上集：https://post.shikoto.com/posts/121831

老公好似驚咗我，掉轉頭直接跑向投胎處。
我正打算追，職員拉住我：「陽間結婚都要雙方同意，你無得逼佢架。」
職員繼續講：「我地遇過唔少同類個案，好多夫妻投胎果陣，先知對方唔想再續前緣。」
咁我點算？睇住我老公自己去投胎，娶第個女人。
「有無辦法，即使佢唔同意，都可以確保我下世嫁畀佢？」
「妳想強姦妳老公？」職員更正：「唔係，應該叫『強結』，比強姦更嚴重。」

我有啲慚愧，但我真係忍受唔到，下世我同老公再無關係！
「為咗妳老公，你咩都肯做？」職員把聲有啲誘惑。
呢度喺地府，莫非......佢係魔鬼？佢想我出賣靈魂？
我鼓起勇氣：「我可以將我嘅靈魂畀你。」

「我要妳嘅靈魂做乜野。」職員好震驚：「邊有人要靈魂，個個都要錢，妳試下用靈魂買生果。」
「錢？」乜鬼都咁市儈。
「講個祕密妳知，妳可以賄賂我地個經理，單方面牽紅線。」
咦，陰間都咁黑暗？我鍾意！「但係我無錢，點樣賄賂。」

「我地中心缺個清潔工，妳係度打下工，儲下錢，咪可以......」
車，我以為至少要出賣貞操，不過同出賣貞操相比，做清潔真係辛苦好多。
我都好小心：「要做幾多年先儲得夠？」
「大概六十年。」
嘩，我老公依加投胎，我六十年後先投，
就算有紅線，到我十八歲，佢都成八十歲，話唔定死埋，點前續前緣？

「你可以選擇另一個package，只須三十年。」職員落力推銷：「做你老公個女，時間岩岩好。」
我諗起一句說話：「女兒是父親前世情人。」
職員點頭：「呢個package好多女人幫襯，做老婆都仲要睇人面色，呢個年代，做女真係大晒架。」
好，為咗同我老公再續前緣，我就留喺度打工！
愛情，係要靠自己努力嘅。

三個月後，我離開投胎中心，踏上投胎之路。
係，我未做夠三十年，無辦法做我老公個女。
係咪我頓悟，知道愛情係雙向嘅，唔應該強逼？
傻啦，只係做清潔好辛苦，陰間仲要無勞工處，日日超時工作，真係頂唔到三十年。
果一刻，我先發現，原來我無自己想像中咁愛我老公。
乜野「我甘願為你受三十年風吹、三十年雨打」嘅小說橋段，
聽落好浪漫，你試下就會知，原來係做唔到。

放下，到你頂唔順，自然會放下。

－完－