上集：https://post.shikoto.com/posts/127361

我去報警，講晒所有疑點，警方一查，發現張太無發生過車禍，甚至無醫院記錄話佢有病。
一個正常人坐輪椅，匿埋喺間屋度？
根據種種疑點，警方申請搜查令，入張生屋企搜查。
張生見到警察，神情慌張，警察要揭開輪椅布簾果陣，張生尖叫出聲。
布簾入面究竟有乜野？
居然乜都無，空空如也。

呢個時候，警察發現灶頭有翻新嘅痕跡。
一問我，我即刻答：「好多年都無裝修過。」我點會晒錢。
邊有租客會自己裝修，唔使業主畀錢，又唔使延長租約？

在場所有人腦海都浮現起四個字：灶底藏屍！
結果，灶底乜都無，搵弧光燈黎照，成間屋都無血跡。

張生崩潰，蹲喺地下喊：「係我呃人，我老婆......一年前跟佬走咗，我好掛住佢，成日幻想佢喺屋企，買飯都買兩份。我寧願佢坐輪椅，日日照顧佢......」
張生拎個錄音機出黎，果然係「老公我愛你」同「老公真係好」。
「呢兩段錄音，係新婚果陣佢錄架。」張生神情好悲傷：「我老婆鍾意煮飯，我想整靚個灶頭畀佢。」
真相大白，雖然無告我浪費警力，但件事鬧得太大，成棟樓都知。
鄰里都用歧視嘅眼光望住我，無錯，我係誤會咗一個痴情男。
所以張生提出續租果陣，我都無反對，希望可以補償下佢。

此後，張生成日推住架布簾輪椅出出入入，或者運啲水泥番黎砌灶頭，
有時我仲聽到隔離有女人聲、尖叫聲、撞門聲，

唉，張生嘅心理病愈黎愈嚴重，要推介個心理醫生畀佢至得。

＊＊　　　　　　＊＊　　　　　　＊＊

張生祕密日記：
「今日捉到第三個女仔，佢斷氣前仲撞咗下門，好彩無人懷疑。
警察上門後，我就知道，計劃可以開始實施。
我揀呢間屋，就係因為個業主住隔離，一定好關心呢啲野。
見我推住輪椅，個傻佬業主仲介紹心理醫生畀我，佢點估到裡面有個暈咗嘅女仔。
成班都係傻仔！
不過人開始多，個灶頭唔夠大，要諗下辦法。」

大話變成真話，永遠有破綻。
講大話最好嘅方法，就係令人以為，你講緊嘅，係另一個大話。

－完－