我自細就係肥妹，試晒所有減肥方法，美容院、減肥藥、做運動唔使講；
節食搞到胃出血，之後仲食多咗，更加肥；
甚至做過手術，喺胃入面擺個水袋，都無瘦到。
雖然男友阿昌唔嫌棄，但臨近結婚，我真係好想做個瘦新娘，唔著果件加加大碼婚紗。
直至有一晚，我落街放狗，有個老伯拎住個碗，向我乞錢。
我減唔到肥，心情已經好差，阿伯仲囉囉嗦嗦，係咁講佢有幾慘。
我一怒之下，就叫我隻狗大舊去咬佢。
點知大舊撲上去，張開血盆大口，但角度問題，一啖咬咗落個乞兒兜度。
大舊甩咗隻牙，跌落地哀鳴，我心痛到喊。
阿伯好感動：「小姐，見妳咁有愛心、骨格精奇，就送『速效紗布』畀妳。」
阿伯甩低個盒就走咗，我懷疑，佢係驚我逼佢賠大舊嘅醫藥費。
解決咗大舊嘅問題後，我打開個盒，有張說明書，話無論幾重嘅傷口，都可以用「速效紗布」迅速癒合。
咁神奇？我手指上岩岩有個細傷口，用紗布一敷，果然消失咗，而且完全唔痛。
真係太神奇！但係有乜用？有屠龍刀，都要有龍俾你屠架。
我唔等錢使，唔會賣咗塊紗布，亦無興趣拎出黎做研究，貢獻人類。
我只係想瘦，點解果位世外高人唔畀減肥藥我？
我望住身上嘅豬腩肉，突然昇起一個念頭。
我拎把菜刀，狠狠喺大腿最肥果個位割落去，好似割豬肉咁。
趁血未湧晒出黎，我即刻拍塊紗布落去，劇痛消失。
我望望隻大腿，皮光肉滑，好似無受過傷一樣，而且仲瘦咗一忽。
果下真係好痛，但咁樣減肥，比任何方法都要快，又唔會縮胸。
同埋一隻大腿瘦咗，另一隻肥，唔平衡架嘛，我不斷說服自己，要割埋另一隻。
我深吸一口氣，再割落另一隻大腿度，然後係兩隻小腿......
我慢慢有經驗，敷紗布快咗，噴出黎嘅血都無咁多。
我望住塊全身鏡，沾沾自喜，忍唔住影咗張腳相，匿名擺上網。
平生第一次，有人讚我靚女，雖然佢地睇唔到我個樣。
其實我輪廓都唔差，如果我割埋肚腩、再割下塊面，絕對可以做靚靚新娘。
我鼓起勇氣，趁阿昌唔係屋企，進行割肉行動！
古有割肉餵鷹，今有割肉減肥。
我岩岩割咗一塊肚腩肉，敷完紗布，身後就響起開門聲。
我好震驚：「阿昌，你今日唔係OT咩？」
阿昌見我無著衫，拎住把血跡斑斑嘅菜刀，更加震驚：「有賊？」
佢拎起手機就想報警，我急忙阻止佢，唯有講個真相畀佢知。
我都知呢啲故仔，結局通常都係傷口爆裂、眾叛親離，死得好慘。
但為咗靚，我真係抵受唔到誘惑。
我估到阿昌會有咩反應，佢會先鬧我唔愛惜身體，再哄我，話無論肥瘦都咁愛我，
然後沒收塊「速效紗布」，令我以後都無得割肉。
點知，阿昌...
