上集：https://post.shikoto.com/posts/124384

我生不如死，諗諗下，就算我可以繼承佢老豆副身家，至少要等多十年八載，
而我好肯定，喺呢種強度嘅訓練之下，我會短命過佢老豆。
算啦，都係做廢青比較適合我。

喺一個月黑風高嘅晚上，我逃出咗豪宅。
果晚我好困惑，明明我發明咗一隻咁勁嘅戒指，點解我會搞成咁？
而Rebecca都成個月無搵過我，第二朝，我send咗個Whatsapp畀佢，
如果佢真係唔理我，我就搵過第三個目標啦。
點知佢send咗個地址畀我，約我夜晚上佢屋企食燭光晚餐。
驚喜！都話我隻戒指有用，而且Rebecca睇落溫溫柔柔，一定唔會好似眉姐咁操控我。

拎住紮玫瑰花，撳門鐘，一開門，我就俾人扯咗入屋，
屋企唔止無燭光，仲有兩個大漢，一個滿臉橫肉，一個六舊腹肌。

我勁恐慌：「Rebecca呢？」
「Re乜野becca！果個係許太，我地大佬個老婆！你都大膽啦。」腹肌男一腳踢到我跪低。
「我唔知佢結咗婚，我地岩岩識咋。」我痛到眼淚都標埋，假如我知佢係黑幫大佬個老婆，畀個天我做膽都唔會撩佢。
「岩岩識？許太一俾大佬發現，即刻刪晒啲whatsapp，俾大佬打到半死，都唔肯供你出黎。」橫肉男冷笑：「如果唔係你自投羅網，差啲搵你唔到。」

呢件事證明「一見鍾情戒指」非常成功，但絕對唔係好消息，
我唔知點解釋，許太只見過我一次，但對我情根深種。
我諗咗幾秒，又俾人打多幾拳，我已經感覺到溫熱嘅鼻血，我懷疑佢地會當我沙包咁，活生生打死我。
我真係唔想死，唔想為咗一個連中文名都唔知嘅女人而死！

生死關頭，我出動最後武器，亦係我唯一嘅武器，
我啟動隻戒指，隨便望一個人，我都唔知望咗邊個。
有人叫：「停手！」

「咩事啊？」
「總之......唔好傷害佢。」
「你傻咗？」
趁兩個壯男打起上黎，我逃出呢間屋，上的士去咗醫院。

喺醫院住咗幾日，有一朝打開眼，我見到橫肉男含羞答答咁望住我。
「許生果邊我已經幫你解決咗，唔使擔心。」橫肉男宣佈呢個好消息，但我感受唔到高興。
「果日傷害咗你，真係好對唔住。」橫肉男成個痴心情長劍咁款：「我知我好唐突，但從此，就等我黎保護你、愛錫你啦。」
佢仲要加多句：「你放心，無論你去到邊，我都會跟住你，唔會再俾你受到風吹雨打。」

每人愛嘅方法都唔同，就算令對方愛上你，佢都未必用你期望嘅方法去愛你。
愛情好神聖，我唔會再企圖操控愛情，我知錯啦！
咁有無人可以救下我？
依加橫肉男企係我床邊，拎住紮盛放嘅菊花......

－完－