戴咗綠帽,可以做啲乜?
傷心、憤怒、無奈,日日食唔落瞓唔著,坐立不安,唔知做咩好。
於是我上論壇開咗個Post,講自己嘅經歷。
估唔到有好多兄弟Inbox我,大吐苦水,既然係同病相憐,我都耐心回覆,
日子耐咗,大家稱我為「綠帽俠」。
唉,雖然戴綠帽係慘啲,但始終係「俠」,同「綠燈俠」都差一個字啫。

綠帽,真係一頂更比一頂綠。
有師兄個老婆去咗外國做野,一年番黎一次,次次都講:「老公忍耐下,等我喺外國賺多啲錢,第日我地生活會好好多。」
但幾年後,佢向師兄提出離婚,原因係「想給孩子一個完整的家」。
果一刻,師兄先知老婆喺外國生咗個仔,今年已經讀小學。

有師兄個同居女友話,阿哥失業,無屋住。
咁師兄就一時好心,畀未來舅仔搬入黎,住咗半年,點知撞破咗女友同阿哥親熱。
師兄梗係嬲到爆,就去告佢地亂倫,點知佢地根本唔係兄妹。
而師兄,就咁同女友個姦夫同住咗半年,呢半年內,師兄仲蠢到客客氣氣,畀水電煤養起佢地。

喺網上講兩句,始終解決唔到問題。

出於俠義精神,我約埋佢地出黎,成班人傾下。
通常電影電視都係咁做架嘛,圍個圈輪流抒發,大家就會走出陰霾。
但係十幾個男人,你眼望我眼,無人出聲。
我嘗試打開話題:「大家講下野啦,講乜都得,比如對未來有咩期望。」
「我想報復!」師兄阿峰叫咗一聲,然後所有人都附和,七嘴八舌咁講要點樣將個衰婆碎屍萬段。
唔好誤會,我地唔係有反社會人格,不過人受咗巨大打擊,又解決唔到問題果陣,講說話難免有啲難聽。

點知,佢地愈講愈認真,開始講到具體報復方法。
我有啲猶豫:「咁樣唔係幾好?」
「我地又唔係殺人放火,但係個心屈住屈住,整蠱下個衰婆都好!」大家羣情洶湧。
集合眾人嘅智慧,諗咗一堆方法出黎。
例如趁個衰婆同第三者出街,搵另一個師兄扮第四者,喺街上偶遇,挑撥離間。
又或者請個小朋友,趁衰婆在場,捉住姦夫衫尾,喊住問:「爸爸做咩唔番屋企?」
講到尾,都係一句「眾志成城」。

如果一個人不斷跟蹤你報復你,你可以報警申請禁制令。
但如果次次都唔同人,造成好少嘅騷擾,例如喺餐廳「唔覺意」倒杯可樂喺你身上,其實都好難搞。

以上呢堆野,都係班師兄傾出黎,我自己嘅睇法係......無聊。
我地呢度得十幾個人,輪流去騷擾,喺唔犯法嘅情況下,最多都係造成少少麻煩,點會真係報復到?
點知,呢啲好似細路仔鬥氣嘅方法,造成嘅傷害遠超我想像。
佢地傾好方法後,就上網開咗個「綠帽俠」group,展示晒衰婆嘅資料。
雖然肯出黎嘅人只得十幾個,但網上肯幫手嘅人就多不勝數。
有時候,幫手未必要做乜野,喺條街度撞到目標,喊一句:「咦,你就係畀綠帽老公戴果個XXX?」「你就係搞人老婆果個XXX?」已經足夠令人無地自容。
如果「唔讓座」都可以變成網絡欺凌,戴綠帽點解唔得?
好快,果班師兄嘅前度,就俾網友起晒底,每次出街都被路人騷擾。

最成功嘅,應該係阿峰,亦係第一個提出要報復嘅師兄。
佢前妻係做老師嘅,呢件事揚咗之後,就俾學校炒咗,連姦夫都受唔住壓力,離佢而去,愛情事業兩失意。
見到呢個情況,我開始有啲後悔,我身為綠帽俠創辦人,居然無參與綠帽俠第一個活動,
我雖然有幫手,但我嫌無謂,就無擺到前妻嘅資料出黎,點估到會咁有效。
原來,我心裡面,都好想見到佢倒楣。

阿峰成功咗,聽講佢前妻仲走黎求佢停手。
呢種報復嘅快感,係咪應該好爽?

下集:https://post.shikoto.com/posts/129703-我嘅職業係:綠帽俠(下)