上集：https://post.shikoto.com/posts/126050

阿婆路線失敗，我要自己解決問題。
我真係唔想，有一日瞓醒，發現自己另一個人格殺咗人，然後我要陪佢坐監。
或者突然懷孕，原來另一個人格搞咗一夜情，
我就咁做咗單親媽媽，連BB爸爸係咩國籍都唔知，諗下都可怕。

為免另一個人格亂黎，我臨瞓前將房門反鎖，然後將條鎖匙由門縫推出去。
但係，另一個人格出現嘅時間愈黎愈唔規律，
第二日起身，我仲係我，唯有叫阿媽幫手開門。
阿媽開咗門，我又諗起，另一個人格都可以叫我阿媽開門，或者報警。
同埋我就算有辦法鎖住自己，唔通我成日唔番工？

我用盡各種方法，都解決唔到呢個問題，心力交瘁。

直到有一日，我突然意識到，搞咗咁耐，另一個人格雖然無乜建樹，但都無做過咩過份野。
佢只係好乖咁日日番工、放工，番屋企食飯。
我鬆一口氣得黎，又有少少失望，
人地人格分裂，就分裂出變態殺手、天才畫家、野獸......我就分裂出一個同我一樣咁悶嘅OL？

不過，日子耐咗，我發現有多個人格都唔錯。
你地可能覺得，有一段時間無得操縱自己個身體，係好大問題。
但我生活實在唔精彩，只係番工放工，
間中人格分裂，對我黎講，只係多個人代我番工，又無咩唔好。
而我仲開始留紙條，同果個人格傾計。

傾傾下，發現我地都幾多共同興趣，例如，我地對大部份野都無乜興趣。
留紙條仲有個好處，就係一次只可以講一句野，好適合我呢種悶蛋。
我開始覺得，我搵到呢個世界上，唯一一個完全了解我，唔嫌棄我嘅對象。
可能，呢種就叫Soul mate，靈魂伴侶，
喺我身體入面嘅另一個靈魂，做我嘅伴侶。

過咗幾個月，阿婆好開心咁黎搵我：「小欣，三姨婆個侄仔係外國做精神科醫生，呢排番咗香港，我同佢講妳嘅情況，佢話肯偷偷幫妳醫啊。」
「唔使啦婆婆，我已經好番啦。」
「真係架？」
「好番晒啦，依加我過得好開心。」

我的人格分裂已經康復了，
從此小欣和小欣快樂地生活在一起。

－完－