考大學、搵大錢。」
老婆緊緊攬住我:「衰鬼,我應該嬲你,但見到你無事,真係太開心。」
我地擁抱緊,仔仔突然問:「Daddy,點解有把刀嘅?」
原來我坐起身,就露出咗身下果把匕首。
「哎呀,小心整親手。」我想拎番把刀,但雙手都被老婆捉住咗。

突然,我頸上一痛,鮮血噴射而出。
仔仔......我先意識到,個仔捅咗我一刀!
老婆尖叫:「你你你做乜野!」
「Daddy,你教過我做人要有信用,你明明要死,點解反悔唔死?」仔仔個樣好痛苦:「我真係唔想再補習、再參加乜野班,我唔想考Band 1......」
我擠出一句:「我......係為你好。」
我睇過條片,話有細路想逃避怪獸家長,日日畀家長食腸仔蛋,想令佢地短命,果陣我覺得好恐怖。

我估唔到,我個仔可以直接落手......

好彩佢唔夠力,都未到一擊斃命,老婆即刻話:「我打999,老公你頂住。」
「媽咪。」仔仔望住老婆:「妳揀我,定揀Daddy?」
老婆呆咗,仔仔繼續講:「妳可以報警救番Daddy,但全世界都知我想殺老豆,我會無晒前途。」
「我......」老婆隻手指停喺電話個「9」字上面。
「其實Daddy日日逼我,我早就想自殺,如果佢遲『死』一兩年,今日瞓喺度嘅應該係我。」

我見仔仔就黎勸服老婆,心中不寒而慄,捂住個傷口,想衝出去報警。
跌跌撞撞咁行咗兩步,一隻手捉住我,係老婆:「老公,對唔住。」
我回頭一望,仔仔成身都係血,但笑得好燦爛。
我聽到嘅最後一句係:「媽咪,我知妳一定有辦法。」
係啊,我老婆係最出色嘅死人化妝師,佢一定有辦法掩飾傷勢,令我死得好好睇睇。
反正,我已經死咗,無人會驗屍。

我眼前一黑,有時我地想試探人,想聽人地嘅心底話,
但試探嘅代價,你係咪承受得起?

-完-