上集：https://post.shikoto.com/posts/120409-我嘅職業係：恩人（上）

我搬入豪宅，請咗個工人，但有一日，我食完飯就暈咗。
醒番之後，我見到韓迅。
「係你救咗我？你真係識報恩。」我好感動，
點知韓迅一腳踢落我個頭度：「你個死蠢，我要殺你啊。」
工人......韓迅收買咗我個工人，想殺我？
「我死咗，你都拎唔番啲錢架。」我嘗試勸服佢。
「我唔在乎啲錢，我只係唔鍾意被人威脅。」韓迅冷笑，用力踩住我個頭。

如果我死咗，邊個會懷疑韓迅？佢報恩態度良好，又找晒數。
唔通，我要死喺呢個亡恩負義嘅人渣手上？

「停手！」有人從角落跳出黎，大喝一聲：「我已經拍片放咗上雲端，如果我地有咩事，全世界都知你謀殺恩人！」
韓迅冷哼一聲，僵持一陣就走咗。

果個人扶起我：「恩公，我係金仔啊，你記唔記得我？」
好彩有人報恩，「我當年資助過你？」
「我係果個法律系學生，當年好彩你請我整合約、做見證人，我先有錢交學費咋。
我一直想多謝你，呢排知道你同韓迅嘅事，終於搵得番你，
點知我去到門口，發現你無鎖門，跟住就......」
果一刻，我老淚縱橫，
最珍貴嘅報恩，唔係幾多身家，而係救我一條命嘅真心。

自從韓迅事件後，我唔敢再請工人。

金仔自告奮勇，搬咗入黎照顧我，好似親生仔咁貼心。
而韓迅亦無再黎搵我，可能真係怕咗金仔條片。
但幸福嘅日子唔長久，我身體愈黎愈差，我無兒無女，就立遺囑將果一億畀晒金仔。
臨死前，金仔貼住我耳邊，同我講咗一句說話：
「其實我果日上你屋企，係見到你攞咗一億，想問你借錢交租。
不過後來我諗，點解我唔可以要晒果一億？多謝你啊。」

金仔做嘅一切，都係為咗謀我副身家？
我身體咁差，係咪佢做嘅手腳？佢從來無諗過報恩？
可惜，我未問出口，就已經斷咗氣。

滴水之恩，總有人用毒酒相報。

－完－