無論有幾多超級英雄，我最鍾意嘅，都係閃電俠，
每次聽到「I am the fastest man alive」都覺得熱血沸騰。
可能因為我有參加短跑比賽，成日會幻想，如果我有神速力就好。
所以，當一個世外高人出現喺我面前，任我揀一種超能力果陣，我毫不猶豫地選擇咗速度。
高人就同我解釋條款，例如呢種超能力唔會令身體衰老加速......好似電話上台咁，佢仲提供一次修改超能力bug嘅機會。
佢問我：「你要幾多倍嘅速度？」
本來我就想揀到光速音速咁快嘅，但係聽到有得改，我就揀個100倍速度試下先。
我又無打算拯救地球，未必需要快得咁誇張嘅。
簽名，確認，超能力將會在聽朝起身啟動。
岩啦，我下個星期就有一場短跑比賽，用一星期時間熟悉下我嘅超能力，呢次仲唔係我攞冠軍？一步步打入奧運都有可能啦。
我滿心歡喜咁入睡，第二朝瞓醒，我即刻晃動手腳睇下自己有無快到。
咦，無，一切都好正常，我落床行向書檯，都無果種「迅雷不及掩耳間，我已出現在書檯旁」嘅感覺。
當然，我好快就諗通咗，我應該唔係剩係肢體快咗，連眼、腦、全身都快埋，咁先唔會睇唔清楚自己動作，一閃身跳咗落樓。
為咗確認我嘅超能力，我去廚房搵阿媽。
阿媽開口：「嘩......」
佢「嘩」咁耐嘅，「嘩」咗成分鐘，我知道事情唔尋常，好耐心咁等。
然後，再睇住阿媽用電影式慢動作轉過身來，望住我。
我明啦，我所有感官都快咗，亦即係話，我眼中嘅所有野都慢咗一百倍。
用一百倍慢鏡播放生活中嘅所有事，係咩感覺？
最痛苦嘅係，我講野果陣，為咗令阿媽聽得明，都要放慢一百倍。
平常人一秒大概講四隻字，我就要一隻字講廿五秒，
咁講完一個字，當然要換氣啦，跟住仲俾阿媽話「乜你講野斷下斷下，好似唔夠氣咁」。
好不容易應付完阿媽，喺佢面前用超慢速食早餐，拎起隻叉都要用一分鐘，我真係頂唔順。
敷衍兩句，拎番入房食，換衫出門口。
阿媽喝住我：「哎呀，你有無食架？入咗房就出番黎嘅？唔通你倒咗啲早餐？」
我真係無心情再理佢，出門番學。
一出門，我嘅熱血又番番黎，諗起閃電俠果種速度，一眨眼就番咗工，我一直都好羨慕。
但行到電梯口，我就呆咗。
我住16樓，架電梯喺3樓，平時1分鐘內就有得入電梯，但我依加咪要等一個鐘？
入咗電梯之後，仲要再等多一個鐘先落到去。
好啦，我死死氣氣行樓梯，落到樓下已經喘晒氣。
又回到電梯問題，咁我係咪唔可以搭車？等巴士咪等死我？
咁我只好揀：繼續行，我估，喺其他人眼中，我好似一道影咁閃過。
問題係，我好攰。
行成個鐘，先番到學校，我成個人俾汗浸濕晒，又臭又樣衰。
我雖然有時間去廁所清理乾淨，再入課室，但入咗學校，我就要好小心，用100倍慢速行路，廢事俾閉路電視影到我「突然」喺班房出現。
一段兩分鐘嘅路，硬生生俾我行咗三個鐘。
去到課室果陣，我再次熱到成身濕晒。
千辛萬苦先去到班房，結果，我選擇臨陣走堂。
因為我真係好肚餓，距離我食早餐，已經過去咗四個鐘。
諗一諗，一堂一個鐘，即係對我黎講嘅一百個鐘，我要喺課室坐四日，餓都餓死我！
睇黎，我有咗超能力之後，唔適合再上堂，自修先最符合經濟效益。
我再次經歷一番苦痛，先買到快餐番屋企食。
番到屋企，望下個鐘，先過去咗十分鐘，而對我黎講，已經過咗十六個鐘，身心俱疲。
狼吞虎嚥咁食完快餐，我意識到一個更嚴重嘅問題，咁搞法，我咪每日要食好多餐？
