我向心心求婚成功後,一直都好興奮,好快就有個靚老婆,
直至心媽開口,話要四十萬禮金,好似一盆冷水淋落黎。
「我啲錢已經畀晒首期,不如......八萬丫,發發聲好意頭。」
心媽撇撇嘴:「即係話心心唔值四十萬啫。」
「心心當然係無價寶......」我講唔落去,望住心心,希望佢幫我講好說話,

可惜,心心已被洗腦,
「我唔係貪錢,但我覺得禮金,係表示對婚姻嘅重視。
不如你問下你老豆,佢按咗層樓都唔止......」
叫我老豆按咗層樓,畀我娶老婆?佢一定打死我。
呢餐飯當然不歡而散,我諗住側側膊,拖拖下,約好日子結埋婚。

點知過幾日,心心同我講,心媽逼佢同個有錢仔相睇,
「阿媽話當識個朋友啫,一日未結婚,一日都有得揀。」
心心話鋒一轉:「不過,畀咗禮金,就係另一回事。」

兩母女夾份逼我,我可以點?
我同老友Stanley傾訴,佢問:「咁你仲想唔想同心心結婚?」

「想,但我無咁多錢。」我知我無骨氣,但如果咁多人有骨氣,根本唔會有「雞脾問題」同「土地問題」。
「岳母收咁貴禮金,當個女係貨物,奇貨可居啫。」Stanley意味深長:「如果件貨有問題,其他客唔會買,老闆自然會蝕讓畀你。」
「即係個女大咗肚,趕住嫁咁?」我好似明:「我有諗過,但我控制唔到架嘛。」
Stanley答:「咁其他野呢?有無睇過新聞,話女仔遇到意外,毀容殘廢,男友不離不棄結婚......你話岳母會唔會收禮金?」

唔會,甚至萬分感激倒貼大床。
「即係叫我毀心心容?」
Stanley反問:「我無咁講,但萬一......佢有咩意外,你仲愛唔愛佢?」
愛,我係愛心心個人,唔係佢個樣!
退一步講,唔一定要塊臉爛晒,就算有條小刀疤,果啲有錢仔都唔會要,而我自己又唔介意。
Stanley留低一個電話號碼:「有啲打手收錢辦事,如果你有需要......咁大個仔,自己諗啦。」

我忍唔住問價,扮一場打劫,先兩萬蚊,
兩萬VS四十萬,VS我唔使戴綠帽,好似好抵。
果一晚,我送心心番屋企果陣,經過一條小路,跳出三個蒙面大漢。
我扮到好英勇,衝上去同其中一個搏鬥,兩個人撳住心心,喺佢臉上劃咗一刀。

「唔好傷害佢!」我即刻投降,交個銀包出黎,劫匪散去。

我送心心去醫院,心媽聞訊趕到。
「係我無好好保護心心,佢俾人劃花咗塊臉。」
心媽神色一變:「毀容?」
「伯母放心!無論心心變成點,我都會愛錫佢一世。」我個樣好誠懇。
心媽諗咗一陣,捉住我對手:「你真係乖仔,等心心出院,我地就安排結婚嘅事。」
果然無再提禮金,Stanley估中咗!

心心處理好傷口後,我開始擔心,因為個傷口好細,條疤幼到......
兩個大男人落手咁輕?果啲咩猙獰疤痕、皮肉外露,呃人架?
心媽不斷送各種去疤膏,加埋成尺厚粉底,心心出院後,又變得光彩照人,一啲都唔覺有疤痕。
「伯母,結婚嘅事......」
「結婚一生人一次,真係要好慎重,特別係禮金。」心媽又打回原形,我果兩萬蚊白使。

我向Stanley訴苦,
Stanley嘆氣:「依加美容技術咁先進,又化妝又激光去疤,仲有得植皮。不過身體上嘅殘疾,好似無咁易醫。」
下個星期,心心就約咗個有錢仔相睇,如果......
Stanley意有所指:「有啲人隻腳拐下拐下,唔太影響生活,只係無咁好睇。」

下集:https://post.shikoto.com/posts/118192-為咗唔畀禮金,我打瘸咗女朋友隻腳(下)