上集：https://post.shikoto.com/posts/118356-我係一隻溝唔到女嘅吸血鬼（上）
「趁無客人，我幫你檢查下啲牙。」
免費服務？我開心咗一秒，即刻覺得唔對路！
我嘴裡面，係有兩隻吸血鬼尖牙架，雖然弱化咗，只係有少少尖，但都同常人唔同。
「嘩，你呢兩隻牙好尖。」
死啦，佢發現咗我係吸血鬼啦。
「怪唔知得你唔開口笑，唔使擔心，我幫你解決！」
牙醫女友手起麻醉落，迅雷不及掩耳間，我已經無咗兩隻尖牙。
我陷入極度震驚，連佢點樣幫我裝兩隻假牙，我都無留意。
我應該係世界上第一隻，裝假牙嘅吸血鬼。
而且到目前為止，我連牙血都無飲過一啖。
我覺得好絕望，我決定自殺。
如果失敗，就當實驗下吸血鬼跳海會唔會死。
喺一個月黑風高嘅晚上，我諗住跳海，俾個靚女阻止。
其實都唔算意外，我已經喺海邊行咗三個鐘，就黎天光，都未儲夠勇氣跳落去。
「你有咩事睇唔開啊？」靚女把聲好溫柔。
我將我嘅吸血鬼生涯講佢知，反正我都要死，講乜都無所謂，嚇走佢我就跳海。
靚女愈聽愈開心：「你跟我走，我係科學家，好有興趣研究吸血鬼。」
下，我低調咗咁多年，就係唔想做實驗品被解剖啫。
靚女一輪嘴講：「我地只會間中抽你嘅血黎實驗，會有袋裝人血畀你飲，
薪高糧準、銀行假、有醫療住宅津貼，有良好晉升機會。」
嘩，咁似勞工處招聘廣告嘅？吸血鬼可以晉升做乜野？有女朋友嘅吸血鬼？
「咁難先搵到隻吸血鬼，點解要殺雞取卵？令你保持心情愉快，血液質素先會好。」
靚女又換個角度講：「你本來都想自殺，如果我真係呃你、解剖你，仲唔使你鼓氣勇氣，喺海邊行黎行去添。」
佢講得相當有道理，於是我就跟佢走，可能靚女特別有說服力。
實驗室好重視我，高薪請我做職業吸血鬼。
有靚女上司、有血飲、有糧出， 話唔定有一日，佢仲會嫁埋畀我，人生簡直係完美。
但呢種美好生活，只係持續咗三個月。
靚女用我嘅血，令自己變咗吸血鬼，然後炒咗我。
喂，呢個絕對係詐騙，但無一條法例可以保障我，一隻可憐的小吸血鬼。
往後果二三百年，我有時會聽到消息，話有個靚女科學家周圍溝仔。
我偶爾去海邊行下，都無再遇到靚女。
唉，童話裡都是騙人的。
－完－
