上集：https://post.shikoto.com/posts/136101
狼吞虎嚥咁食完快餐，我意識到一個更嚴重嘅問題，咁搞法，我咪每日要食好多餐？
如果我六個鐘食一餐，即係世界時間四分鐘食一餐，無可能勸阿媽不停煮飯，
即使我落到order，令外賣源源不絕、不分晝夜咁送去我屋企，我都無咁多錢。
我有做part time搵錢，但睇黎計時薪嘅part time唔再適合我，我應該搵按工作量計嘅freelance，先有可能唔餓死我。
我即刻上網搵工，但係對方無當然咁快覆我，我唯有等。
呢一刻，我先知咩叫「度日如年」。
世界時間終於過咗一日，我就過咗三個月，用晒我嘅積蓄黎食飯，
距離我大展拳腳嘅短跑比賽，仲有一年幾，我一定捱唔到。
好彩，我未等到freelance，就等到世外高人再次出現。
「有超能力嘅感覺如何呢？需唔需要修改？」高人笑瞇瞇咁望住我。
「要！」我即刻答：「我需要一個開關，控制幾時啟動呢個超能力！」
高人問：「你確認？只可以改一次架咋，之後我就唔會再出現。」
我確認，喺腰部裝咗個隱蔽嘅開關後，生活終於恢復正常。
要快就快，要慢就慢，人生當然一帆風順啦。
讀書、考試更加易如反掌。
但係喺呢個時候，我開始有啲愧疚。
Spiderman都識講，Greater power, greater responsibility，我唔應該剩係用我嘅超能力，去令自己名成利就，而唔去幫其他人。
我要做一個真正嘅superhero！
但實行起黎，我先發現問題所在。
做英雄首先要啲乜野？係情報。
其他人唔知我係superhero，有危險會打999，唔會打畀我架嘛。
我等到睇新聞，睇到邊度有劫案有凶殺案，件事早已經完咗。
於是，我等咗好耐，都無機會做英雄。
終於有一日，喺FB見到有棟大廈發生火警，火勢猛烈，依加仲救緊火。
我即刻啟動超能力，衝去火場，好似一道閃電咁穿過警方封鎖線。
我第一時間行樓梯衝上去，睇下有無生還者。
我一路行，一路喘氣，好彩我有100倍速，否則啲人燒死晒我都未上到去。
行到15樓，終於比我發現咗個阿婆，虛弱咁倚喺門邊。
咦，阿婆好重，雖然佢睇落唔肥，但點都有一百磅掛。
揀超能力果陣，我只係揀咗速度，無附送力量，就咁一個無健身嘅廢青，要抱一百磅行十五層樓？
雖然好辛苦，但又無理由掉低個阿婆任佢去死。
我半拖半拉，千辛萬苦先將阿婆搬落樓，諗住擺喺消防員附近，等佢地送阿婆去醫院。
但呢個時候，我發現阿婆無咗呼吸。
點解？佢吸入濃煙過多？但就算我拖拖拉拉咁行，加埋100倍速，都係一眨眼就落咗黎架。
然後，我諗到一個更可怕嘅可能性：就係因為我太快。
啲婆婆身體唔好，架車揸得太快佢地都可能會暈，何況我抱住佢，用100倍速搖晃，而佢本來就奄奄一息......
最後我都搞唔清楚個真相，只知婆婆送去醫院後，都係救唔番。
我雖然用速度逃離現場，亦無俾警察發現，但事後我晚晚都瞓唔著。
我不斷喺度諗，假如我當日無去做英雄，婆婆會唔會唔使死？可能佢堅持到消防員搵到佢？
果一刻，我先意識到，唔係有超能力就可以做英雄。
如果你覺得自己好失敗，好想有超能力，
對唔住，你嘅人生，就好似我一樣，根本唔會因為多一種能力而改變。
因為我地嘅失敗，係由好多好多嘅問題形成......改唔晒架。
－完－
