Carmen 之所以係全場最矚目，係因為佢太靚啦。 佢靚到根本冇人估到佢就係阿蘭個妹， 何況佢細阿蘭十多年，喺加拿大返嚟，衣著打扮，有如一個中環麗人，多於油麻地庸艷之娃。
可能係咁，一眾男人嘅目光，都習中喺 Carmen 身上多於新娘，Carmen 亦感覺到而非常之不自然，所以揀咗個背著大圍嘅坐，正正就是阿樂隔離。
就嚟開席，有個叫「大舊」嘅街坊走嚟同阿榮講佢張枱太逼，隔離枱仲有個空位，可唔可以調過去坐。
阿榮望過去個空位度，再望向門口，心諗「睇嚟阿鳳都係唔會嚟㗎喇」，心有點沉，暗嘆—口氣，就同大舊講：「冇問題，除便坐啦，招呼唔到，飲多杯呀吓。」
阿鳳就係阿榮長期幫儭嗰個一樓一鳳，雖然阿榮耐不耐都會試吓第二啲，不過，過年過節，梗會喺阿鳳度。
是由當阿榮最失落嘅一次。。死老竇。嗰晚，佢飲到好醉，去到阿鳳度，根本就搞唔到嘢，阿榮攬住阿鳳喊咗一場後就瞓著咗，阿鳳就陪咗佢一晚，另類「包夜」。之後，阿榮就唔多唔少對阿鳳有種親屬關係，有時有嘢唔開心，都會同阿鳳傾吓心事，所以請埋佢嚟飲，不過，阿榮擺酒當晚，阿鳳並無出現。
==========================================================
好彩，澳門而家咁多姿多彩，阿榮跟阿蘭去澳門渡蜜月，都算唔錯。
其實阿榮有檔豬肉，阿蘭有檔菜，雖然唔算大富大貴，但假假地都算做有盤生意仔，衣食無憂，但亦係手停口停個隻，所以近近哋過澳門玩幾日算做蜜月，又方便，又唔使去啲高檔外國地方，口啞啞唔識講。
阿榮唔係澳門常客，但有時亦跟阿樂過江玩番轉，今次間酒店都係阿樂幫佢book嘅，仲話係乜鬼嘢「蜜月套房」，設備齊全，包佢三日三夜唔使出房門都得，肚餓就叫room service食咁話，阿樂又話第日同佢姨仔Carmen喺嗰度蜜月就過癮喇，—邊講，—邊流口水，唔怪得肯幫阿榮book房咁好死。
阿榮笑口答佢：「我同阿蘭度蜜月咋，你估同柏芝呀，大戰三日三夜。」，自從阿榮喺「老廟」買咗隻「冠A明星碟」，柏芝就成為咗阿榮嘅幻想對像。
由於大喜當晚，阿榮被班友隊醉咗，搞到阿蘭冇得洞房，不過既然第二日就即過澳門，知道有靚酒店背景跟新老公做人生第一次，個心都無將尋晚嘅事擺喺心度。
「威尼斯人」蜜月套房， 金碧輝煌，高床軟枕，電動圓床上，六個各款各樣嘅裙邊枕頭，攞嚟墊起邊度都可以，絕對可以舒舒服服咁擺出任何姿勢。
男女分廁，雙人浴池，金色水龍頭雙花灑 ，玻璃牆，七彩幻燈，滿天星燈天花板，高焦點探射燈，落地鍍金玻璃外牆窗，仲有好多好多好多嘅。。鏡，跟一張奇形怪異嘅。。椅？
阿蘭入到去見到個廁所第一句就係:「我啋！有冇搞錯呀？個廁所都冇門嘅，痾尿嗰度隔離，又整個塔喺度畀人飲水，咁鬼唔衛生，仲整到咁鬼矮，要踎低頭先飲到。」
講完就埋去踎低試—啖，「不過又幾清甜」，又再整多啖，之後就行出廳。
「啋！咁鬼多鏡囉嚟照乜鬼呀？天花板都安塊鏡，仲要喺正張床上高，跌落嚟扑鬼死囉。＂
而阿榮就吞啖口水，心諗，「如果跟栢芝喺三日三夜就好囉。」
~ 完 ~
==============================================================
好，辛苦大家了，—個平淡/平凡的短故事，我己經盡量加點趣味，去點綴一吓，但是仍然只是一個很平淡的故事，因為只是—對「平凡的人」的遭遇。然而，若讀者有去留意得到某些角色的「特點」，就能明白「不平凡的愛」，隱藏在內。
首先，先講「阿蘭」吧，為自己弟妹，犧牲自己背起了—頭家，這份「愛」，是絕對「不平凡」，可敬的。
阿榮跟阿鳳之間的「情」，或許容易會被忽略了，是有？是冇？還是—種不會有結果的無奈呢？
阿鳳的「不出現」(—個只在背景的角色)，相信，即使有人去思想，亦會是—塊「照妖鏡」，不同人給她「不出現」的原因，可能會很大分别，由個人的心思，去批判或猜考阿鳳，可以由妒忌，至根本只是阿榮的一廂情願，到阿鳳自卑自己只是一個妓女，都能反應出各思想者的本身心理。
六嬸的念舊，阿榮對街坊的友情，阿蘭能穿上嫁衣的感慨。。等等，都是些令人值得珍惜的。
另外還有很多人物細節反映出不同人生價值觀，如阿榮記念死鬼老竇嘅吩咐，而同齡的阿樂則仍然在「玩」，仲發夢想溝細自己十多年嘅「上菜」Carmen 。無疑，夢想跟幻想，只是—線之差，起碼能帶來—點喜悅。
能感受以上的種種嘅讀者，你身邊的人，是幸福的，因為他們有細心和懂惜珍的你/妳在身邊。
整篇故事，雖是—件「喜事」，但因人事背景，卻蒙上了一層灰色的氣氛，帶上—股黑色幽默。所以，當自己受靈感創寫此篇時，著實有股百感交雜之感，即使數年後今日重改。今次，就再加寫多—小段「後記」，揮去那灰色感覺，塗上新希望，增加正能量吧。
~ 後記 ~
「 威尼斯人」蜜月套房裏 ，阿榮阿蘭，大戰三日三夜，半生人，終於真正有屬於自己的「伴侣」，更平凡的人，也可擁有他們金碧輝煌燦爛的時刻。
十個月後，阿蘭平安生下—對「龍鳳胎」，阿榮阿蘭，從此—家人，過著「平凡」的幸福家庭生活。勞苦辛酸半生人，亦由新的—代，帶出新的希望和幸福。
(哈，講笑咩，「平凡的幸福家庭生活」，己經是—份「不平凡」的事。)
因為這對「平凡」人，都有著「不平凡的愛」。
