入村（下）

我地坐係到終於等到4點，但周圍既環境一啲變化都冇。我望下隻錶，時間一點一滴咁過去，我越來黎越焦急，我心入面諗，等多陣，等多陣，可能等多陣條村就會出現架啦！但到左4點9，時間已經遠離尋日我地入村既時間，證明時間唔係入村既關鍵。而我地已經由朝等到而家，冇食過野，呢到又冇瓦遮頭，烈日之下等左咁耐，我見到老豆同細佬都滴曬汗。再咁等落去，好可能就中暑啦！
我抬頭望向天，個太陽非常燦眼，連眼都打唔開咁制，但我就靈機一觸，唔通個天先係關鍵？尋日我地黎到既時候，天色昏暗，我仲記得當時已經見到月亮。唔通要係環境昏暗，至陰既積聚之下，呢個地方先可以同異空間連接。就係呢個時候，我見到遠處有一片陰霾，正飄緊過黎！

我隱約係霧之間見到村既入口，班村民堵住村口，而細妹係呀公面前跪左落黎。

以上為呀哥角度

以下為細妹角度

「唔准走！你地唔走得！」
唔知點解，此時既氛圍異常恐怖，但我都硬住頭皮問：「點解？」
佢地都仲未開口，就見到呀公拖住婆婆步履蹣跚咁係人群之中行左出黎。

「媽！點解？」媽咪見到過左身十幾年既呀婆，即刻眼泛淚光，衝過去攬住佢。
「女呀！」呀婆都係到喊。
「媽！點解？點解？我好掛住你呀⋯⋯」媽咪喊住咁講。
面前上映左一場母女重逢既感人場面，似乎都令大家都忘記左岩岩村民唔比我地走既事。
佢地攬完之後，人群之中又走左幾個老人家出黎，媽咪驚訝咁望住佢地，似乎佢地都唔應該出現係呢個地方，因為佢地都已經死左。呀婆捉住呀媽隻手開始解釋：「女！其實你呀爸佢係10年前都已經死左，佢為左唔令你傷心，所以依然聽你電話，一路到而家。」
媽咪崩潰咁喊：「冇可能架！嗚⋯爸呀！對唔住呀！嗚⋯」我見到都好心痛，眼濕濕。
此時，有一個較年輕既村民對住呀媽講：「常言道：『子欲養而親不在』。既然呢到有個咁既地方，可以永遠陪伴係父母身邊，彌補你嘅過去，點解你唔留底呢？」即使佢講到有幾煽情都好，我都知道，佢地只係係到自欺欺人，父母已經死左，佢地再用自己既生命黎贖罪。

媽咪用手抹左抹眼淚，望望我，再望望呀公呀婆，佢走到呀公身邊拖住呀公，對住我飲泣咁講：「女！對唔住！幫我同你老豆同埋呀哥講對唔住！」

「咚！」我跪左係呀公面前。
「呀公！求下你！我求下你！比媽咪走啦！冇左佢，我地個家就毀架啦！你就念在呢十幾年黎，媽咪日日打比你，定時寄錢比你，咁孝順你！我求下你！我求下你！」我向呀公叩頭。

「咩叫孝順？」呀公突然講出呢句。語氣唔係質問！唔係諷刺！係帶點無奈既落莫。我因為佢突如其來既問題變到啞口無言。
但佢又繼續講：「我從來冇諗過要留底你地！你地黎睇我，我已經好開心，你地走啦！」呀公推開左媽咪捉住佢既個隻手。

「妹！」
我一另轉頭，見到呀哥係村口跑緊入黎，我同媽咪距離村口100米，我一手拖住媽咪，衝向呀哥到。將媽咪交到呀哥手上，講：「帶媽咪走！」而我就跑響佢地後面。我見到媽咪跑既時候，仲不停咁回望呀公。我就心諗，離開左呢個地方，所有既事，就當發左場夢啦！
但當我越接近村口，我就覺我個人越暈，腳步越重，艱難咁跑到村口，我就已經跪左係地下，面前既影像越黎越模糊，見到媽咪同呀哥越跑越遠，直至漆黑一片⋯