上集：https://post.shikoto.com/posts/120791
我一路思考呢個問題，一路上咗個女仔屋企，佢叫可可，真係好可憐。
「我死得好慘啊......」我著住錢生嘅衫，喺佢床前飄過。
「你個賤男，仲敢黎搵我？」可可睜開眼，大喝一聲，順手將盞床頭燈擲向我。
雖然鬼唔會被擲中，但我都下意識避開，
咁樣一拖延，可可居然發現咗：「你唔係錢生，你係邊個？」
我呆咗，一直以黎，被嚇嘅人心虛，都唔會眼定定望實我，
呢個情況應該點處理？訓練課程無教。
可可突然用溫柔嘅聲線問：「你點解要著佢嘅衫？你知唔知果個係衰人？」
我終於忍唔住，一口氣講晒成件事出黎。
「我明啊，你都係搵食啫。」可可望住我：「咁無嚇到我，你番去會唔會俾人炒架？」
我尷尬地拎部攝錄機出黎：「我要交條片，係妳嚇到好驚嘅樣。」
果一晚，係我死後最開心嘅一晚。
「黎，再叫大聲啲。不如補少少粉，臉色蒼白啲......」我同可可拍片拍咗成晚，天光果陣，我依依不捨咁番陰間。
錢生收到條片，好滿意，繼續幫襯，
為咗同可可渡過愉快嘅夜晚，每次我都搶住接單，都算「財色兼收」。
我覺得，我墮入愛河了，唔知呢啲叫唔叫人鬼情未了？
我開始擔心，第日可可同人拍拖結婚，我無辦法真心祝福佢。
連續兩個星期，我都無接到錢生嘅單，我主動打畀佢，扮到好想接生意咁。
點知錢生哈哈大笑：「睇片唔夠過癮，有得接觸真人就更好。」
接觸真人？鬼摸唔到人，除非可可都變咗鬼......錢生想殺可可！
我同上司一講，上司擺擺手：「陰間好多黑暗野，有錢佬買通生死簿職員，改人陽壽，乜都有，法律係為有錢人服務。」
我想保護可可，點知我未有機會上陽間，我就喺陰間入口見到可可。
我地四目交投，我淚流滿面。
我大力點頭，大踏步前進，無論前路幾艱難，我都要為我嘅愛情而努力！
突然有班人走過黎，領頭嘅正正係錢生，唔通大庭廣眾，佢都敢強搶民女？
令人意外嘅，係可可飛撲向錢生懷裡：「對唔住，你死後我好掛住你，諗起你對我有幾好，我真係好後悔......我地終於見番面。」
大家望住佢地相擁而泣，紛紛拍手，讚嘆有情人終成眷屬。
咩劇情？
事後我用咗好多方法，終於搵到機會單獨見可可，我只想問一句：「點解？」
「果陣同你拍片，係幾開心，但過日子，唔係開心就夠。」可可嘆氣：「你都講我知錢生幾大勢力啦，唔通落到陰間，我仲要同你捱劏房？」
「妳明明好憎佢架！」我一問完，突然諗起，錢生死前都無乜錢，只係一隻小小觀音兵，落咗陰間先發達。
一切已經有答案，原來我死後，都因為無樓而溝唔到女。
以前我同可可陰陽相隔，我會親熱咁叫「可可」；
依加我地喺同一個空間，我只可以叫佢「錢太」。
有一種愛情，只可遠觀，不可擺埋一齊。
－完－
