「歡迎黎到『初到陰間導賞團』，我係你地嘅導遊，牛頭。
岩岩死咗，覺得不知所措？我會介紹陰間嘅生活，令你地迅速融入社會。
唔使怕醜架，有咩問題都可以問。」
我鬆一口氣，講真我岩岩死果陣，真係幾驚架，又驚自己落十八層地獄，又驚自己投胎變昆蟲，
好彩陰間都有導遊，服務都幾貼心。
「陰間嘅生活，同陽間差唔多，例如果個商場，就有服裝店、書店、機鋪。」
有旅客舉手：「咁係咪用陰司紙消費？」
牛頭搖頭：「以前係，但人類亂燒鈔票，搞到通脹加劇，冥通銀行倒閉。
政府已經推出陰間新鈔，唔可以再用陽間燒嘅銀紙，不過燒啲衫褲Iphone，大家都可以用。」
有消費，即係要番工？不過，鬼唔使食飯，又唔會死，使乜番工？
直到牛頭帶咗我地去間細房：「呢度係暫住屋，你地買樓租樓之前，都可以免費住喺度。」
嘩，呢間房得五十尺，我地有三十個人，點住？
牛頭攤手：「做咩望住我？陰間人口只增不減，土地不足更嚴重，有得暫住算係咁。」
「想住得好啲？努力番工搵錢啦。」牛頭嘅笑容有啲奸詐。
明知係地產商嘅陰謀，為咗舒適生活，睇黎都要番工供樓租樓，真係死都不得安寧。
導賞團結束後，我去請教牛頭，我應該做咩工好。
「你生前做咩工？陰間好多工，都需要陽間工作經驗。」
「我整馬桶嘅......」我有啲尷尬，陰間明顯唔需要馬桶。
牛頭皺眉：「仲識唔識其他野？」
「都識整冷氣......」陰間亦都無冷氣。
「我明，廚師、醫生果啲，死後都有就業困難。」牛頭拍下我膊頭：「唔使驚，陰間都有啲工，係陽間無嘅，適合你地做。
例如我就係陰間導賞員，仲有托夢所，處理想托夢畀人嘅客戶。」
作為宅男，呢兩份都唔太適合我：「......有無工唔太需要溝通？」
牛頭諗咗一陣：「我有個朋友開咗間『扮鬼中心』，呢排招聘緊。」
扮鬼？我依加咪鬼囉。
不過，畀咁多鬼上陽間，個世界會亂，所以有專業扮鬼員。」
咦，呢份工幾岩我，無須溝通技巧，扮鬼飄下就得，
最多講：「嗚，我死得好慘。」
我就投身咗扮鬼行業，首先要接受訓練課程，學習恐怖化妝、睇下恐怖片咁。
雖然我要扮個客，去嚇佢個仇人，但無人會望實一隻鬼，
只要衣著似，化妝化到血淋淋就OK。
訓練完，我接過好多單生意，
有戴綠帽嘅老公，想嚇下個老婆；有俾不孝子激死嘅婆婆，想嚇下個仔......
每一單我都樂在其中，亦賺到錢租劏房，並且儲緊首期。
直到有一次，我有啲疑惑：「呢個客想嚇個後生女，話個女仔害死佢，但個女仔同佢非親非故喎。」
上司解釋：「個客係錢生，佢生前追個女仔，追咗好耐都無得手，就去搞強姦，點知未得手就馬上風死咗。嚴格黎講，都算係因個女仔而死。」
「嘩，咁賤格嘅生意都接？」
「依加出糧畀你做大俠？你搏炒？」上司軟硬兼施：「錢生係陰間最大嘅地產商，好有錢架，你做得好，分分鐘買到樓。」
搵錢就要埋沒良心？有正義感就要失業？
我一路思考呢個問題，一路上咗個女仔屋企，佢叫可可，真係好可憐。
