我係一隻吸血鬼，特別弱嘅吸血鬼，乜野強化敏捷都無我份。
我懷疑係因為，我唔係被吸血鬼咬，而係被吸血狗咬，即係被吸血鬼咬過嘅狗。
搞到我初初仲以為係狂犬病，好彩我發現自己想飲人血，牙都長咗，先推斷出我係吸血鬼。
作為「狗二代」，所有吸血鬼特性都弱化咗，
我只係唔鍾意太陽，未到唔出得街；平時都係食飯，人血嘛，都有少少想飲。
跟住落黎，大家係咪想聽我半夜出動，殺人飲血嘅故事？
答案係，呢啲事都無發生，無錯我有吸血鬼嘅尖牙，
但你唔會因為屋企有兩把菜刀，就覺得你可以大開殺戒架嘛。
所以，我雖然想飲血，但都無得飲。
作為窮人，呢種感覺已經習慣咗，我以前夠想餐餐鮑魚鵝肝啦，咪一樣無。
飲食方面先擺埋一邊，睇咗咁多《吸血新世紀》，做吸血鬼，點可以唔溝女？
我鼓起勇氣出沒夜場，展示我吸血鬼嘅魅力。
男主角溝到女，唔係因為佢地係吸血鬼，而係佢地本身靚仔。
我唯有做腳踏實地嘅吸血鬼－參加Speed Dating。
真係畀我識到個女仔，普普通通，一拍就拍咗八年拖。
我呢個人無乜大志，有個女仔陪我到老就得。
但係我向佢求婚果日，佢同我講：「我唔要戒指，我只要你嘅祕密。」
唔通佢發現咗我係吸血鬼？佢點解會知？
女友眼中有一團火：「八年黎，你個樣一啲都無變過，你去邊度做抗衰老療程？」
點解個個女人都想抗衰老，明明佢後生都唔靚，唔老都無用架。
但男人，好多時都無講真話嘅權利。
我只可以講：「邊有啫，過多三十年，妳喺我心目中都係最靚。」
「我眼角已經有細紋。」女友就黎喊：「你話我知啦，療程啲錢我會自己畀。」
最後佢飛咗我，話我太自私，連間美容院都唔肯介紹，點可以共度一生。
係我嘅錯？我唔知，但我意識到，我長生不老嘅外表，令我好難有固定女友。
命中注定，我要做情場浪子。
過咗一輪，我識咗一個女牙醫。
我承認我接近佢係有目的，我真係好想飲血，但又識唔到血庫工作人員，唯有將就住飲下牙血先。
咩話？飲牙血好嘔心？
角度問題啫，你食雞子雞腎，隻雞都覺得你好嘔心。
我溝咗佢之後，就成日借機話掛住佢，去佢間診所度hea。
但診所人來人往，我搵唔到機會，直到有一次，終於無晒客人。
診所內剩番牙醫女友，同幾個扮工嘅護士。
我悄悄行近牙醫床，突然，牙醫女友撲埋黎，一手推咗我落床。
「趁無客人，我幫你檢查下啲牙。」
