上集：https://post.shikoto.com/posts/119742

點知，蚊蚊個樣好迷茫：「邊個係阿輝？」
「係妳男朋友！」我將件事由頭到尾講一次。
「樣貌轉換器？我又唔係叮噹，邊有咁神奇嘅野，同埋我都無男朋友。」
為咗令蚊蚊信我，我講咗好多佢生活嘅小習慣。
蚊蚊點頭：「但係，你住我隔離，我點知你唔係偷窺我？」

蚊蚊失咗憶？我衝番公司，想搵阿輝嘅資料，令蚊蚊尋回記憶。
點知搵黎搵去，竟然無阿輝呢個人，甚至從來都無呢個員工。
由於我表現太古怪，Gigi捉咗我去睇心理醫生。

醫生咁樣講：「可能佢生活太大壓力，導致佢出現幻覺，幻想自己係另一個人。」
幻想？即係世上從來都無阿輝，我一直都係Daniel？
Gigi有啲愧疚，應承以後都唔會再打我。

無用架，我愛嘅都唔係Gigi，我地根本唔夾。
但我幾苦惱都好，都無辦法變番阿輝，唔通係上天對我嘅懲罰？
後來我再趁Gigi出街，搵咗蚊蚊幾次，
終於有一次，蚊蚊問：「點解你要同Gigi一齊？」
「因為我係Daniel，如果妳將我變番阿輝，我就可以同番妳一齊。」

蚊蚊反問：「邊條法例規定，Daniel一定要同Gigi一齊？」
我呆咗，蚊蚊繼續講：「我真係唔記得『阿輝』，但愛情係一種選擇，
無論你係唔係Daniel，呢一刻你唔鍾意佢，就應該面對呢件事。係諗辦法補救，定應該分開？
而唔係幻想自己變成另一個人，或者對方變成第個。」

結果，我同Gigi提出分手，
出乎意料地，Gigi都有如釋重負嘅神情。
分手後，我正式追求蚊蚊，目前為止都未追到，不過我對未來依然好有信心。
愛情係取決於你愛邊個，而唔係取決於你係邊個。

－完－