上集：https://post.shikoto.com/posts/119386-割肉減肥（上）

點知，阿昌眼定定望住地下果舊肉：「係妳岩岩割出黎？」
我有啲尷尬：「係啊，係咪好肥？所以我先想減肥，你可唔可以畀我割到婚禮......」
「舊肉妳仲要唔要？」阿昌突然問。
我反應唔切：「下？點會要......」

我話音未落，阿昌執起舊肉，咬咗一啖，好似品嚐美食咁。
然後，佢好感動咁攬住我：「我自細就想試食人肉，但一直都無機會，原來真係咁好食架。」
我望住果舊血淋淋嘅肉，產生唔到任何食慾。
阿昌好快食晒果舊肉，我覺得好嘔心：「你居然食人肉？」
阿昌眨眼：「咁果舊肉妳唔要，我珍惜食物有咩問題？」

邏輯上無問題，但係，「食人肉好變態！」
阿昌反問：「咁妳割自己啲肉，邊樣變態啲？」
我又答唔出，諗深一層，如果見到女友拎把刀，割到自己血淋淋，大部份男人都嚇走咗。

阿昌解釋：「我想食人肉，但從來無諗過殺人，或者侵犯其他人嘅屍體。食慾還食慾，道德還道德。」
「食人肉都有道德？」我理解唔到。
「本來呢個慾望會深藏喺我心底，但妳要割自己啲肉黎減肥，反正都割落黎，不如畀我食。」
阿昌好認真咁講：「就算食雞肉豬肉，雞同豬都唔想被食，但依加我先徵求妳同意，再食妳唔要嘅肉，唔係好善良咩？」
我二百幾磅，想減一百磅......應該都夠阿昌食好耐。

我勉強同意，阿昌興奮到彈起。
佢幫我搵麻醉藥，令我割果下無咁痛；仲研究埋人體結構，確保我下刀嘅部位，唔會傷到內臟，有時佢仲幫我割。

佢亦設計咗好多人肉嘅烹飪方法，不過我都無同佢一齊食。
結婚果日，我真係變咗個瘦瘦新娘，人人都讚我減肥成功。
不過阿昌就食得肉多，反而肥咗，唔知算唔算「我啲肉轉移去佢身上」。

婚後，阿昌成日帶我周圍食野，我抵受唔住美食嘅誘惑，好快肥番。
我知道，佢都係想我肥番，佢有得食人肉啫。
不過，我又想靚、又想食野、又唔想做運動，都無辦法唔割肉。
自此之後，割肉食肉，就成為我地嘅定期親密活動。
我知道，呢段感情會好穩固，因為阿昌搵唔到另一個女人，會割肉畀佢食；
我亦搵唔到另一個男人，會接受到我成日割肉。

愛情有好多種，就算你係癲，
最緊要有一個人，陪你一齊癲。

－完－