.jpg "參加自己嘅喪禮（上）")
我屋企係開殯儀館嘅，阿爸臨死前，將間殯儀館交畀我，仲畀咗我一樣家傳之寶：假死藥。
由星宿派嘅龜息功演變而來，食咗之後，人會失去所有生命特徵一星期，
唔需要食飯飲水呼吸，但依然有感覺，只要起身飲啖水，就會解除藥效。
係咪好勁呢？我都覺得勁，但有乜用？好地地邊個要假死？
就算真係有人想假死，藥就得一粒，我點證明畀佢睇粒藥係真？
講到補藥黨咁，你都唔信啦。
我將粒藥擺埋一邊，好好經營間殯儀館就算。
直到有一日半夜，我喺殯儀館當更，有個男人行入黎。
我認得佢，佢係方生，佢太太岩岩死咗，方生日頭先黎辦完手續。
方生神色悲戚：「我可唔可以，去睇下我太太？」
唉，一對有情人陰陽相隔，真可憐。
我幫佢指路：「棺材未封釘，你行入果間房就得。」
方生入房關門後，我繼續做野，諗住掃下地，忽然見到地下有條鎖匙。
方生跌咗鎖匙？我想拎番畀佢，正想推開門，就聽到一聲長笑：「妳個死八婆，妳都蝦得我耐啦，日鬧夜鬧，今日妳終於死咗，仲唔到我威番次？」
我行入去，就見到方生刮咗方太一巴，正確黎講，係方太條屍。
我同方生四目交投，方生好尷尬：「佢......生前好惡架，我只係想出下氣。」
唉，日頭見方生悲痛欲絕咁樣，仲以為佢痛失愛侶，真係人不可貌相。
見我唔出聲，方生即刻拎幾張銀紙出黎，塞落我隻手度：「通融下。」
咁我都識做：「唔好留低傷痕，瞻仰遺容果陣，其他人會見到架。」
方生大力點頭，打開個袋，裡面有一套完整嘅工具：「用針插佢手指甲縫，你覺得點？再唔係用鉗......」
我覺得點？我覺得，機會真係留畀有準備嘅人。
我唔想聽落去，關埋門，等方生同方太二人世界。
臨近天光，方生至走，睇佢走果陣，滿面春風、笑到合唔埋口，
呢件事令我受到好大打擊，人心難測，生前個個說恩深，人人都對你好，死後先顯露真面目。
到底身邊嘅人，有幾多個對我真心？
我死咗，我啲朋友會唔會傷心？
我老婆係死人化妝師，係我拍擋，但我地平時都有嘈交，
我死咗，佢會唔會好興奮，掉低個仔，開開心心去勾佬？
呢個問題困擾咗我好耐，既然我有家傳假死藥，可能命中注定，要我死多一次。
喺一個月黑風高嘅晚上，我食咗粒假死藥。
跟住就係正常流程啦，送醫院、救唔番......我一路聽住身邊嘅聲音，粒藥真係幾堅。
搞完一大輪，去番我果間殯儀館。
一堆人講野，我老婆就喊得好淒涼。
我無乜感覺，人前啫，無外人果陣，先會顯露本性。
