「新聞報導：專家成功翻譯狗隻語言，預計經過產品測試後，狗語翻譯器會推出市場，從此人狗無障礙溝通......」
伏喺電視機前嘅我，驚喜到企咗起身。
作為一隻狗，我有好多野想講畀主人知，例如最近呢款狗糧唔好食、
仲有，隔離屋莎莎係我女朋友，放狗果陣，應該畀啲私人空間我地......
男主人係個肥佬，坦白講，初初我唔想俾佢養，
我同你地一樣，都鍾意靚女。
但我不停對肥佬吠，被寵物店店員解讀為「狗狗見到你好興奮」，
於是我就俾肥佬買走咗，可以講，都係因為無狗語翻譯器。
不過，搬入肥佬屋企後，先知佢做生意好有錢，而且又錫我，我都幾滿意，
講到呢度，我知你地想鬧我「港狗」，同「港女」一樣丫嘛。
「有狗語翻譯器，就可以同旺財傾計啦。」肥佬摸下我個頭，個樣好開心。
但係，女主人黑晒面：「老公，我地唔可以再養旺財。」
我同肥佬都呆咗，女主人解釋：「你叫朋友黎傾生意，都無避開旺財，佢知道好多祕密。
到時翻譯器普及，旺財亂講野點算？廉署叫佢指證我地，咪死梗？」
同埋我點會去做證人？我又唔係警犬，唔通我會為咗正義，令自己失去安穩嘅生活？
但呢一刻，未有翻譯器，我無辦法表明清白。
好彩肥佬幫我講好說話：「就算翻譯器推出，狗要做證人，都要再立法。諮詢立法搞十年八載，旺財都唔知幾多歲，立咗法先算。」
岩啦岩啦，我呢把老骨頭，都唔知擺得幾耐。
呢場風波好似過去咗，第二日肥佬番咗工，我懶洋洋咁起身，走向我嘅早餐。
然後我見到隻老鼠，已經食緊我份糧。
唉，咁大間豪宅都有老鼠，不過我已經習慣咗，一隻半隻，當佢搭檯啦。
咪住先，點解隻老鼠抽筋嘅？
我見到佢成身震晒，好慢咁行番老鼠洞，岩岩行到門口，就瞓低死咗。
有毒，狗糧有毒！
食物一向由女主人準備，點解佢要害我？尋日明明講好咗，我無機會做證人，唔會舉報肥佬。
我再諗一諗，近排肥佬出差果陣，女主人會帶個小白臉番屋企，入佢間房......
女主人驚翻譯器推出後，我向肥佬告密，所以要殺狗滅口？
大佬，其實我對你地嘅恩怨情仇，一啲興趣都無；同埋妳驚我告密，點解唔賄賂我，一定要用咁殘酷嘅方法？
「踏、踏。」係女主人嘅腳步聲，
佢入到黎，見到滿地狗糧，換過兜狗糧畀我，
我當然唔敢食，坐埋一邊扮抑鬱、扮厭食。
我估，佢要同肥佬交代，應該唔會拎把刀，將我斬成狗肉醬掛？
好不容易等到肥佬放工，
女主人投訴：「隻衰狗，今日唔食飯。」
「旺財，有咩事唔開心啊？」肥佬摸下我個頭：「我帶你出去行下。」
放狗時間，終於可以遠離女主人，我好雀躍咁衝出去，
我要同女友莎莎商量下，應該點算好，咁搞法，唔毒死都餓死。
我見到莎莎個菲傭啦，咦，唔見莎莎嘅？
肥佬走上去問：「咦，隻狗仔呢？今日唔放出黎嘅？」
菲傭情緒好低落：「莎莎今日急病，死咗，Mum都救唔番。」
急病？一定係因為狗語翻譯器嘅新聞，莎莎都知啲祕密，俾佢主人滅口。
肥佬嘆氣：「太可憐啦，旺財好鍾意同莎莎玩。」
你個蠢材，乜野「好鍾意玩」，莎莎係我女朋友！
平時呢個時間，好多人放狗，但今晚，好多朋友仔都唔見咗。
