聽日係我生日,今日女友蚊蚊就同我講,話聽日要畀啲新鮮感我。
唉,都拍咗拖七年,仲有乜野新鮮,最多咪換套性感睡衣。
點知蚊蚊話:「我表哥發明咗個『樣貌轉換器』,可以完全變成另外一個人,佢肯借畀我試下。」
樣貌轉換?我個心呯呯跳,真係好有新鮮感,我揀咩樣貌好?
Model娜娜、明星雪雪、定隔離屋個靚女Gigi?
「聽日你就知。」蚊蚊神祕一笑,轉身瞓咗。

我懷住激動嘅心情,第二朝睜開眼,就見到隔離屋個靚女Gigi!
蚊蚊真係識做,我正要撲埋去,突然發現,間房唔同咗。
「Daniel,做咩呆咗?快啲起身煮早餐啦。」
咪住先,我明明叫阿輝,Daniel...... 係我同事,亦係Gigi嘅男友,我一向羨慕佢嘅艷福。

我即刻衝去廁所,果然喺塊鏡度見到Daniel個樣。
嘩,蚊蚊做到咁盡?唔係自己變身,而係將我變成Daniel,等我有得同Gigi拍拖?
咁真正嘅Daniel去咗邊?唔理啦,飛來艷福,要我就係禽獸,唔要就連禽獸都不如。

突然我耳仔一痛,Gigi扭緊我隻耳仔:「煮完早餐就番工啦,蠢材。」
Gigi睇落溫溫柔柔,原來咁惡嘅。
我死死氣氣去煮早餐,心諗,今晚我就大展雄風。
但出門口前,我一直俾Gigi鬧,煮得唔好食、著衫樣衰、行路慢吞吞......好似連呼吸都係錯,
短短一個鐘,我已經有度日如年嘅感覺。

好不容易番到公司,我坐落Daniel個位,好彩Daniel職務同我差唔多,我都應付得黎。
扮工到放工,我躊躇滿志咁番屋企,喺門口遇到蚊蚊,我忍唔住感嘆:「蚊蚊妳真係大方。」
「你講乜野?」蚊蚊退後兩步,眼裡有對陌生人嘅戒備。

使唔使咁入戲?

呢個時候,Gigi一手將我扯入屋:「Daniel你想死啦,喺門口溝女?仲要溝隔離條醜女?」
我忍唔住幫蚊蚊辯解:「蚊蚊唔係醜女。」
「仲駁嘴!」Gigi一巴車埋黎。
唔好以為我唔打女人,反正我依加唔係阿輝,我正想還手,就被Gigi打到眼冒金星。
我仰起頭,見到牆上掛住Gigi嘅空手道黑帶證書。
佢下下都往最痛而無傷痕嘅地方打,簡直係家庭暴力專家。
結果唔好話艷遇,我不斷被精神上、肉體上虐待。

終於趁Gigi出咗街,我敲響咗蚊蚊道門。
「蚊蚊我知錯啦,世間始終妳好,我唔應該幻想其他女人,快啲將我變番阿輝啦。」
壞男人得到教訓,浪子回頭,應該大團圓結局啦?
點知,蚊蚊個樣好迷茫:「邊個係阿輝?」

下集:https://post.shikoto.com/posts/119901-女友話要畀新鮮感我(下)